Acts 10:17-47

¹⁷Ma Peter aiwai i ʼnainanai anona i vinua-notenotei, nanare ma Cornelius nelara i paripari-tawanei, taui Simon ana numa i nelaḡai ma i ḡeta ana au metaeta.

¹⁸Taui i paridadana, “Weka rava wavana Simon-Peter e mamae bo eḡa?”

¹⁹Peter amapo da wei i vivinua-notenotei maranai Arua vivivireina i riwa, “Simon, nelara tonuḡa e baibaiem!

²⁰Lamna aubaina ma vomairi ma ma ḡaira au gabaura, eḡa ma geduai, aubaina tau a paritawanei awarim.”

²¹Peter i ḡaira ma awarii i riwa, “Taumi tau o baibaieu bo, Ami ḡoana aiwai?”

²²Ma nelarai i paribelei, “Tauai Cornelius mai Rome ai sorodia ai bada i paritawanelai, tauna rava jijimanina ma God tauvoepaepana, ma mai Jew maḡamaḡaui tauna e vivivirei. Anela vivivireina i riwei da uta nei ana au numa da aiwai u araramanei uta riwei.”

²³Ma Peter nelarai i ḡorei da i rui au numa ma kampa i matave. Ma maratomna anatapui i nae, Tauvitumaḡana ḡelaui au Joppa maiteni i vomairi.

²⁴Ma au pom ḡelauna taui au Caesarea i ḡeta. Cornelius taui i paipaini, ma ana numa ravai ma ana rava i ḡorei da i nei.

²⁵Ma maranai Peter i ruirui au numa, Cornelius Peter i ʼnanai ma i mae-ḡaira au ae karena ma ana vivirana i raudune.

²⁶Wate Peter tauna i voepai ma i riwa, “Ma vomairi, Tau rava ota me tam.”

²⁷Peter ma Cornelius i bababani ma i ruirui au numa. Ma i ʼnanai da patara tauna i paipaini.

²⁸Peter taui i riwei, “Taumi o aramana-kauei da tauta mai Jew ata tarawatu e viviḡaeta da Jentail maiteni tana mae-gogona bo tana raugenari. Wate God i viatataieu da eḡa rava ana ḡorei rava apoapoena bo miramirana.

²⁹Lamna aubaina maranai u vibaḡaiu da ata nei, Tau au nota aiainei a nei. Tau ata pari-dadanem, Marina ma riweu aiwai aubaina au riwa u paritawanei?”

³⁰Cornelius i paribelei, “Au benai wenanare au pom 4 marina i kwa, au numa a raraupari, nanare ma rava ana gara ararapoirina ma namanamarina au naoiu i raumairiei.

³¹Ma i riwa, ‘Cornelius! God am pari i nonori ma am verena molamolakai awarii i vinuaiaiei!

³²Ma nelara ma paritawanei au Joppa da Simon e ḡoreḡorei Peter awarina. Tauna Simon, ḡamoḡamo opina taurauḡaroḡaroena ana au numa e mamae.’

³³Lamna aubaina da am riwa laḡilaḡina ava a paritawanei, ma i ai da tam u nei. Tauai anatapuiai marina weka God au matana a vivipaipai da Bada aiwai i riwem ana nonori.”

³⁴Ma Peter babani i raukarei, “Marina a inana-kauei da God rava anatapui e vaivaia da tagogina.

³⁵Wate dobu dobuai ravai God e vivivirei ma kaua aiaii e kaukauei, Tauna wei ravai e ḡoeḡoei,

³⁶Taumi o aramanei God Riwana Aiaina i paritawanei mai Israel awarii da rava ina mae-kaua God maiteni, maranai Iesu Keriso ina vitumaḡanei ma tauna ai lawana ina vibadei.

³⁷Taumi o aramanei Iesu aiwai i kauei Judea au anatapuna, au Galili i vikarei maranai John babataito ai kaua i raugugulei.

³⁸God Arua Vivivireina ma rewapana Iesu Nasaretei i verei da dobu maḡamaḡaui i naeni ma kaua aiaii i kaukauei, ma rava au orai arua apoapoe i ruiruini, i vilawani.

³⁹—Aiwai anatapuna au Judah provins ma au Jerusalem i kaukauei tauai anatapuiai a vimatematei ma a bababaniei. Tauna au korosi i tutui da iʼraḡe.

⁴⁰Wate God tauna iraḡelei i voepa-melei aupom au vitonuina ma i kauei da ḡelauai awariai i eḡa.

⁴¹Eḡa rava maḡamaḡaui tauna ita inanai, anina tauvimatamata i vinevinei awari ava i ḡeta. Lamna tauai maiteni a uma ma am ana vomairi au murina.

⁴²Ma i egariai da dobu au anatapuna ana raugugula ma ana jima da God Iesu i vinei da rava anatapui lawalawaii ma irairaḡei ina rauetarei.

⁴³Peroveta anatapui i jimei da maranai rava Iesu i vitumaḡanei, Tauna wavinei God taui ai ḡoʼapoapoe ina vaitawanei.”

⁴⁴Maranai Peter i bababani ma Arua Vivivireina i ḡairai ma rava i raurautaniḡana i vioai.

⁴⁵Ma mai Jew Joppei i nenei Peter maiteni, i ba kaua maranai God Arua Vivivireina i paritawana ḡairei Jentail awarii.

⁴⁶Au baina mai Jew i nonori taui pona tapunei i bababani ma God i vivimae-ḡaeḡaeni. Anina ma Peter i riwa,

⁴⁷“Taui Arua Vivivireina i vaia me tauta. Wei lamna aubaina eḡa aiai ina viḡaeta da wei ravai tana babataitoi.”