2 ታሶሎንቄ 1

1

2

3

¹ጳዉሎሳፔ፥ ሲልዋኖሴፔኔ ፂምቶሳፔ፤ ኑ ኣዋ ፆሳኒኔ ጎዳ ዬሱስ ኪርስቶሳን ጊዲዳ ታሶሎንቄን ኣማኒዛ ኣሳስ።

²ፆሳ ኣዋፔኔ ጎዳ ዬሱስ ኪርስቶሳፔ ኪያቴꬂኔ ሳሮቴꬅ ኢንቴስ ጊዶ።

³ታ ኢሻቶ! ኢንቴ ኣማኖይ ዎዴፔ ዎዴን ዲጪ ዲጪ ቢዛ ጊሺኔ ኢንቴ ሲቆይካ ካሴፔ ጉጄቲ ጉጄቲ ቢዛ ጊሽ ኑ ኢንቴ ጊሽ ፆሳ ሎዔꬂ ጋላታናስ ቤሴስ።

⁴ሄሳ ጊሽ ኢንቴ ቦላ ጋኪዳ ጎዴቴꬃኒኔ ሜቶ ኡባን ኢንቴ ሚኒዳ ጊሽ ኑኒ ኑ ባጋራ ኢንቴ ዳንዳያ ጊሺኔ ኢንቴ ኣማኖ ጊሽ ኣማኒዛ ኣሳ ኡባ ኣቻን ጬቄቶስ።

⁵ሄሲ ዉሪካ ፆሳ ፒርዳይ ሱሬ ጊዲዳይሳ ቤሴስ። ሄሳ ጌዶን ዋዬ ቤዪዛ ኢንቴ ፆሳ ካዎቴꬃስ ቤሲዛይታ ጊዲ ቤቲዴታ።

⁶ፆሲ ፂሎ ጊዲዳ ጊሽ ኢንቴና ዋይሲዛይታ ኢዚ ዋይሳና።

⁷ዋዬ ኤኪዳ ኢንቴሲኔ ኑስ ሼምፖ ኢማና። ሄሲካ ጎዳ ዬሱስ ኪርስቶሲ ዎልቃማ ሳሎ ፆሳ ኪታንቻታራ ሳሎ ቦላ ቆንጪዛ ዎዴ ሃናና።

⁸ሄ ዎዴ ፆሴ ኤሮንታ ኣሳታኔ ጎዳ ዬሱስ ኪርስቶሳ ሚሺራቾ ቃላስ ኣዛዜቶንታ ኣሳታ ቦላ ኢዚ ባ ሃሎ ላጮ ታማን ኬሳና።

⁹ኢስቲካ ጎዳ ሲንꬃፌኔ ኢዛ ቦንቾ ዎልቃ ኣቻፌ ኪቺዲ ሜርናስ ꬋዮን ቃፃዬታና።

¹⁰ኢስቲ ቃፃዬታናይ ኢዚ ጌሻታ ኣቻን ቦንቼታናሲኔ ኣማኒዛይቲ ዉሪ ኢዛን ማላሌታና ማላ ኢዚ ዪዛ ጋላሳን ሃናና። ኢንቴካ ሄ ኣማኒዛ ኣሳራ ዳና፤ ጋሶይካ ኑ ኢንቴስ ማርካቲዳይሳ ኢንቴ ኣማኒዳ ጊሻሳ።

¹¹ኑ ሄሳ ቆፒሼ ኑ ፆሲ ኢንቴና ባ ፄይሳስ ጊዲዛይታ ሂስቲ ቆዳና ማላ ኢንቴ ሎዖ ኦꬃናስ ኣሞቲዛ ኣሞዛኔ ኣማኖን ኢንቴ ኦꬂዳ ኦሶዛ ዉርሲ ኢዚ ኢንቴስ ባ ዎልቃን ፖላና ማላ ኑ ኢንቴስ ኡባ ዎዴ ዎሶስ።

¹²ቃሴካ ኑ ጎዳ ፆሳኔ ኑ ጎዳ ዬሱስ ኪርስቶሳ ኪያቴꬃ ማላ ዬሱስ ኪርስቶሳ ሱንꬂ ኢንቴ ኣቻን ቦንቼታና ማላኔ ኢንቴካ ኢዛን ቦንቼታና ማላ ኑ ኢንቴስ ዎሶስ።