2. Korint 4

1

2

3

4

5

6

7

8

9

10

11

12

13

¹Iwe, pokiten än Kot tong a atolongakem lon ei angang, iei mine aisap apilükingau.

²Nge aia pöütala ekewe föför meinisin mi monomon me ekewe föför mi asäw. Aisap föri föförün atuputup, aisap pwal amwäli än Kot kapas. Nge aia pwärätä mine a let mwen mesen Kot o sotuni äm aipwe aitöchükem ngeni ekiekin aramas meinisin.

³Pun are ewe Pworausen Manau äm aia afalafala a monomonola, a chök monomonola ngeni chokewe mi pöütmwälila.

⁴Ewe koten ei fanüfan a achuna ekiekin letipen chokewe resap lükü, pwe resap tongeni küna saramen ewe Pworausen Manau usun ewe lingen Kraist, i ewe mi lapalapeni lapalapen Kot.

⁵Pun aisap afalafal usun püsin äm, nge aia afalafal usun Jesus Kraist, pwe i Samol, nge aia nöümi chon angang fän iten Kraist.

⁶Pun Kot, ewe mi apasa, “Saram epwe tinewu seni lon rochopwak”, i chök ewe Kot mi asarama letipem o ngenikem ewe saram, pwe aipwe silei usun än Kot we ling mi pwä won mesen Kraist.

⁷Nge a wor rem ei feiöch mi aüchea lon sepi mi för seni pwül, pwe epwe pwä pwe ei tufich mi somwola a pop seni Kot, nge esap pop senikem.

⁸Fän chomong aia küna riaföü, nge aisap fangatä. Fän ekoch aia tipemwaramwar, nge aisap apilükingau.

⁹Aia küna ninni, nge aisap küna tamepich, aia kufula, nge aisap feiengau.

¹⁰Fansoun meinisin aia uwoufeili än Jesus mäla lon inisim, pwe än Jesus manau epwe pwal pwä lon inisim.

¹¹Pun lon unusen manauem aia nonom lon feiengauen mäla fansoun meinisin fän iten Jesus, pwe manauen Jesus epwe pwä lon inisim inisin mäla.

¹²Iei usun mäla a angang lom, nge manau a angang lomi.

¹³A mak lon ekewe Toropwe mi Pin, “Üa lükü, iei mine üa kapas.” Ren ena chök ngünün lükülük äm aia pwal lükü, iei mine aia kapas.

¹⁴Äm aia silei, pwe Kot ewe mi amanauasefäli ach Samol Jesus, epwe pwal amanauasefälikem fiti Jesus o uweikeemila me ämi mwen mesan.

¹⁵Ekei mettoch meinisin ra fis ngenikem fän itemi, pwe än Kot ümöümöch mi tori chomong, chomong aramas epwe afisätä ar iotekin kilisou mi urourela, pwe Kot epwe ling ren.

¹⁶Iei mine sisap apilükingau. Inamwo ika inisich a apwangapwangala o mäla, nge manauen ngünüch a söföla rän me rän.

¹⁷A müchükai ach riaföü, a pwal pal, nge epwe atoto ngenikich eu watten ling esemüch a fokun lapalap seni ekei riaföü.

¹⁸Pun sisap afota mesach won ekewe mettoch sia tongeni küna, nge sia afota mesach won ekewe mettoch sisap tongeni küna. Pun ekewe mettoch sia tongeni küna repwe müchüla, nge ekewe mettoch sisap tongeni küna repwe nonom tori feilfeilachök.