Apostolo 3:7-22

⁷Lakea i nugua na limana kanena, i tuli pesia. I malaviriri kunana i vaga a vahana.

⁸A bakovi i beu i page rike, i vakatubu ni laho. I dili turane rua na roho na Vure, i laho, i page page, i kavurikea a Vure.

⁹Na tahuna e huriki ri masia i laho i kavurikea a Vure,

¹⁰ri matakilalea, a bakovi iea kunana i nongi bala a maki na poridala na roho na Vure ni gale a “Poridala Mata Kamumu.” Lakea ri ngapa, ri turutu vona a maki i bele vona.

¹¹Na tahuna a matasia iea i roe na limane Petrus e Ioanes, e huriki lobo ri turutu, ri nunu mai tou na talele tara na tabeke na roho na Vure, ni gale a “Talele ne Solomon.”

¹²Na tahuna e Petrus i matai ria, i ta maea, “Mua o huriki a bakovi o Israel, i navai mu turutu? I navai mu matanono maria? Naha ni luhoi miri koria na nitora ne maria, o na hini maria a bakovi kamumu.

¹³A Vure ne Abraham, ne Isak, ne Iakop, ne huriki a gare ne hita i vakabagetua a Vora vona, e Isu, a viri mu habia ne huriki a bakovi hale. E Pilato i ngaru ni vakaha ia, pali mua mu koi.

¹⁴E Isu i longo mai lobo a ningaru na Vure, ia a bakovi malamala hateka. Pali mua mu marikoi vona, mu takia e Pilato ge vakapagetalea a bakovi ni rabalaki a viri.

¹⁵E Isu ia a vuhuna nimahuri, pali mua mu rabalakia. Pali a Vure i vakamahuri mulea na matenga. Mia lobo mi masia.

¹⁶Mu lohoka vona a bakovi iea. Ngane mu masia i tavaga. A rane Isu i koria. Maria miri luhoi torea e Isu, lakea a bakovi iea i tavaga liu na matane mua lobo.

¹⁷“Ngane mua e huriki a turagu, a lohoka vona a narone mua turane huriki a matakari ne mua mu rata, a vuhuna i uka ma mu lohoka.

¹⁸Pali na limane mua a Vure i ratea i bele muholi a ngava i habi polo hosi ne huriki a propet, re Kristo ge bole a nimadihi, ge mate.

¹⁹I mavonga, mu pulo a vilone mua, mu lakea mai a Vure, lakea bara i ravunu vuroki a naro hale ne mua. Mu rata mavonga, e Bakovi Dagi bara i habi a nimalo ne mua,

²⁰bara i rudu valai tabua e Kristo, a Viri i vulakia ge korimule mua, re Isu.

²¹Ngane i made na hunu, i davea a parava a Vure i vulakia ge rata karaba tabu a maki lobo. I ta polo ne huriki a propet hosi, i ta muholi ge rata mavonga.

²²Hosi e Moses i ta maea, ‘E Bakovi Dagi, a Vure ne mua, muri ma ge rudu vilia ne mua a propet, ge manga iau. A propet iea, a Vure bara i vulaki talea ne mua. Mu longo mai a ngava lobo i taki mua vona.