Aposel 13:6-42

⁶Detul wan potor una kudulano ailan ra, tuk tong o Papos. Tiro iai, detul etorom nam ara te Juda, a risano o Barjisas, a tene sangsagor, ma a torotoro na poropet,

⁷i ara pasan o Sergius Paulus. Sergius Paulus i a mugumugu tagun a ailan ra, a tene mananos, ra i itula pas o Banabas ma o Sol, uni i nem na longoro a wasiso anun o God.

⁸Ikut o Barjisas, ra di watungi kai nam o Elimas, a kukuraino a tene sangsagor, i turbat der. I nemi sur in turbat ru a mugumugu sur gong i nurnur.

⁹Ra o Sol ra di watungi kai nam o Pol, i bukus nama Tokodos na Nion, i tama dekdek o Elimas,

¹⁰ma i watungi tano lena, “Ui a nutun o Satan, a ebar anun a kum tokodos na petutna rop. U bukus nama kum ngas na torotoro ma a kum usobor. U pukus liklik a tokodos na kisapi anun a Labino. Nangisin mo un mana gusun anum a petutna ra?

¹¹Uniutri a warkurai anun a Labino in rakon ui, in matam in pulu suano pasi, ma kon tama a talapor ina suan.” Uniutra a gawul ma a dumirum i wanpat toromi, ma i paraso tuptupukus sur taio ra in pam pas a lamano sur in beni.

¹²Ra a mugumugu i tama a utna ri i wanpat, i nurnur, uni i kisin una etowo una Labino.

¹³O Pol ma aru musano ra der wan tomo nami, detul kas una sip tagitiro o Papos, ra detul wan utong o Perga, una papor Pampilia. O Jon i wan pas gusun der tiro iai, ra i milet melet usapat o Jerusalem.

¹⁴O Pol ma o Banabas der katutur melet pas tagitong o Perga ra der wan utong o Antiok una papor Pisidia. Ma una Bung na Sabat der ruk una rumu na lotu anun a taro Juda, ra der kis tiro iai.

¹⁵Ra di sa luk tar a kum wasiso tagun a Buk na Warkurai anun o Moses, ma a kum wasiso anun a kum poropet, a kum mugumugu tagun a rumu na lotu det pitar a wasiso torom der lena, “Aru tistisi met, ra tu wasiso na ururagot kura sur mur in inanos a taro nami, mur in wasiso kut.”

¹⁶O Pol i katutur, ra i turbat det nama lamano sur det in kis wowowon, ra i watungi lena, “Mot a taro Israel, ma mot a taro gisen kai ra mot lotu torom o God, mot in longoro iau.

¹⁷A God anumet a taro Israel i pilok pas a kum tumtubu met ma i uburese tar det ra det kis tong o Ijip. Numur i ben pirso pas det tagitiro nama dekdekino.

¹⁸Una wat na noino kilalo ra det kis una nubual kalako taro uni, det rosumur gusuni, ikut i tamtamabat det.

¹⁹I um ru tar a taro tagun a wonom mawit na gapman ra det kis tong o Kenan, ra i pitar tar a piso Kenan sur anundet a taro Israel.

²⁰A kum utna rop ri di pami ubalan a wat na mar ma a limo na noino kilalo. “Numur o God i ubek tar a ramano kum tene warkurai sur det in mugu det, tuk una kilalo ra a poropet Samuel i mugu det.

²¹Numur det sasaring sur tu king, ra o God i pitar tar o Sol torom det, ma o Sol i mugu det a wat na noino kilalo. O Sol, a nutun o Kis, tagun a kabotaro Benjamin.

²²Ra o God i sa rakon ru tar o Sol, numur i ubek tar o Dewid bulung sur in king anundet. Ma i watungi uni lena, ‘A tama o Dewid a nutun o Jesi, i a musano ra i elar nama nuknuking, ra in pam rop a kum utna ra a nemi.’

²³“Tagun a kabotaro anun o Dewid, o God i pitar a Tene Ulaun, o Iesu, torom a taro Israel, elar nama nun a liliman.

