2 ታሶሎንቄ 2

1

2

3

¹ታ ኢሻቶ! ጎዳ ዬሱስ ኪርስቶሳ ዩሳ ጊሺኔ ኑ ኢዛኮ ባና ቡሳ ጊሽ ኑ ኢንቴና ቆፊሶስ።

²ኣያናይ ቆንጪሲዴስ ዎይኮ ቃላይ ጌስ ጊዲ ዎይኮ ኑፔ ኢንቴስ ኪቴቲዳ ኪታ ማላ “ጎዳ ዩሳ ጋላስ ጋኪዴስ” ጊዲ ኢንቴ ቆፋን ያርክ ያርኮፊቴኔ ዳጋሞፍቴ።

³ኦኒካ ኣይ ሃኖንካ ኢንቴና ባሌꬆፎ። ዳሮ ኣሳይ ኣማኖ ካዳናፔ ሲንꬄ ꬋያናስ ቤሲዛ ኢሲ ማካላ ኣሲ ቆንጮንታ ዲሺን ሄ ጋላሳይ ጋኬና።

⁴ኢዚካ ፆሴ ጌቴቲ ጎይኔቲዛ ኤቃ ፆሳታ ኡባፌ ቦላራ ባና ꬎቁ ꬎቁ ሂስቲዛዴኔ ፆሳራ ኤቄቲዛዴ። ኢዚካ ፆሳ ኬꬃን ኡቲዲ ባና “ታኒ ፆሳ” ጊዲ ኣዋጃ ኣዋጂሳና።

⁵ታ ኢንቴናራ ዲዛ ዎዴ ሃይታ ሃ ዮዖታ ኢንቴስ ታ ዮቲዳይሲ ኢንቴስ ቆፌቲዜሻ?

⁶ኢዚ ባ ዎዴን ቆንጫና ጋካናስ ሃዒ ኢዚ ቆንጮንታ ማላ ኣዚ ዲጊዛኮኔ ኢንቴ ኤሬታ።

⁷ማካላንቻ ፁራይ ሃራይ ኣቶሺን ሃዒካ ኦሶ ቦላ ዴስ። ጊዶ ኣቲን ሃይሲ ሃናናይ ኢዚ ሃዒ ኦꬆንታ ማላ ኢዛ ዲጊዛዴይ ኢዛ ኦጌፔ ኪቻና ጋካናስ ፃላ።

⁸ሄሳፌካ ካሊዲ ጎዳ ዬሱሲ ባ ዱና ፔኖኒኔ ባ ቦንቾ ዩሳን ꬋይሳና፤ ማካላንቻይ ቆንጫና።

⁹ሄ ማካላንቻ ዩሲ ፃላዔ ዎልቃን ሄሲካ ኣስ ባሌꬂዛ ማላታታኒኔ ማላሊሲዛ ሚሻታን ሃናና።

¹⁰ሄሳꬆካ ኤኪዲ ኣቶንታ ማላ ቱማ ኢፂዲ ꬋዪዛ ኣሳታ ባሌꬃናስ ዱማ ዱማ ኢታ ኦሶይ ያና።

¹¹ሄሳ ጌዶን ኢስቲ ዎርዶ ዮዖ ኣማናና ማላ ፆሲ ኢስታ ቦላ ባላ ኦሶ ኪታና።

¹²ሄሲ ሃናናይ ቱማ ኣማኖንታ ኢፂዲኔ ዎርዶ ዮዖን ኡፋዬቲዛይቲ ዉሪ ፒርዴታናሳ።

¹³ጎዳን ዶሴቲዳ ታ ኢሻቶ! ኑ ጊዲኮ ኡባ ዎዴ ኢንቴ ጊሽ ፆሴ ጋላታናስ ኑስ ቤሴስ። ጋሶይካ ፆሲ ኢንቴና ኮይሮፔ ኦይኪዲ ኢንቴ ፂሎ ኣያናን ዱማቲዳይታኔ ቱሙ ኣማኒዲ ኢንቴ ኣታና ማላ ኢንቴና ዶሪዴስ።

¹⁴ኑ ጎዳ ዬሱስ ኪርስቶሲ ቦንቾ ጊሼቲዛይታ ኢንቴ ጊዳና ማላ ኑ ዮቲዳ ሚሺራቾ ቃላ ባጋራ ኢንቴና ፄይጊዴስ።

¹⁵ሄሳ ጊሽ ታ ኢሻቶ! ኢንቴ ሚኒ ኤቂቴ፥ ኑ ኑ ዱናን ጊዲን ዎይኮ ኪታን ዎይኮ ኑ ኢንቴስ ኣꬂ ዬዲዳ ቲሚርቴዛ ሎዔꬂ ኦይኪቴ።

¹⁶ኢዚ ኑ ጎዳ ዬሱስ ኪርስቶሲ ቃሴ ኑና ሲቂዳይኔ ባ ኪያቴꬃን ሜርና ሚንꬄꬆኔ ሎዖ ሂዶታ ኢዚ ኑስ ኢሚዳ ኑ ኣዋ ፆሳይ፥

¹⁷ኢዚ ኢንቴ ዎዝና ሎዖ ኦሶኒኔ ቃላን ሚንꬆ።