Acts 1:9-24

⁹I babani vorovei ma au matai God Iesu i ḡaiei au mara. Ma apau i nei da i purui ma taui eḡa ita inana-melei.

¹⁰Ma taui i ḡoḡouta au mara ma nelara ruaḡa ai gara ararapoiri au ririvai i raumairiei.

¹¹Ma i riwa, “Mai Galili, aiwai weka o maimairiei ma o ḡoḡoutatei? Wei ravana menanarena o inanai i ḡaenei, amapo nanare ina nememei.”

¹²Anina ma Apasol Ola Olive, i voterei ma i ḡaira me au Jerusalem lamna eḡa uama ma au ḡereḡere.

¹³Ma au Jerusalem i ḡeta ma i ḡae numana i mamae lana au tepana au vatavatara. Taui ai wava, Peter, John, James ma Andrew, Philip ma Thomas, Batolomeo ma Matthew, James - Apius natuna, ma Simon tauna au naona Zealot ma Judas - James natuna.

¹⁴Ma wei ravai mara patapatana i vivitagogiei ma i raraupari gogona, waivine ḡelaui ma Iesu ana roaroa ma aloi Mary maiteni kampa.

¹⁵Wei au marana, tauvitumaḡana 120 i vitagogiei ma Peter i vomairi ma wenanare awari i babani,

¹⁶“Varevareiu, Judas Iskariot lamna turata tagogi ma maiteni ta nola gogona, wate muriai i voagu da Iesu i pani. Arua Vivivireina wei riwana wariaḡa gulau David i riwei da ina tupua; ma aiwai i ririwei anina nanare i tupua.”

¹⁸Judas Iesu i amverenei mane vainana aubaina, ma wei manenei doa i gimarai. Ma nai au doana tauna kolanei i peu ma manawana i wanawamai da amoamona i opu.

¹⁹Ma rava anatapui au Jerusalem wei iraḡena riwana i nonori, lamna aubaina taui nai dobuna ai ponei i viwavai Hakeldama, wei anona Tara Doana.

²⁰“Wariaḡa Gulau David i girugirumia, nanare i tupua, Ana animae ina kwakwava, ma eḡa aiai au orana ina mae. Ma

²¹Lamna aubaina marina awarita, rava ḡelauna tana vinei da ina raviepaiai. Tauna ravanana Iesu maiteni ta bababara-nae madeḡa tonuḡa au orana,

²²John rava i babataitoi au marana ma i nae da Iesu i ḡaiei au mara. Ma maiteni tana nola ma rava tana riwei menanarena God Iesu iraḡelei i vovaimairini.”

²³Ma taui rava ruaḡa i vinei, Joseph-Barsabas (ana wava ḡelauna Justus) ma Matthias.

²⁴Anina ma taui i raupari, “Bada tam rava anatapui orai u aramanei. Ma vieḡelai da wei ravai ruaḡa, ma metauna u vinei da Judas ana gabu ina vaia da ina viApasol, aubaina Judas i voterelai da i nae ana au gabu.”