1 Pedro 4:6-18

⁶Ruma ne kꞌu laꞌ, xtzijox ri Utzilaj Tzij chike ri ekaminaq chupa ri kimak chaꞌ kakꞌojiꞌ kikꞌaslemal na jinta utaqexik chwach ri Dios, tobꞌ chikiwach taq ri winaq, na utz ta ri xkiꞌan rike ruma xkikoj rubꞌiꞌ ri Cristo.

⁷Lik xa naqaj chi kꞌo wi lo ruqꞌijol echiriꞌ kakꞌis ri na utz ta uwach y kajalkꞌatisax kꞌu ronoje ri kꞌolik. Ruma kꞌu riꞌ, lik kꞌola naꞌoj alaq puwiꞌ saꞌ taq ri kaꞌan alaq y xaqi e yaꞌa ibꞌ alaq pa oración chwach ri Dios.

⁸Yey ri más chirajawaxik wi e rukꞌ ronoje kꞌuꞌx alaq kꞌax kanaꞌ ibꞌ alaq chiwach alaq, ma we lik kꞌo rutzil kꞌuꞌxaj ukꞌ alaq, riꞌ kakuy alaq taq rukꞌiyal mak ke ri nikꞌaj chik.

⁹Chekꞌulu alaq chi utz ri kebꞌopon chi ocho alaq y mawunwut ne alaq che uꞌanik waꞌ.

¹⁰Ekꞌu chirij ri uyaꞌom ri Dios paqꞌabꞌ alaq, chetoꞌo alaq ri jujun chik, chaꞌ jelaꞌ kuꞌan alaq saqil aj chakibꞌ re ri Dios y kachakun alaq chi utz rukꞌ rukꞌiyal uwach toꞌbꞌal uyaꞌom ri Dios che alaq.

¹¹We kꞌo junoq kakꞌutun chikiwach ri hermanos, e chukꞌutu puwi ri kubꞌiꞌij Ruchꞌaꞌtem ri Dios y na xa ta pa re kachꞌaꞌtik. We kꞌo junoq karaj kebꞌutoꞌ ri tikawex, chuꞌana waꞌ rukꞌ ri chuqꞌabꞌ yaꞌtal che ruma ri Dios. Ronoje kꞌu ri kaꞌan alaq, ꞌana alaq re yakbꞌal uqꞌij ri Dios ruma ri Qanimajawal Jesucristo, ri lik taqal che kꞌo yakbꞌal uqꞌij y kataqan kꞌu pakiwi konoje waqꞌij ora y chiqawach apanoq na jinta utaqexik. Amén.

¹²Hermanos, makam animaꞌ alaq che taq runimal kꞌaxkꞌobꞌik kape pawiꞌ alaq re kukꞌam pa alaq, ma qonoje kojikꞌow chupa waꞌ.

¹³Ri ꞌana alaq e kiꞌkota alaq, ma alaq bꞌare jun che taq ri kꞌaxkꞌobꞌik xikꞌow wi ri Cristo, chaꞌ echiriꞌ kuqꞌalajisaj runimal uchomalil, ralaq lik kakiꞌkot alaq che.

¹⁴We e kꞌo tzel kechꞌaꞌt chiꞌij alaq ruma kojom alaq rubꞌiꞌ ri Cristo, riꞌ lik nim qꞌij alaxik alaq ma ri chomilaj Ruxlabꞌixel ri Dios kꞌo ukꞌ alaq. Qatzij wi, e kꞌo ri tzel kechꞌaꞌt chirij Rire, noꞌj ralaq lik kayak alaq uqꞌij Rire.

¹⁵We kꞌo junoq che alaq kutij kꞌax, lik kꞌixbꞌal uwach we waꞌ e ruma kamisanel o eleqꞌom o ruma uꞌanom ri na utz taj che junoq o ruma uminom ribꞌ chupa ri na jinta re che.

¹⁶Noꞌj we kꞌo junoq kutij kꞌax ruma ukojom rubꞌiꞌ ri Cristo, makꞌix kꞌu riꞌ che; ri chuꞌanaꞌ e chuyaka uqꞌij ri Dios ruma waꞌ.

¹⁷Ma e qꞌij waꞌ kajeqer bꞌi ri qꞌatbꞌal tzij pakiwi ri e ralkꞌoꞌal ri Dios. Yey we nabꞌe kꞌut kajeqer qukꞌ riꞌoj, ¿saꞌ nawi keꞌkikꞌisa wi riꞌ ri na kikojom ta ri Utzilaj Tzij re ri Dios?

¹⁸Ma jewaꞌ kubꞌiꞌij pa Ruchꞌaꞌtem ri Dios: We ri e jusukꞌ chwach ri Dios rukꞌ ne ukꞌayewal kekolobꞌetajik, ¿saꞌ kꞌu kakikꞌulumaj riꞌ ri e aj mak, ri kakiꞌan kititzꞌitikil che ri Dios?