2. Korint 3

1

2

3

4

5

6

7

8

9

10

11

12

13

¹Ifa usun, oua ekieki pwe aia püsin sikäsinikem? Ika epwe lomot ngenikem äm aipwe uwala remi ika tüngor senikemi toropwen allükülük usun ekoch ra föri?

²Püsin ämi nöüm toropwen allükülük, a mak won letipem, pwe aramas repwe tongeni silei o aleani.

³A fat pwe püsin Kraist a makkei ei toropwe o tinato rech. Esap mak ren ink, nge ren Ngünün ewe Kot mi manau, esap mak won fau mi chöpöp, nge a mak won letipen aramas.

⁴Aia apasa ei, pun a wor äm apilükülük won Kot ren Kraist.

⁵Esap wor och rem äm aipwe tongeni apasa, pwe a wor äm lipwäköch le föri ei angang, pwe äm lipwäköch a pop seni Kot.

⁶I ewe mi alipwäköchükem äm aipwe chon angang ngeni ewe pwon mi fö. Ei pwon esap fis ren allük mi mak, nge a fis ren Ngünmifel, pun ewe allük mi mak a afisätä mäla, nge ewe Ngünmifel a ngenikich manau.

⁷Ekewe Allük ra rup ren mesen mak won ekewe fau mi chöpöp o än Kot ling a pwä lupwen a tori aramas. Inamwo ika saramaramen won mesen Moses a kisikisila, nge a fokun saram pwe ekewe chon Israel resap tongeni nenengeni won mesan. Ika ekewe Allük mi afisätä mäla ra toriir lon ena sokun ling,

⁸epwe fen ifan me watten ewe ling lon angangen ewe Ngünmifel?

⁹Are ewe angang mi atoto liwiningau ngeni aramas a ling, epwe fen ifan me watten ewe ling mi atoto ach pwüng?

¹⁰Pun mine a ling me lom, esap chüen ling ikenai, are sia awewe ngeni ewe ling mi fokun lapalap.

¹¹Are a wor ling lon ewe pwonen lom mi chök nom ekis chök fansoun, epwe fen ifan me watten ewe ling lon ewe pwon mi fö mi nonom tori feilfeilachök!

¹²Pokiten mi wor rem ei sokun apilükülük, äm aia pwora le kapas.

¹³Aisap wewe ngeni Moses mi pwölüela won mesan ren echö mangaku, pwe ekewe chon Israel resap tongeni küna pwe ewe ling a kisikisila o wesila.

¹⁴Nge letiper a kopüngüla, tori ikenai ekiekin letiper a pwölüla ren ewe chök pwölüpwöl, lupwen ra aleani ekewe puken ewe pwonen lom. Ewe pwölüpwöl a särifila ren Kraist chök.

¹⁵Tori mwo nge ikenai, iteiten fansoun ar aleani än Moses kewe Allük, ewe pwölüpwöl a chüen pwölüela ekiekin letiper.

¹⁶Nge ewe pwölüpwöl a särifila, lupwen eman aramas a kul ngeni ach Samol.

¹⁷Iwe, ach Samol, i ewe Ngün, nge ia Ngünün ach Samol a nom ie, ikenan a wor ngasala.

¹⁸Nge kich meinisin esap pwölüpwöl won mesach, sia nenengeni lingen ach Samol o lingela ren. A awilikich ngeni eu ling tori pwal eu ling, tori sipwe fokun wewe ngeni i lon ususun. Ei a pop seni ach Samol, i ewe Ngünmifel.