Aposel 14:9-17

⁹I longoro o Pol i wasiso. Ra o Pol i tamtama tokodos toromi, ma i tama i lena, a musano ra, i nurnur sur din ulangolango pasi.

¹⁰Ra o Pol i wasiso toromi namin labino walngano lena, “Un katutur.” Ra a musano ra, i katutur lakit mut, ra i wan.

¹¹A susut na taro det tama a utna ri o Pol i sa pam tari, ra det kukukuk nama wasiso Likonia lena, “Aru god der sa wan pirso elar nama ru mulusino torom dat!”

¹²Ra det nuki lena o Banabas a god Sus, ma o Pol a god Ermes, uni i a tene wasiso tander.

¹³A rumu na etabor anun o god Sus kura upiso milau una papor tamon ra. Ra a tene etabor torom o god Sus i ben pat a kum bulumakau utiro una matansako ina tamon, sur det in tuni elar nama etabor torom o Pol der nam o Banabas. Ma i los pasi kai a kum purpur ra di sa suk tari sur det in tabor der nami.

¹⁴Ikut, ra aru aposel der sa tasman pas asau ra a taro det nem na pami, der dat raros anunder a ramano kum malu, uni ka der gas nama sau ra det pami. Ra der kalabor potor tan a taro, ma der kukukuk lena,

¹⁵“A taro, sur asau ra mot pam a kum utna ri? Mir aru musano kut, mir elar kut kai lar mot! Mir wanpat kut nama Wakak na Wasiso torom mot, ma mir inanos mot sur mot in tupukus gusun a kum utna oros kut ri ra mot lotu torom det, sur mot in mur a God ra i laun. I ra, i ukis a bakut, a rakrakon bual, a tasi, ma a kum utna rop ubalandetul.

¹⁶Numugu utmakai, i madek tar a taro tagun a kum gapman rop sur det in laun elar nama nundet a nemnem.

¹⁷Ikut o God ke dumano mot, i ukis tar a kum utna sur mot in tasmani lena, i ut o God. Una nun a marmaris i tabor mot nama bato tagisapat una bakut, ma a kum duwai det wu una kalangin det ut. I tabor mot nama utna na inangon, ma i ubukus mot nama gasgas.”