2 ጴፂሮሳ ኪታ 2

1

2

3

¹ሺን ቲምቢቲያ ኦዲያ ዎርዳቱ ኣሳ ጊዶን ካሴ ዴዒያዋዳን፥ ሂንቴ ጊዶኒካ ዎርዱዋ ታማሪሲያዋንቱ ዴዓና። ኡንቱንቱ ባሬና ዎዜዳ፥ ጎዳ ካዲዴ፥ ባዪዚያ ዎርዶ ቲሚርቲያ ኣሃና፤ ቃሲ ኡንቱንቱ ኣኬኬና ባሻ ባሬንቱ ቦላ ኣሃና።

²ቃሲ ዳሮ ኣሳይ ዬላዪያ ኡንቱንቱ ኢታ ኦጊያ ካላና፤ ኡንቱንቱ ጋሱዋን ቱሙዋ ኦጊ ቦሬታና።

³ዎርዱዋ ታማሪሲያ ሄዋንቱ ሻሎ ያሬቲያዋን ባሬንቱ ሜꬊ ኣኬዳ ቶሳን ሂንቴና ቦንቃና፤ ቤኒፔ ዶሚዴ፥ ኡንቱንቱ ፒርዳይ ጊጊ ኡቴዳ፤ ኡንቱንታ ꬋዪሲያዌ ቤጎቲዴ ናጌ።

⁴ናጋራ ኦꬄዳ ኪታንቻቶ ፆሳይ ቃሬቴናን፥ ፒርዳ ጋላሳይ ጋካናው ꬉማ ኦላን ኡንቱንቱ ቃሼቲ ኡቴዳ ጋናሚያን ዬጌዳ።

⁵ፆሳይ ናጋራንቻቱዋ ቦላ ባሻ ሃꬃ ዬዴዳፔ ኣቲን፥ ቤኒ ኣሳው ኬኪቤና፤ ሺን ፂሎቴꬃባ ኦዴዳ ኖሃኔ ሃራ ላፑ ኣሳቱዋ ኣሼዳ።

⁶ፆሳይ ሶዶማኔ ጋሞራ ጊያ ካታማቱዋ ቢታ ቢዲንꬃ ኡዲዴ፥ ጉዲ ꬋዪሲዴ፥ ናጋራንቻ ጊዲያዋንታ ጋካናባው ሌሚሱዋ ኦꬄዳ።

⁷ሂጌው ኣዛዜቴና ቱናቴꬃ ኦꬂያ ኣሳቱዋ ጊዶን ቱጋቲዴ ዴዒያ ፂሉዋ ሎፃ ፆሳይ ኣሼዳ።

⁸ሄ ሎዖ ቢታኒ ኡንቱንቱ ጊዶን ዴዒዴ፥ ኡንቱንቱ ኦꬂያ ኢታ ኦሱዋ ጋላሲ ጋላሲ ቤዔዳ ዎዴኔ ሲሴዳ ዎዴ ኣ ሎዖ ዎዛናይ ኡንዔቴዳ።

⁹ሄዋ ጊዶፔ፥ ጎዳይ ፆሳው ጎዪኒያ ኣሳቱዋ ፓጪያፔ ዎቲ ኣሻኔንቶ ኤሬ፤ ናጋራንቻቱዋ ቃሲ ኡባፔ ኣꬂዴ፥ ቱና ኣሙዋን ኣሹዋ ኣሙዋ ካሊያዋንታኔ ቃሲ ፆሳ ዎልቃ ካꬊያዋንታ፥ ፒርዳ ጋላሳይ ጋካናው ጎዳይ ሙሪዴ ዎꬃናዋካ ኤሬ። ዎርዱዋ ታማሪሲያ ሄዋንቱ ፃላኔ ኦቶራንቻ ጊዴዳዋን፥ ቦላን ዴዒያ ቦንቾ ሜꬌታ ቦሪኖፔ ኣቲን፥ ቦንቺኪኖ።

