1 Utaáchich Kuraka 21:4-23

⁴Ajabsha anoo mazinarangu, kizpur mang' mantsaku, pázirpa pangup kanapurangiya. Watam Nabot tsiyatku, ¿Antaatiya nuw yuwaa aparneetsi mazar yarangi anoo panamaam wanindaja? táranguwa. Ashirucha, pangushsha kuseeru, nda katungamaam zandku, maashimun arangiri watandpunupiri tasasaru maamaw ashirangiya.

⁵Ashiriya, wizanllsha Jesabel anush kuseeru, wazaranllee, ¿Mayangazsha mangish kizpur mantsakush, nda katungamaam zandaksha? tárangu,

⁶Ajabsha, Nuw Nabotpat tsiyataranguri, Mzarish kizarun tatsumirish an paxanxeeni. Nuwsha anoo mzats kasirinasha kizaruntam panachinllpa, táranguri, itaru uwsha nuwaa mazaree pachindkiya, tárangiya.

⁷Ashiriya, Jesabelsha: Itaru, ¿mayaamsha anungaz mangish kapung mantsaksha? Watam shiy kurakshawa. Israelchichee tputs ichingaroo shiyamari ksutakshawa. Mapiyrush naayarush, katungashini, anoo mbizapish. Ashiriya, nuwshat Nabotaa mazar shiyaam paxanxchinllpa, tárangu,

⁸anuritam kirakaa yandayaru, wazaranllpa sur yandam kirakamun chka sheeru, Ajabpaz kurak yandaku sheeru, Nabotshucheem wachinanureem, kurakaamawatam panamaam zanganirangiya.

⁹Anushsha, kirakash yandaku, tárangiya. Nabotaa tputs ichingaru parsin, anush wanasiritaatsiri tunuxinayarus, tumangtantsa,

¹⁰Sheerus, anush tputsshat tsimbun mangutari ngichimapan kuseersin, ¿Mayaamsha shiy Apanllee kapung tayutaritarangsha? ¿Ashirangush, kurakaatsitam kukoo kapeetarangsha? táyarusin, anootsiri tputs zapan parsin, patumbichpa pachayarus ksangtsa, tárangiya.

¹¹Ashiriya, Nabotshuchsha tsap tputs ichingarusin wachinanur, misha kurakawtamsin yuwaa Jesabel kirakash yandayaru zanganeeru, anuritam tuminuranganaya.

¹²Ashiriya, Nabotaa yamayarusin, tputs ichingarusin parsin, tunuxinayarusin tumangtaranganaya.

¹³Sheersin, anushsha tputs tsimbun mangutari ngichimapan kuseersin, tputs ichingarusin parsin, anush xiyartayarusin, ¿Mayaamsha shiy Apanllee kapung tayutaritarangsha? ¿Ashirangush kurakaatsitam kukoo kapeetarangsha? tárangusin, piyam ishitungayarusin, patumbichpa pacharanganaya.

¹⁴Ashirangsin, anumun tsiyatssee Jesabelaam zanganirangsin, Na Nabotarini tsipamtanda. Patumbichpatanda pacharangini, táranganaya.

¹⁵Ashiriya, Jesabelsha anoo tsiyatsis mazinarangu, Ajabaatssha wazaranllee, Ashiriya, na mzatsee shaamatarisha yángcha, watam amuy yuw nda shiyaam mazaree panamaam zandarangu, Nabotarini Jesreelshuchi tsipamshtawa, tárangu,

¹⁶anootssha kurak Ajab mazinarangu, Nabotarineetsi mazar waamatarisha yarangiya.

¹⁷Ashiriya, anuritam Apanllsha Elíyasaa yakat Tisbeshuchee tsiyatarangu,

¹⁸Elíyasaa, shiysha naturi naayarush, kurakash Ajabash Israelchichish urkar yakat Samariyash napashini. Na in uwsha Nabotarineetsi mazar kizaruna waamatarisha yarangu, uwsha mzatsee ksutkiya.

¹⁹Shiysha, anush kuseerush, nuwaa kuki kamanincha. ¿Mayaamsha shiy Nabotaa pachayarush, mazareetssha shaamatarisha yarangsha? Yuwamand ashirangish anumand yapitam sheerush, Nabotaa pacharangusin, tumuzsha ursiree iputarangana; uru shiyaatssha tumuz ambitam ashtachinllinaya, átcha Apanlli, tángcha, tárangiya Elíyasaatsi.

²⁰Ashiriya, Elíyassha anoo kurakaa kamanirangu, kuraksha Elíyasaa: ¿Naturi yusur shiyapat kundararpati chamayangaranginee? tárangu, Elíyassha, Zuraktishcha. Nuwapa chamayangaranginiya, ¿Mayaamsha yutaritshishish kapung pshtuksha? Amb ashirangush, Apanllee kapung tatsiyuntarangsha.

²¹Ashirucha, anumand Apanllsha kapung tsiyantarangu, shiyaa kapung tayutaritchima, atiya. Ichingaroo shiyachchee maachiritaatsish kamuzawaatsinandari yuwaa Israelash taakana, anoo tpachingayaru kasachiya.

²²Sirútama Jerobowamaa Nabatarinee wip, mishat Mbasaá Aíyasarinee wip yuwamand Israelchichee kapung yutaritshishish tupantsarangana, anumand Apanllsha kapung tsiyantarangu, ichingaroo maachirita waneerangu, ambitam ashtachiya shiyachcheetsiya.

²³Mishat, ashiritam Jesabelaatsshat uru yakat Jesreelash tumuz chinuz mzatsish katungchinllinaya, Apanll waana nuwaa tárangiya.