1No akana, phralale, mangas tumen a dovakeras tumenge andre amaro Raj Ježiš, hoj furt buter te baron andre oda, so amendar priiľan. Bo amen tumen sikaďam, sar kampel te dživel a te el pre dzeka le Devleske a avke imar the dživen.
2Se džanen, save prikazaňja tumen diňam amare Rajestar le Ježišostar.
3Bo kada hin, so o Del kamel, hoj te dživen sentnes a te zľikeren tumen le lubipnastar.
4Dojekh tumendar mi džanel sar te dživel peskera romňaha andro sentňipen the andre pačiv
5a na andre džungaľi žadosca, sar oda keren o pohana, save na prindžaren le Devles.
6Ňiko te na thovel avri peskere phraleha avke, hoj kerela vareso leskera romňaha. Bo amaro Raj marela sakones, ko oda kerel, sar tumenge imar sigeder zoraha priphenďam the dovakerďam.
7Bo na vičinďa amen o Del pre oda, hoj te dživas andro nažužipen, ale andro sentňipen.
8Ko kada na prilel, na prilel le Devles. Bo oda nane le manušestar, ale le Devlestar, savo tumen del peskere Sentne Duchos.
9Pal o kamiben maškar o phrala tumenge na kampel te pisinel, bo tumen san korkore avrisikade le Devlestar, hoj jekh avres te kamen.
10Bo imar sikaven oda kamiben savore phralenge andre caľi Macedonija. Ale mangas tumenge, hoj oda te keren mek buter.
11Keren sa prekal oda, hoj te dživen andro smirom a sako mi starinel pes pal peskero a mi kerel peskere vastenca e buči, avke sar tumenge oda phenďam.
12Bo oleha tumen ľikerena šukares anglal ola, save na pačan, a na avena ňikaske pre meň.
13Amen kamas, phralale, hoj te džanen, so ela ole manušenca, save imar mule. Bo na kamas, hoj tumen te trapinen avke sar okla džene, saven nane užaripen (naďej).
14Bo te amen pačas, hoj o Ježiš muľa a ušťiľa andral o meriben, ta akor pačas the oda, hoj o Del anela pale le Ježišoha olen, save mule pačabnaha andre leste.
15Kada, so tumenge amen phenas, hin o lava le Rajeskere: Amen, save mek dživaha, sar avela o Raj, na predenašaha olen, save imar mule.
16Bo sar šunďola o zoralo rozkazis, le archaňjeloskero hangos the le Devleskeri truba, korkoro o Raj avela tele andral o ňebos a ola, save mule andro Kristus, ušťena ešebne.
17A paľis amen, save avaha mek džide, avaha jekhvareste cirdle upre jekhetane lenca andro chmari, kaj pes arakhaha le Rajeha. A avke avaha le Rajeha pro furt.
18Vašoda tumen zoraľaren jekh avren kale lavenca.