¹¹ሄ ዎርዱዋ ታማሪሲያ ኣሳቱዋፔ ዳሮ ሚኖኔ ዎልቃማ ጊዲያ ኪታንቻቱካ ኡንቱንታ ጎዳ ሲንꬃን ቦሪያን ሞታናው ኮዪኪኖ።

¹²ሺን ሄ ኣሳቱ ኦይቄቲዴ ꬋያናው ዬሌቴዳ ባሬንቱ ሜꬌታን ዎዛናይ ባዪና ዎራ ዶዓቱዋዳን ሃኒኖ፤ ኡንቱንቱ ኤሬናባ ቦሪኖ፤ ቃሲ ባሬንቱ ባዪዙዋን፥ ኡንቱንቱ ጮ ꬋያና።

¹³ኡንቱንቱ ባሬንቱ ሜꬌዳ ሜቱዋን ሜቶታና፤ ጋላሲ ዬፂዴ ዱሪያዋ ናሼቺያባ ጊዴ ቆፒኖ፤ ኡንቱንቱ ካዉሺሲያዋንታኔ ቱናቱዋ ጊዲ ኡቲዴ፥ ሂንቴናና ሚያ ቁማ ሙሳን ናሼቲኖ።

¹⁴ጫራቲያ ማጫ ኣሳ ፄሊያዋ ኣጌና ኣይፊ ኡንቱንቶ ዴዔ፤ ቃሲ ናጋራ ኦꬂያዋካ ኣጊኪኖ። ኣማኑዋን ሚኒቤና ኣሳ ጪሚኖ። ኣሙዋ ዶዬዳ ዎዛናይ ኡንቱንቶ ዴዔ፤ ኡንቱንቱ ሼቄቴዳዋንታ።

¹⁵ሱሬ ኦጊያ ኣጊዴ ባሌዲኖ። ቢዖራ ናዓ ባላማ ኦጊያና ቤዲኖ፤ ባላሚ ማካላን ሚሻ ኣካናው ኮዬዳ።

¹⁶ኢ ቲምቢቲያ ኦዲያዋ፤ ሺን ኣ ናጋራ ዲራው፥ ኣ ሃሪ ኣሳዳን ሃሳያን ሴሪዴ፥ ጎሻ ማላ ሃኑዋፔ ኣ ቴዔዳ።

¹⁷ሄ ኣሳቱ ሜሊዲጌዳ ፑልቱዋ ማላ፤ ቃሲ ጎቱ ቶኪዴ ኣፊያ ሻሪያ ማላ፤ ፆሳይ ኡንቱንቶ ሳካና ꬉማ ጊጊሲ ዎꬄዳ።

¹⁸ኣዪሲ ጎፔ፥ ኡንቱንቱ ሜላኔ ኦቶሮ ሃሳያ ሃሳዪኖ፤ ባሊዴ ዴዒያ ኣሳፔ ኬሲ ዬዳዋንታ ዎልቃማ ኣሹዋ ኣሙዋን ጪሚኖ።

¹⁹ኡንቱንቱ ባሬው ባሻ ኣሙዋና ዴዒዴ ኡንቱንታ፥ «ሂንቴ ኣዪሌቴꬃፔ ኬሳና» ያጊኖ፤ ኣዪሲ ጎፔ፥ ኢቲ ኣሳይ ባሬና ፆኔዳባው ኣያዉኔ ኣዪሊያ።

²⁰ኡንቱንቱ ኑ ጎዳኔ ኑና ኣሺያ ዬሱሲ ኪሪስቶሳ ኤራቴꬃን ሃ ሳዓ ቱናቴꬃፔ ኬሲ ኣኬዳዋፔ ጉዪያን፥ ጉዬ ሲሚዴ፥ ኣኒ ꬉቤቲዴ ፆኔቲያዋ ጊዶፔ፥ ካሴ ዴዒያ ዴዑዋፔ ጉዬዌ ኡንቱንቶ ኢታና።

²¹ኣዪሲ ጎፔ፥ ኡንቱንቶ ኢሜቴዳ ጌሻ ኣዛዙዋ ኤሪዴ ኣጊያዋፔ ኡንቱንቱ ፂሎቴꬃ ኦጊያ ኤሬናን ኣጊንቶ ሎዓ ሺን።

²²«ካናይ ባሬ ጮሻኮ ጉዬ ሲሜ» ጊያ ሌሚሱኔ ቃሲ፥ «ሜጬቴዳ ጉዱንꬃይ ጉዬ ሲሚዴ፥ ኡርቃን ጎንዶሬቴ» ጊያ ሌሚሱ ቱማ ጊዲያዋ ኡንቱንታ ጋኬዳዌ ቤሴ።