Acts 8:9-29

⁹Wenanare, nai au taona oroto tagogi i mae wavana Simon, ma tauna wariaḡa ava ana baravu i kaukauei ma mai Samaria i baibaiei. Ma i voepaepana-melei da tauna rava ḡaeḡaena.

¹⁰Rava labalababa, ma wavai naenaei anatapui ana babani i rarautaniḡana-kauei ma i ririwa, “Tauna, God ana rewapana e ḡoreḡorei, Rewapana Ḡaeḡaena.”

¹¹Taui i vineneḡanana-kauei aubaina mara nonoa taui Simon ana baravu i baebaei.

¹²Wate taui Philip i vitumaḡanei maranai, God ana vigulau Riwana Aiaina ma Iesu Keriso rava awari i raugugulei. Ma lamna aubaina nelara da waivine i nei da i babataito.

¹³Simon maiteni i vitumaḡana ma i babataito. Ma Philip mepa i nenae tauna kampa aubaina kaua babai ma mataira vivirewapanai i kaukauei. Tauna wei pulona i bana-kauei.

¹⁴Maranai Apasol au Jerusalem i nonori da mai Samaria, God Riwana i vitumaḡanei, taui Peter ma John i paritawanei awari.

¹⁵Ma auSamaria i ḡeta ma taui i raupariei da Arua Vivivireina ita rui au orai. Aubaina taui Iesu wavanei ava i babataito. Ma arua vivivireina eḡa ita rui.

¹⁷Peter ma John urai taui au tepai i terei ma i raupari da Arua Vivivireina au orai i rui.

¹⁸Maranai Simon i ʼnanai da mai Samaria Arua Vivivireina i vaia, maranai Apasol urai au kolai i terei, ma Simon mane i vilololoi,

¹⁹ma i vibaḡa i pa, “Tau maiteni nai rewapanana ma vereu da rava au kolai urau ana terei ma taui Arua Vivivireina ina vaia.”

²⁰Wate Peter i paribelei i pa, “Anina da God tam am mane maiteni ina tawanem ai au menamenana, aubaina tam e notanotai da God ana pulo manelei ma gimarai!

²¹Tam wei nolana au orana am gabu eḡa ita mamae, aubaina oram eḡa ita ai God au matana.

²²Am nota apoapoe ma votere-tawanei. Ma mae-tavirem Bada awarina ma ma vibaḡai da am nota apoapoe ina nota-tawanei.

²³Aubaina a inanaim da unura oram i oai tauai awariai ma wei notai apoapoei e panipanim.”

²⁴Simon marina Peter ma John i riwei, “Aubaiu Bada awarina ona raupari da aiwai o ririwei eḡa ina tupua awariu!”

²⁵Ma Peter ma John ai lawana ma Bada Riwana Aiaina ekalesia voui awari i raugugulei. Ma i raugugula nae Mai Samaria ai au taon nununai da i ḡeta au Jerusalem.

²⁶Mara tagogi Bada ana anela, Philip i riwei, “Ma vokaukaua ma ma nae au rauanaḡei, etanai au Jerusalem da e ḡaiḡaira au Gaza.” (Wei etanaina lamna au mutulua).

²⁷Anina ma Philip i vokaukaua ma i nae. Ma wei au etanaina oroto Ethiopiei i ʼnanai. Tauna mai Ethiopia ai kwin Kandake, ana mane taupainina. Wei orotona i nae au Jerusalem God viborumana aubaina,

²⁸ma i nenae-me ana au dobu. Ma ana au chariot i kiala ma wariaḡa peroveta Isaiah buka i girugirumia i ʼaiavi.

²⁹Ma Arua Vivivireina Philip i riwei, “Ma nae ma chariot au ririvana ma babara-nae.”