²⁴Numugu tan a inawan pat anun o Iesu, o Jon a Tene Baptaiso i warawai torom a taro Israel rop sur det in nukpukus ma din baptaiso det.

²⁵Ra milau mo sur anun a pinapam in rop, i watungi lena, ‘Mot nuki lena iau osi? Iau awu sur o naro ra mot kis langlang suri, awu! Ikut, a musano ra, in mur tang. Ka elar sur an palos aru su gusun aru kikino, uni a natino doko tano.’

²⁶“A kum tistising, a kabotaro anun o Abaram, ma mot a taro gisen kai ra mot lotu torom o God, di sa pitar tar a wasiso torom dat lena o God i sa ulaun pas a taro.

²⁷A taro ra det kis sapat o Jerusalem, tomo nam anundet a kum mugumugu, ka det tama lele o Iesu, lena i a Tene Ulaun, ma ka det tasman a kum wasiso ra a kum poropet det sa tumus tari, ra di ser luki una kum Bung na Sabat. Ikut ra det mulaot tar o Iesu sur in mat, det pam sot pas a wasiso anun a kum poropet.

²⁸Ka det sio pas tu sakino ra o Iesu in iru uni, ikut det saring o Pailat sur in pitar tari sur din um doko i.

²⁹Ra det sa pam sot rop tar a kum wasiso ra di sa tumus tari uni, det palos pirso ru i gusun in nanai kutus, ma det inep tari una kulam na minat.

³⁰Ikut o God, i ukatutur melet pasi gusun a minat.

³¹Ma una susut na bung i wanan pat torom a taro ra numugu det ser wan tomo nami tagitong o Galili usapat o Jerusalem. Ra uniri, det wasiso puaso uni torom a taro Israel.

³²“Ra met inanos mot una Wakak na Wasiso lenri: A liliman ra o God i sa pitar tari torom a kum tumtubun dat tagun numugu,

³³uniri i sa pam sot pasi torom dat, ra i ukatutur melet pas o Iesu. Elar nami ra di sa tumus tari una manru na kelekele tagun a kum Kelekele lena, ‘Ui a Nutung, ma uniri a sa wanpat o Tamam.’

³⁴O God i sa ukatutur pas o Iesu gusun a minat, ma ken nan melet mo sur a minat ma ken mereseng. Elar nami ra o God i sa watung tari lena, ‘A wakak na utna ra a uliliman taru uni torom o Dewid, an udan mot nami. A utna ri in nanpat mulus ut.’

³⁵Ma i sa watung tari una ara Kelekele kai lena, ‘Kon madek tar anum a Tene Tasur sur in mereseng.’

³⁶“O Dewid i pam sot rop pas a nemnem anun o God una nun a kum bung na nilaun. Numur i mat, ra di pori tomo nama kum tumtubunu, ma a pinino i mereseng.

³⁷Ikut, o naro ra o God i ukatutur pasi gusun a minat, ke mereseng.

³⁸“I mo ra a kum tistising, a inanos mot sur mot in tasmani lena, un o Iesu, din unus ru anumot a kum sakino petutna. A Warkurai anun o Moses ken pet lar pasi sur in unus ru anumot a kum sakino petutna, sur din watung mot a kum tene tokodos.

³⁹Ikut, det rop ra det nurnur un o Iesu, din watung det a kum tene tokodos.

⁴⁰Mot in tumarong, sako a kum utna ra a kum poropet det sa wasiso taru uni in sot mo un mot. Det watungi lena,

⁴¹‘Tama i, mot a kum tene urongon un o God, mot in kisin ma mot in iru, uni an pam ara utna una numot a kum bung na nilaun. Ra taio in inanos mot una utna ra, ka mot in nurnur ut uni.’”

⁴²O Pol ma o Banabas der pirso gusun a rumu na lotu, ra a taro det saring der sur der in milet una Bung na Sabat sapat, sur der in wasiso melet torom det una kum utna ri.