Aposel 15:7-26

⁷Ra det sa wasiso suano pas det, o Pita i katutur ma i watungi tandet lena, “A kum tistising, mot tasmani lena numugu, o God i pilok pas iau gusun mot, sur an warawai nama Wakak na Wasiso torom det ra awu sur a taro Juda, sur det in longoro i, ma det in nurnur uni.

⁸Ma o God, i ra i tasman a nuknukin a taro rop, i pitar a Tokodos na Nion torom a taro ra awu sur a taro Juda elar nami ra i pitari torom dat. Una nun a pinapam ra, i ese i torom dat lena i mulaot pas det kai ra awu sur a taro Juda.

⁹Anun a pinapam torom dat ma torom det ke senene. I ukodos det kai umatano uni det nurnur.

¹⁰Ilai ra mot nem na lar o God? Ra mot watungi lena a taro na ususer det in mur a Warkurai anun o Moses, i elar nami ra mot pitar tar a maut torom det. A kum tumtubun dat tagun numugu ka det pet lar pasi sur det in muri, ma dat kai uniri awu.

¹¹Dat nurnur lena, din ulaun dat i kibino una marmaris anun anundat a Labino o Iesu, lenkutkai ra torom det.”

¹²A taro na kiwung rop det kis wowowon taru kut. Det longoro o Pol ma o Banabas, ra der wasiso una kum ukinalong ma a kum utna na ukisin der pami nama dekdekin o God epotor tan a taro ra awu sur a taro Juda.

¹³Ra der sa wasiso rop, o Jems i watungi lena, “A kum tistising, mot in longoro iau.

¹⁴O Saimon i sa inanos tar dat una mugano dino ra o God i maris det ra awu sur a taro Juda, ra i pilok pas ara taro tagun det sur det anun a taro ut.

¹⁵A utna ri o God i pami, i elar nama wasiso anun a kum poropet. Di sa tumus tari lena,

¹⁶‘Numur tano, an milet melet, ma an pam melet a rumu anun o Dewid, ra i sa terege. Ma an utur melet pas a rumu ra i toropo, ma an pam wakak meleti,

¹⁷sur a taro gisen kai, a taro ra awu sur a taro Juda, det in nukpukus torom a Labino, det ra a sa kabo pas det sur anung. A Labino i sa watung tari lenri, i ra i pam a kum utna ri ra numugu i sa upuaso tari.’

¹⁹“I mo ra a nuknuking i lenri, gong dat pitar a mamaut torom a taro ra awu sur a taro Juda, ra det tupukus torom o God.

²⁰Dat in tumtumus torom det, ma dat in inanos det lena, det in mur a kum warkurai kut lenri: Gong det wan tu utna ra di sa etabor taru nami torom a kum torotoro na god, uni a ngas na lotu lenri i udur a utna na inangon. Gong det pam a kum petutna na pamuk. Gong det wan tu utna ra ka di gos wakak a gap gusuni, ma tu wewegua ra di pos doko i kut ra a gap kura utmakai uni.

²¹Uni tagun numugu utmakai una kum tamon rop, di ser luk a Warkurai anun o Moses, ma di ser warawai nami una kum rumu na lotu una kum Bung na Sabat.”

²²A kum aposel, ma a kum mugumugu, ma a taro na lotu rop, det wasiso tomo pas sur det in pilok pas lako ru musano tagun det, sur det in nan tomo nam o Pol ma o Banabas utong o Antiok. Det pilok pas o Judas, ara risano kai o Basabas, ma o Sailas, aru mugumugu tagun det ra det tar tistisino una nurnur.

²³Ra det tumus tar a pas sur det in losi. A pas ra i watungi lenri: Met a kum aposel ma a kum mugumugu, met a kum tistisi mot, met tumtumus torom mot a kum tene nurnur tagun a taro ra awu sur a taro Juda ra mot kis tong o Antiok, ma una ru papor Siria ma o Silisia: A marmaris torom mot.

²⁴Met sa longoro tari lena ara taro tagun met, det ulokolokor mot ra det watungi lena mot in mur a kum Warkurai rop anun o Moses, ma det utalara a nuknuki mot nami. Awu sur met ra met tulu det.

²⁵Uniri met sa wasiso tomo pas, ma met rop met mulaot sur met in pilok pas lako ru musano, sur met in tulu der torom mot. Der in nan tomo nama ru wakak na paspasa met, o Banabas ma o Pol,

²⁶aru musano ra ka der maris bat anunder a nilaun una risan anundat a Labino o Iesu Karisito.