Acts 11:6-23

⁶Au orana a inana lamna ḡamoḡamo maramaraḡamai ma moduei, tetetei me mota ma kiu au aidamo lavelavei.

⁷Ma pona a nonori i pa, “Peter ma vomairi, ma viraḡena ma ma am!”

⁸Tau a paribelei, “Eḡa! Lamna eḡa melanai ana kauei. Eḡa melanai lam viviḡana ata am-dadani.”

⁹Wate pona marei mara viruaina i babani, “Aiwai purapurana God i riwa da i ai, tam eḡa ma riwa da i apoapoe.”

¹⁰Mara tonuḡa wenanare i tupua, ma puruna i ḡaiana-melei au mara.

¹¹Nai maranaina mai Caesarea ai rava tonuḡa i paripari-tawaneiai, au metaeta i raumairiei.

¹²Ma Arua Vivivireina i riweu da eḡa aiwai ana notai ma orau taputapunei ana nae. Mai Joppa tauvitumaḡana 6 maiteni a nae ma ravana ana au numa a rui.

¹³Cornelius i riwelai da anela awarina i eḡa, ma i riwei, “Rava ma paritawanei au Joppa da rava wavana Simon Peter ina neiai.”

¹⁴Tauna wei riwana ina neiai ma lamnei tam ma am numa ravai maiteni ina vilawanimi.

¹⁵Ma babani a raukarei ma Arua Vivivireina i ḡairai da taui i vioai me au naona awarita i tupua nanare.

¹⁶Anina ma Iesu aiwai i ririwei a notai, “John wairei i babataito, wate taumi Arua Vivivireinei ina babataitoimi.”

¹⁷Inanana au aiaina da God Jentail pulona tagogina i verei, me tauta i verevereta maranai Iesu Keriso ta vitumaḡanei, ma tau aiai da God ata viḡaei?

¹⁸Taui i vigamopotai maranai wei i nonori, ma God i viborumei i pa, “Riwa kaua da God Jentail maiteni i vianinei da ina rupena ma ina lawana.”

¹⁹Ekalesia ḡelaui rau-iviapoapoe i rovoei maranai Stephen i viraḡeni ma i vilamonei au uama. Ḡelaui i ruba nae au Phonisia, au Saipras ma Antiok, ma kampa Iesu Riwana Aiaina i raugugulei mai Jew ava awarii.

²⁰Wate ekalesia ḡelaui mai Saipras ma mai Sairini i nae au Antiok Jentail awarii ma Iesu Riwana Aiaina i raugugulei.

²¹Bada ana rewapana taui au orai i mae ma Jentail maḡamaḡaui i vitumaḡana ma i mae-tavirei Bada awarina.

²²Wei riwana i ḡeta ekalesia awarii au Jerusalem, ma taui Barnabas i paritawanei au Antiok.

²³Maranai i ḡeta ma i ʼnanai da God ravai i viaiaina-kauei, tauna i vinuaiai ma i egari da Bada awarina ina vipatutu orai taputapunei. Barnabas tauna rava aiaina, Arua Vivivireina orana i oai ma ana tumaḡana i rata, ma God ana aguiei, i rauguga ma rava maḡamaḡaui i taini Bada awarina.