Afasoro 27:9-20

⁹Iyanu aneka eweka owainanaku aneebe sabu fare dauisi ibake iyanu moi aneka daabae irau me meramawere. I Godima Isaraera orou Idifiroma waure aneka banau uruna odo fosiiyari ibake boudiro aneka odo me. Eweka ma berei ibake Foruma danu imukekae eno wei, iya anifeisiie iyanu boudini iyanu eraerabusaini merama sifeisaro moi orou ofe arama ufiakuro nono moi orou iyae feanao sifeisiba iro da anifeisia wei.

¹¹Foruma eno weiro i ame kafudeni mima Forunu wake nauke dauike i boudi yowokeibisa orounu wake mane naui.

¹²Awoena oyauini obeobe fareka furoba ibake farakua iyanu boudi ibeka orofa ba me meramaya weisaro nono moibaima eno weisa, ekara ena ewa ena dawararo naisaroe Kuridi weaisa orofaro moi irauaiai boudi ibeka orofa, Finiki goiro mufeke iro ibife weisa.

¹³Iyama Rasia goiro ibeibisiro dai me oyaunaku farike nono irauaiai uiro emuama eno we imuisa, iyanu aneka odo idua farinua we imuisake emenu boudi anika ma youkaro Kuridi dawara bawa udiro anisi.

¹⁴Aneibisaro oyauini obeobe daiwere farike dawara naisaro boudi waure ani.

¹⁵Boudi ma owefine uiba nono ma owefisane uisabaie enaenari uke daui ibake meisaro oyauini obeobema boudi ma berairo ani.

¹⁶Aneebe aneebe ekara ena ewa ena dawararo naisaroe Kauda weaisa orofa derena enaro oisike ane iyanu ma youre eneibisi dinigi ma youkike boudi ubarenaro oisi.

¹⁷Boudi abanaro gaganao ufekuba ibake imuisike ara naa mukike ima i boudi uwane ma ara uisi. Eno uisiro i boudi yawokeibisa orouma eno weisa, Afirika orofa dawara bawaro ma berenao ufekuro aninao ufeisia eno weisake ia sinaada i dubo farai siaka wau mune ma youre isare aaka. Eno uisaro oyauini obeobema boudi ma berairo anisi.

¹⁸Aneibisiro wai uribaie ufe daiwere uyari ibake i boudiro ibisa orouma emenu moi eraerabusa mune dawararo siakaro isaka.

¹⁹Eno uisake aneebe nono moi odoro emenu eraerabusa yaisina mune siakaro dawararo isaka.

²⁰Eno uke oyauini obeobe idua odo keuwere fareibi ibake ewekaini manabeini muinaini ba me siniba ibake iyama eno we imuisi, iyae feafeisia eno we imuisi.