Acts 19:11-40

¹¹Akngeyel-anem Paul renh rlterrkilek, ilek-ilek mpwaretyek.

¹²Arntetyel Paul-kenh arnkwa arnep-arnenty, ra kel mwerrirremarl. Artwa ra apek arrenty-akertarl aneyel, itnweng ikwer-they ywerremarl.

¹³Jew irrpety apmer ingwer-rnem-warl alhenh, arrenty-akert-rnem mwerril-ayntetyek. Jew-rnem arrkernelhek arrenty-akert-rnem mwerriletyek Jesus-kenh itna itnewemel. Rernem itnweng apmwernem alakenh ilek, Jesus ikwerenh itnangkwarr. Paul-el ingwer-rnem akalty-anthek angka Jesus-akert. “Itna ikwerenhel-antey atha arrenhantherr ilem tyerrelhetyek.”

¹⁴Jew-rnem-kenh atyetyart tyaty-areny anyent anenh, itnan ikwerenh Sceva. Artwa 7 alerikw ikwerenh-rnem. Artwa 7-pel renh-rnem irrkaty-angkwarr arrkernelhek, Jesus-kenh itnel itnweng apmwernem irrentetyek rlterrk ikwerenh-akertel.

¹⁵Arrenty-akert angkenh, “Athan Jesus-then Paul-then iterl-areyelarl. Angwenharl arrantherr?”

¹⁶Ikwer-penhan arrenty-akert-rnemel artwa 7-pel renh-rnem atwek. Artwa 7-pel warl-they tyerrelhemel aterel anterrek, arrkngwentemel anterrek, arnkweweny.

¹⁷Ephesus-areny-rnemel awek-penh Jew-rnem-then Greece-areny-rnem-then rernem-anem aterirrek ikwer-rnem-kety. Rernem Ingkart Jesus renh tnakek.

¹⁸Ikwer-penhan Jesus-arl apenteyel ingwer-rnem ilelhek rernemarl apmwangkwarr apentenh.

¹⁹Jesus-arl apenteyel ingwer-rnem ilelhek, “Anwernantherr arwengkeltharl mpwarenh.” Rernem pip arwengkelth-akert akngetyek, rernem-anem ingkerrenhel-anem rwel arrtyek. Akngerr ingwer-rnemel arek. Pip arrwekel rernem man akngerrelarl payemelek.

²⁰Jesus-arl apenteyel ingwerel-rnem-anem akngerr ingwer-rnem akalty-anthek, Akngey-kenh rlterrk-akertel angka arlpimp-anem ilek, angka ingwerek-ingwer-warl.

²¹Ikwer-penh Paul iterrek Jerusalem-warl alhetyek apmer Macedonia-angkwarr Achaia-angkwarr. Ranem angkek, “Jerusalem-they atha apmer aretyek, Rome tawen.”

²²Paul-el Timothy-then Erastus-then Macedonia-warl arrwekel thwenek, ra apmer Asia-itwek anenh-kety.

²³Ephesus tawen-itwek rernem ilterrek, atwerretyek irrek, Jesus-kenh angkethey.

²⁴Artwa thilp mpwarey-angker tawen ikwer-itwek anenh, itnan ikwerenh Demetrius. Ra tyaty akely thilp-penh mpwarenh. Artemis-kenh tyaty-apeny altyerr-arrpantey-kenh, rernem iylpangk-ayntetyek, ikwer inkwerelhemel, kwenirremel, alkenh-arrpantey Ra tharlemilek man akngerrek, artwa ingwerel-rnem-then.

²⁵Demetrius ranem artwernem anyentilemel ilek, “Artwernemay, arrantherr akalty anwantherr man ilkwa ineyel warl renh-rnem tharlemilenty.

²⁶Arrantherr apek awek Paul-elarl ingwer-rnem ilpertilek apmer Asia-itwek, nhel Ephesus tawen-itwek-then. Ra renh-rnem ilek, ‘Artwa ra altyerr mpwaretyek arrangkw. Altyerr-arrpantey iltyelarl mpwarekarl arrangkwarl, inngewenyarl, arrangkwarl.’

²⁷Paul-elarl akalty-antheyel-rnem rernem anwekantherr irrpeltherreyenh apmwangkwarr. Aray, lyert-anem apmer Asia-areny-rnem apmer arrpanenh-itwek rernem Artemis ikwer inkwerelheyel.” Paul-el renh-rnem ilek, “Artemis Akngey-wenyarl inngewenyarl, arrangkwarl.”

²⁸Awekarl-penhan artwa ingwer-rnem ahelirrek. Rernem arlkek, “Artemis Ephesus-areny-rnem-kenh Akngey innga aneyenh.”

²⁹Ingkerrenh-anem tawen ikwerel-anem ilterrek. Gaius Aristarchus-atherr anterrkwek aketh-itwek anyentilek. Gaius-atherr Macedonia-areny-atherr Paul-angkwarr ilkwatherr alhek apmer-they.

³⁰Paul-anem ilkelhek ikwer-rnem-warl alhetyek ikwer-rnem-warl angketyek. Kwertengerl-rnem ikwer arrkngert angkek,

³¹Apmer-areny artwamp irrpety Paul-kenh-anem anenh. Rernem ikwer-warl angka thwenek ikwer arrkngert angketyek, akngerr-kety, atwekerr.

³²Ephesus-areny-rnem akarrirrek, angkerretyek. Rernem-anem apatemel arlkek.

³³Jew-rnemel Alexander arrwekel-warl rnkernek, arrwekel-ampeny-itwek rtnetyek akngerr-itwek. Ingwer-rnem aleth-antey arlkenh, “Artemis Ephesus-areny-kenh altyerr inngan.” Alexander ikwer-rnem angkek akaterirretyek, ra ikwer-rnem-warl angketyek.

³⁴Ingwer-rnemel renh alhengk-arek ra Jew anenharl. Rernem aleth-antey ikwer arlkenh, “Artemis Ephesus-areny-kenh altyerr!”

³⁵Ikwer-penhan tawen-areny atyetyartel-anem akngerr akatelhilek, “Artwa Ephesus-areny-rnemay! Anantherr ingkerrenh akalty Artemis-kenh tyaty arraty arntarnt-areyel. Anantherr apwert aknganenty ikwerenh alker-theyarl aytnek arraty arntarnt-aretyek. Paul arlkarirrek, rernem altyerr anyent ikwerenh apentetyek, rernemarl arnwarnek.

³⁶Nhenh innga aneyel, arrantherr arternp awelhetyek, arrkngert angkey-angenh.

³⁷Arrantherr artwa yanh-rnem apalel anterrkwemel atnwenhey-alhek nhenh-warl. Rernem arrangkwarl, Rernem arlarl ampwal ilenhek, Artemis ikwer irrpelthirrey-angenharl. Rernem man anyelkel iney-angenh tyaty ilenh-rnem-they.

³⁸Demetrius thilp mpwarey-angker artwa rernem renh-rnem ayntarrp-iletyek. Artwa court-areny kel aneyel, rernem ikwer ilelhetyek. Rernem renh-rnem court-warl atnwenhey-alhemer, court-itwek ayntarrp-ilemel iletyek.

³⁹Angka ingwer arrantherr iterl-areyel kel arrantherr arratyilerretyek.

⁴⁰Roman kapmentel ikwer-penh aweyenh anwantherr angkewarl irreyenh anwantherr apalel arlkek-penh.”