Aisaia 11:1-16

¹Da:ibidi ea hina bagade fi da ifa amo da abi dagoi agoane ba:sa. Be amoda gaheabolo da ifa bai amoga heda:sa, amo defele, Amoda da Da:ibidi egaga fi amo ganodini ba:mu.

²Hina Gode Ea A:silibu Hadigidafa Gala da amo Amoda Ea dogo ganodini aligila sa:i esalebe ba:mu. Gode Ea A:silibu da dawa:su bagade amola ida:iwane gala Ema imunu. E da dunuma fada:i sia: amola gasa bagade hou imunusa: dawa:.

³E da Gode Ea hanai amo dawa:beba:le, hahawane hamomu. E da dabuagado hou ba:sea o dunu eno ilia sia:beba:le hame fofada:mu.

⁴Be moloidafa hou, amoga E da hame gagui dunu fidima:ne fofada:mu. E da sia:sea, dunu da se iasu ba:mu, amola wadela:i hamosu dunu da bogosu ba:mu.

⁵E da moloidafa hou, amola hou ida:iwane amoga Ea dunu ouligimu.

⁶Gasonasu wa:me (wufi) amola sibi ilia da hahawane olofole gilisili esalumu. Lebade da goudi mano amola gilisili diasa:imu. Bulamagau mano amola laione wa:me ea mano da gilisili ha:i manu, amola mano fonobahadi da ili ouligimu.

⁷Bulamagau amola bea ilia da gilisili ha:i manu. Amola ilia mano da gilisili olofole diasa:imu. Laione da bulamagau defele, gisi manu.

⁸Mano dudubu da gasonasu saya:be gadenene hedesea, se hame nabimu.

⁹Gode Ea sema goumi amo Saione amoga da wadela:mu liligi amola wadela:i hou hamedafa ba:mu. Amola hano wayabo bagade da hano amoga nabai gala, amo defele osobo bagade da Hina Gode Ema dawa:digisu hou amoga nabaiwane ba:mu.

¹⁰Amo esoga Yesi ea Difi da fifi asi gala dunu huluane ilima dawa:digima:ne olelesu hahamoi agoane ba:mu. Fifi asi gala dunu huluane da Ema gilisili, Ema nodosu imunu.

¹¹Amo esoga, Hina Gode da Ea gasaga, Ea fi mugululi asi dunu amo ga sogega esala, amo Asilia, Idibidi, Ba:dalosi, Giusi, Ila:me, Ba:bilone, Ha:ima:de, hano wayabo bagade bega: esala dunu amola hano wayabo bagade oga amo ganodini esala dunu, amo huluane E da Isala:ili sogega bu oule misunu.

¹²Hina Gode da fedege agoane, dawa:digisu eso gosa:gisu gaguia gadomu. Amoga E da fifi asi gala ilima amane olelemu. E da mugululi asi Isala:ili amola Yuda fi dunu amo osobo bagade bega: mugululi asi, amo bu gilisilala, amo ilima olelemu.

¹³Isala:ili fi da Yuda fi ilima bu hame mudamu amola Yuda fi da Isala:ili dunuma bu hame ha lamu.

¹⁴Ela da gilisili Filisidini dunu fi eso dabe la:ididili esala amoga doagala:mu, amola dunu fi ilia eso mabe la:idili esala amo ilia liligi suguli lamu. Ilia da Idome dunu fi amola Moua:be fi ili hasalimu. Amola A:mone fi dunu da ilima beda:iba:le, ilia sia: nabawane hamomu.

¹⁵Hina Gode da Suese Adobo hafoga:lesimu amola Iufala:idisi Hano hafogama:ne, e da gia:i bagade fo iasimu. Amasea, hano fonobahadi fesuale fawane ba:mu. Amola, dunu huluane ilia asabole degemusa: dawa:mu.

¹⁶Amola mugululi asi dunu Asilia soge ganodini mae bogole esala, amo da logo bagade ilia sogedafa bu masa:ne, logo dialebe ba:mu. Ilia musa: fi da Idibidi yolesi, hobeamu logo bagade ba:i. Amo defele ilia da ba:mu.