Aposel 17:5-32

⁵Ikut, a nuknukin a ramano taro Juda i laulau doko un der, uni a susut det mur der. Ra det ben pas a ramano kum tene pet laulau tagun a nubual ra a taro det ser wan tomo iai. Det wan tomo, ra det ukatutur a balan a taro. Det kalabor ruk una rumu anun o Jeson, ma det sisio sur o Pol ma o Sailas sur det in ben pirso pas der torom a taro.

⁶Ikut ka det sio pas der. Ra det dat pas o Jeson ma a ramano taro kai ra det tar tistisino una nurnur, torom a kum mugumugu tagun a tamon ra, ma det kukukuk lena, “A taro ri det pam purpuruon una kum tamon una rakrakon bual, ra uniri, det sa wanpat bulung nin torom dat!

⁷O Jeson i ben pas det utiro una nun a rumu. Det rop ri det lakai a kum warkurai anun a Sisa, a king anun a taro Rom, ra det watungi lena ara musano kai, a risano o Iesu, i a king.”

⁸A taro ma a kum mugumugu det longoro a wasiso ri, ra det balano sungun.

⁹Det ungongos o Jeson ma det kai ra di dat pas det tomo nami, sur det in kul pirso pas det. Numur det los pas a mani gusun det ra det palos ru det.

¹⁰Una bung na mirum ut ra, det ra det tar tistisino una nurnur det tulu lakit ru o Pol ma o Sailas utong o Beria. Numur ra der wanpat tiro iai, der ruk una rumu na lotu anun a taro Juda.

¹¹Det ri det wakak tandet tong o Tesalonaika, uni det rakon a wasiso ri nama gasgas, ma det luk wakak a kum wasiso tagun a Buk Tabu una kum bung rop, sur det in tama a wasiso anun o Pol, ra i lingmulus o awu.

¹²Ra a susut na taro Juda det nurnur, ma a susut na mugumugu na ino Grik, ma a susut na musano kai.

¹³Ikut a taro Juda kurong o Tesalonaika det longoro i lena o Pol i warawai una wasiso anun o God tong o Beria, ra det wan utong ma det usungun balan a taro.

¹⁴Uniutra det ra det tar tistisino una nurnur det tulu ru o Pol unago utasi. Ikut o Sailas der nam o Timoti der kis utmakai tong o Beria.

¹⁵A taro ra det ben pas o Pol, det wan tomo nami utong o Atens. Numur i tulu melet det nama wasiso torom o Sailas ma o Timoti sur der in nan lakit toromi.

¹⁶Ra o Pol i kis langlang utmakai sur o Sailas ma o Timoti tong o Atens, i tupunuk doko, uni i tama a tamon ra i bukus nama kum torotoro na god ra det ser lotu torom det.

¹⁷I ruk una rumu na lotu anun a taro Juda, ra i wasiso tomo nama ramano taro Juda, ma a taro gisen kai ra det lotu torom o God. Ma una kum bung rop, i wasiso kai tomo nam det ra i pastorom det una nubual na inawan tomo.

¹⁸A kum tene mananos tagun a etowo anun a taro Epikurian ma a taro Stoik det wasiso tomo nami. Ara taro det watungi lena, “Asau ri a tene wasiso oros ri i inanos dat nami?” Ma ara taro kai det watungi lena, “Kutiro, i inanos dat una kum matok na god tagun tu tamon gisen.” Det watungi lenri uni i warawai nama Wakak na Wasiso un o Iesu ma a nilaun melet gusun a minat.

¹⁹Det ben pasi, ra det wan nami usapat una nubual na kiwung di watungi nam o Areopagus, ma det watungi lena, “Met nem na longoro anum a matok na etowo.

²⁰A utna ra u wasiso uni i senene doko torom met, ra met nemi sur met in mananos una kukuraino.”

²¹Det watungi lenri, uni a kum te Atens ma a kum usiro kai ra det kis tiro iai, det balon una kum bung nama wasiso tomo una kum matok na etowo, ma una longlongoro kai suri.

²²O Pol i katutur epotor tandet una Areopagus ra i watungi lena, “Mot a taro Atens, una kum pinapam ra mot pami, a tama i lena mot a kum tene lotu mot.

²³Uni, ra a wan tuptupukus nin, a tama wakak a kum toktok ra mot lotlotu torom det, ma a sa tama tari kai ara kabulu ra di tuntun etabor uni, a tumtumus uni i lenri, ‘Torom a god ra ka di tasmani’. O naro ra mot lotu toromi, ikut ka mot tasmani, i kut ri, an warawai nami torom mot.

²⁴O God ut ra i pam a rakrakon bual ma a kum utna ra det kis uni, i a Labino anun a langit, ma a rakrakon bual, ma ke kis un tu rumu na lotu ra a taro det pami.

²⁵Ma ke sibo sur taio in waruti, uni i ut i ser tabor a taro rop nama nilaun, a wuwu na nilaun, ma a kum utna rop.

²⁶O God i ukis tar a mugano musano. Ra tagun a musano ra, a kum kabotaro rop det wanpat taguni, ma det kis una rakrakon bual rop. Una nuknukino ut i nuki lena det in kis awai, ma nangisin det in nanpat, ma nangisin det in rop melet.

²⁷O God i pam a kum utna ri sur a taro det in sisio suri, ma kutiro det in tamtama tuptupukus suri ma det in sio pasi. Ikut, o God ke kis bakbak gusun dat rop taktakai.

²⁸Elar nami ra di sa watung tari lena, ‘Dat laun, dat wan tuptupukus, ma dat utur ukai a nilaun, i kibino ut tan o God.’ Elar nama numot a kum tene pak kelekele ra det watungi lena, ‘Dat kai a kum nutnutunu ut.’

²⁹“Dat a kum nutnutun o God, i mo ra ke wakak sur dat in nuki lena o God i elar nama toktok na gol, o a silwa, o a wat, ra a taro det nuk pat pasi ma det pami nama lamandet.

³⁰Una kum kilalo numugu, o God ke nuknuk una kum petutna anun a taro ra ka det nuk pasi. Ikut uniri, i pitar a warkurai sur a taro rop una rakrakon bual det in nukpukus.

³¹Uni i sa kubus tar a bung, sur in warkurai a rakrakon bual nama tokodos na warkurai. Ma i sa pilok tar a musano ra in pam a warkurai ra. I ukatutur melet pas a musano ra gusun a minat. Una nun a pinapam ra, i ulingmulus pas anun a pipilok torom a taro rop.”

³²Ra det longoro a wasiso una nilaun melet gusun a minat, ara taro tagun det, det urongon laulau uni, ikut ara taro kai det watungi lena, “Met nemi sur un wasiso melet torom met una utna ri.”