2 ጴፂሮሳ ኪታ 3

1

2

3

¹ታ ሲቃቶ፥ ሃዌ ታኒ ሂንቴንቶ ፃፌዳ ላዔንꬆ ዳቢዳቢያ፤ ታኒ ሄ ላዑ ዳቢዳባቱዋካ ሂንቴ ሱሬ ቆፋ ቆፓናዳን ዴንꬄꬃናው ሂንቴና ሃሳዪሳናዳን ፃፋዲ።

²ጌሻ ጊዴዳ ናባቱ ቤኒ ኦዴዳ ቃላ ሂንቴ ሃሳያና ማላኔ ጎዳይ ሂንቴና ኣሺያዌ፥ ባሬ ኪቴዳዋንቱ ባጋና ሂንቴና ኣዛዜዳ ኣዛዙዋ ሂንቴ ሃሳያና ማላ ኮያይ።

³ዎዲያ ዉርሴꬃን፥ ኣሳ ቶቺያ ባሬንቱ ኣሙዋዳን ዴዒያዋንቱ ኣሳ ቶቺዴ ዴንዳናዋ ኡባፔ ካሴቲዴ ኤሪቴ።

⁴ኡንቱንቱ፥ «ኢ ‹ያና› ያጌዳ። ጊቤኔ? ያቲና ሃቃን ዴዒ? ኣዪሲ ጎፔ፥ ኑ ኣዎቱ ሃዪቂ ዲጌዲኖ፤ ሺን ኡባባይካ ሳዓይ ሜꬌቶዴፔ ዶሚዴ ዴዒያዋዳንካ ዴዔ» ያጋና።

⁵ዳሮ ዎዲያፔ ካሴ ፆሳይ ሃሳዪና፥ ሳሉኔ ሳዓይ ሜꬌቴዳዋ ኤሪዴ፥ ኡንቱንቱ ኣኬኬናን ኢፄዲኖ። ሳዓይ ሃꬃፔኔ ሃꬃን ሜꬌቴዳ።

⁶ቃሲ ሄዋ ጋሱዋን፥ ሄ ዎዴ ዴዒያ ሳዓይ ሄ ሃꬃን ሚቴቲ ꬋዬዳ።

⁷ሺን ሃዒ ዴዒያ ሳሉኔ ሳዓይ፥ ፆሳው ጎዪኔና ኣሳቱ ፒርዴቲያ ጋላሳይኔ ꬋዪያ ጋላሳይ ጋካናው ታኪዴ፥ ሄ ቃላን ታማ ናጊኖ።

⁸ሺን ታ ሲቃቶ፥ ሃ ኢቲ ዬዋቶ ዶጎፒቴ፤ ጎዳ ማታን፥ ኢቲ ጋላሳይ ሻዓ ላይꬃ ማላ ጊዲያዋኔ፥ ቃሲ ሻዓ ላይꬃይ ኢቲ ጋላሳ ማላ ጊዲያዋ ዶጎፒቴ።

⁹ኢቱ ኢቱ ቆፒያዋዳን፥ ጎዳይ ባሬ ኦꬃና ጌዳዋ ኦꬃናው ታኬና፤ ሺን ኦኒኔ ባሬ ናጋራፔ ሲማናዳን ኮዬፔ ኣቲን፥ ኦኒኔ ꬋያና ማላ ኮዬና ዲራው፥ ሂንቴሲ ጊዴ ዳንዳያን ጋምዔ።

¹⁰ሺን ጎዳ ጋላሳይ ካዪሱዋዳን ያና። ሄ ጋላሲ ሳላቱ ዎልቃማ ጉንꬃን ꬋያና፤ ሳሉዋ ሜꬌታቱ ዎልቃማ ሴላን ሲላና፤ ሳዓይኔ ኣ ቦላን ዴዒያ ኡባባይ ꬋያና።

¹¹ኡባባይካ ሄዋዳን ꬋዪያዋ ጊዶፔ፥ ሂንቴ ኣይ ማላ ኣሳ ጊዳናው ቤሲ? ሂንቴ ዴዑ ጌሻኔ ፆሳ ማላቲያዋ ጊዳናው ኮሼ።

¹²ሂንቴ ፆሳ ጋላሳ ናጊሺና፥ ሄ ጋላሳይ ኤሌካ ጋካናዳን፥ ሂንቴንቶ ዳንዳዬቲያዋ ኦꬂቴ፤ ሄ ጋላሲ ሳላቱ ጉዴቲዴ ꬋያናኔ ሳሉዋ ሜꬌታቱካ ዎልቃማ ሴላን ሲላና።

¹³ሺን ኑኒ ፆሳይ ኢማና ጌዳ ኦራꬃ ሳሉዋኔ ኦራꬃ ሳዓ ፂሉ ዴዓናሳ ናጌቶ።

¹⁴ሄዋ ዲራው፥ ታ ሲቃቶ፥ ሄ ጋላሳ ናጊዴ፥ ፖኩኔ ዬላዪያባይ ባዪናዋንታ ጊዲዴ፥ ኣናና ሳሮቴꬃን ዴዓና ማላ ሎዖባ ኡባ ኦꬂቴ።

¹⁵ጎዳ ዳንዳያይ ኣቶቴꬃ ጊዲያዋ ሂንቴ ዎዛናን ቆፒቴ፤ ሄዋዳን ቃሲ ኑ ሲቆ ኢሻይ ጳዉሎሲ፥ ፆሳይ ባሬው ኢሜዳ ኣꬌዳ ኤራቴꬃን ሂንቴንቶ ፃፌዳ።

¹⁶ባሬ ፃፊያ ዳቢዳቢያን፥ ሄ ዬዉዋባ ፃፊያ ዎዴ፥ ታማሪቤና ኣሳቱኔ ሚኒቤና ኣሳቱ ሃራ ፆሳ ማፃፋቱዋ ጌላዪያዋዳንካ፥ ሄ ዳቢዳቢያ ጊዶን ዴዒያ ኣኬካናው ዋዪሲያ ዬዉዋ ጌላዪኖ። ኡንቱንቱ ሄዋ ኦꬂያዋን ባሬንቱ ቦላ ባሻ ኣሂኖ።

¹⁷ሄዋ ዲራው፥ ታ ሲቃቶ፥ ሂንቴ ሄዋ ኤሪያ ዲራው፥ ማካላንቻቱዋ ባላን ጪሜቲዴ፥ ዎራ ቤና ማላኔ፥ ቃሲ ሚኒዴ ዴዒያ ሳዓፔ ኩንዴና ማላ ናጌቲቴ።

¹⁸ሺን ሂንቴ ኑ ጎዳ፥ ኑና ኣሺያ ዬሱሲ ኪሪስቶሳ ኣꬎ ኬካቴꬃኒኔ ኤራቴꬃን ዲጪቴ። ኣው ሃዒኔ ሜꬊና ጋላሳይ ጋካናው ጋላታይ ጋኮ። ኣሜንዒ።