A Kakailai I Lia 5:1-7

¹Iau pot ta kaugu uma, taigu, kaugu taulai kalama; Iau tar ilipe kaugu bira na davai ma kaugu balsam; Iau tar mome kaugu polo na vuai na vain ma kaugu polo na u. Avat a ian, a umana talaigu, Avat a momo, maikir, avat a mome ta ngala, a umana vakak.

²Iau ga va mat, ma ra balagu i ga tavangun; Ia ra nilai kaugu vakak ba i pipidil, ma i biti: Una papa are iau, taigu, kaugu valilingina, kaugu nat na uka, kaugu viviliai, Tago ra pepe na ulugu i pupuk ma ra mavoko, Ra ulugu i buibui ma ra vual na marum.

³Iau ga tar vorodo vue kaugu olovoi, ta ra ava ina ule mule? Iau ga tar puk ra ura kaugu, ta ra ava ina vadur mule dir?

⁴Kaugu vakak i ga varuk ra limana ta ra liplip na ubene marave ra matakilalat, Ma ra balagu i ga dadadar upi ia.

⁵Iau ga tut pi ina papa are pa kaugu vakak; A ura limagu dir ga tua ma ra bira na davai, Ma ra umana kaka na limagu ma ra bira na davai i polo, Ari iau ga vatur ra alal bat ai ra matakilalat.

⁶Iau ga papa are pa kaugu vakak, Ma kaugu vakak pa i ga ki, i ga tar vana. A balagu i ga mamat ba i ga tata. Iau ga tikan upi ia, ma pa iau ga tikan tadav ia; Iau ga oro upi ia, ma pa i ga bali iau.

⁷Ra umana monamono, nina dia vana vurvurbit ta ra pia na pal, dia ga tadav iau. Dia ga kita iau, dia ga vakinkin iau; Ra umana tena balabalaure ta ra liplip na vat dia ga ra pa kaugu mal na tubatuba.