Acts 3:7-22

⁷Ma aram me kol e ba’ ni mat’aw i pa’ nge sak’iynag. Ka chingiyal’ nem me yib gelngin i ay fare mo’on nge ul ul ko rifrif u ay nruw raba’;

⁸me og ngalang nge sak’iy mi i yanyan; me un ngorow ngranod ngalan e Tempel ni be yan ma be og ngalang ma be pining e magaer ngak Got.

⁹Ma fapi girdi’ ni aram urngin e ra guyed ni be yan ma be pining e magaer ngak Got;

¹⁰ma fa’anra poyed ni ir fa’anem ni i par nga but’ u langan e garog ko Tempel ni “Garog ni Bfel’ Yaan” fithingan ngi i man ban’en, ma yad gubin nra gin gad ngak miyad ngat ngak ngarogon nike gol.

¹¹Ma nap’an ni be un fare mo’on ngak Peter nge John, ma urngin e girdi’ nra ngatgad miyad mil i yan ngorad ngalan e “Beranda rok Solomon,” ni aram fithingan e gin’em ko Tempel ni kanog.

¹²Ma fa’ani guy Peter fapi girdi’, me ga’ar ngorad, “Gimed e pi’in pumo’on nu Israel, mang ni kam gin gad ko ren’ey, ma mang ni kam lik’athgad ngomow? Gimed be finey ni gelngimow ara fenmow thothup e kug gol nigew e re mo’on ney ngay ke un ko yan?

¹³Fare Got rok Abraham, nge Isak, nge Jakob, ni ir e Got rok e pi chitamangidad e ke tayfan e tapigpig rok i Jesus. Gimed e mpi’ed nga pa’ e pi’in yad be yog e thin, mi gimed yog u p’eowchen Pilate ni dabumed Jesus, ni mus ko fa ngiyal’nem ni duwgiliy Pilate ni nge pag Jesus.

¹⁴I ir e be’ nib thothup ma bfel’, machane mogned ndabumed, mi gimed wenig ngak Pilate ni nge yan nga lanin’med nge pag be’ nike thang e pogofan.

¹⁵Ere kam thanged e pogofan rok e cha’ ni ir e tabolngin e yafos. Machane Got e ke faseg ko yam’ — ni gamad e mich ko re bugithin ney.

¹⁶Gelngin i fithingan e ke pi’ gelngin e re mo’on ney nib mugutgut. N’en ni kam guyed ma kam nanged e keyag u daken e pagan’ nga fithingan; pagan’ ngak Jesus e ir e ke golnag e cha’ney ni aray rogon u p’eowchemed ni gimed gubin.

¹⁷“Pi walageg, gu manang ni n’en ni mu rin’ed e pi’in nma yog e thin romed ngak Jesus e mu rin’ed ni bochan e da mu nanged e n’en ni gimed be rin’.

¹⁸Kab kakrom me weliy Got u l’ugun urngin e pi profet ni Messiah rok e dabisiy ni nge gafgow; me muruwliy nge yib i m’ug nib riyul’ ni aray rogon.

¹⁹Ere mu kolgad ngan’med mi gimed pi’ keru’med ko denen mi gimed cheal ngak Got, nge yag ni chuweg e denen romed. Fa’anra mu rin’ed ni aray rogon,

²⁰me yib ngal’an e gel gelngimed ni nge yib rok Somol, ma aram me yag ni pi’ Jesus nge yib ngomed, ni ir fare Messiah ni kem’ay i duwgiliy rok Got ni nge yib fan ngomed.

²¹Thangri par u lan e tharmiy nge yan i mada’ ko ngiyal’ ni nge thiliyeg Got urngin ban’en riy nge be’echnag, ni bod rogon nike weliy Got kakrom u l’ugun e pi profet rok nib thothup.

²²Ya Moses e ga’ar, ‘I Somol ni ir e Got romed e bayi l’oeg ba profet nge yib ngomed, ni bod rogon ni l’oegeg, ni bay yib u fithik’med. Ma thingar mu telmed nga urngin ban’en nra weliy ngomed.