1Pun sia silei, pwe lupwen imwach imwen siamü sia nom lon, wewen inisich won ei fanüfan, epwe tala, mi wor imwach me ren Kot, imwach imwen wilipos mi nom läng tori feilfeilachök, esap förien aramas.
2Nge iei sia ngüngü lon ach pwos, pun sia mochen pwe sipwe tolong lon imwach mi nom läng.
3Pun lupwen sia tolong lon, esap pwäla selelan ngünüch.
4Iwe, lupwen sia nom lon imwach imwen siamü, sia ngüngü fän ach weires. Esap wewen pwe sia mochen towu seni inisich me fanüfan, nge sia mochen pwe inisich me läng epwe pwilipwil woch, pwe mine a mämmä epwe wili ngeni manau.
5Iwe, Kot ewe mi amolakich ngeni ei sokun siwil, i a ngenikich Ngünün pwe allükülükün mettoch meinisin a amolätä fän itach.
6Iei mine fansoun meinisin sia fokun apilükülük o silei, pwe lupwen sia nom lon inisich me fanüfan, sia toau seni lenien ach Samol.
7Pun sia manau lon lükülük, nge sap lon met sia küna.
8Sia fokun apilükülüköch o sia fokun mochen ach sipwe towu seni inisich o feila pwe sipwe nom ren ach Samol.
9Iei mine sia fokun mochen apwapwai i, ese lifilifil ika sia nom lon inisich me ikei, ika lon inisich me läng.
10Pun kich meinisin sipwe ütä me mwen Kraist, pwe i epwe apwüngükich. Eman me eman epwe angei en me liwinin an föför a föri lon manauan, liwinin föför mürina, ika liwinin föför mi ngau.
11Äm aia silei usun ach niuokusiti ach Samol, iei mine aia sotuni le pese ngeni aramas ar repwe etiwa ewe Pworausen Manau. Kot a wesewesen silekem, nge ngang üa apilükülüköch pwe ämi oua pwal sileei lon letipemi.
12Äm aisap mochen sotunisefäli le allükülükü püsin äm ngenikemi, nge aia mochen ngenikemi och popun mi mürina pwe oupwe sikäsinikem, pwe oupwe tongeni pölüeni chokewe mi sikesik won met ra küna ren lapalapen eman aramas me lükün, nge esap met a nom lon letipan.
13Oua ekieki pwe äm mi umwes? Ika äm mi umwes, iwe, epwe fänäsengesin Kot. Nge pwüngün pwe aia mirit. Ren ei oua küna feiöch.
14Sia nom fän nemenien än Kraist we chen ngenikich, pun sia silei pwe eman aramas a mäla fän iten aramas meinisin, iei mine ir meinisin ra eti lon an mäla.
15A mäla fän iten aramas meinisin, pwe chokewe mi manau resap chüen manau fän püsin iter, nge repwe chök manau fän iten ewe mi mäla o manausefäl fän iter.
16Seni ei fansoun sisap chüen ekieki och mettoch usun eman aramas lon pekin fituk. Inamwo ika sia ekieki usun Kraist lon pekin fituk me mwan, nge iei sisap chüen ekieki usun ei.
17Iei mine are eman a nonom lon Kraist, i eman förien Kot mi fö. Ewe manauen lom a wes, nge eu manau mi fö a fis.
18Ekei mettoch meinisin ra pop seni Kot, i ewe mi achäfengenikich me i ren Kraist o ngenikich ewe angangen achächä.
19Iei masouen ach afalafal, pwe Kot a nonom lon Kraist o achäsefäli chon fanüfan ngeni püsin i. Esap chüen chechemeni ar tipis, pwe a awisakich pwe sipwe afalafala ewe kapasen achächä.
20Iei mine äm aia chon arong fän iten Kraist usun itä nge Kot a nöünöü äm le tüngor ngenikemi. Äm aia tüngormau ngenikemi fän iten Kraist: Oupwe chäfengen me Kot.
21Kraist esap wor an tipis, nge fän itach Kot a föri pwe i a tipisini tipisich, pwe kich sipwe küna pwüngün Kot lon i.
