1 Korinto 13:2-8

²Á mássiki nu makáwayyángà nga mangibukalán sù bilin ni Namarò nga ipalappâ na nikán, ánna mássiki nu kánnámmuák ku yù ngámin nga monak nga nelímak nga talákkurugan na, á mássiki nu masikan yù ángngikatalà ku, tapè máwayyâ nga pagalitan yù ira puddul, á awán galâ ta serbi nayù akkuák ku nu awán ta ángngiddù ku sù ira kábuluk ku.

³Á mássiki nu isinek ku ngámin yù kukuâ sù ira pobare ánna ipatuggì yù baggì, megapu sù pangikatalà ku kâ Apu, awán ta pakkapiánák ku nu arák ku iddukan yù ira kábuluk ku,

⁴Nu mangiddù ittam sù ira kábulut tam, attamát tam gapay yù akkuád da, ánna ikállà tam ira. Á ari ittam bulubugá mangabubu nira, Á ari ittam mappeddaráyaw, ánna ari motun yù nonò tam.

⁵Á nu mangiddù ittam sù ira kábulut tam, arát tam ira uyoyungán. Á ari ittam mangukkuk, ánna arát tam ipapílì yù ure tam lápay. Á ari ittam malogon nga mapporay. Á arát tam ipatattam ta nonò tam yù liwiliwâ nayù ira kábulut tam, ánna arát tam ibálà yù liwâ da nittam.

⁶Á nu mangiddù ittam sù ira kábulut tam, arát tam ipagayáyâ yù akkuán nayù ira nga mangnguá ta narákè, nu ari galâ ta magayáyâ ittam megapu sù napiá nga akkuád da.

⁷Á nu mangiddù ittam sù ira kábulut tam, ari ittam malurâ nga mangabbák nira. Maguray lâ yù mesimmu, arát tam ira táttájjián. Á ipasigaggà tam lâ yù pangikatalà tam kâ Apu ánna yù pagiddanáma tam kâ Apu nga mangabbák nittam. Á mássiki nu marigirigâ ittam, onu narákè yù akkuán na tatolay nittam, attamát tam lâ yù ngámin nga mesimmu nittam.

⁸Á awán ta áddè nayù pakkaká-iddù tam ánna yù pangiddù tam kâ Namarò. Ngam mappasá sangaw yù pangilayalayâ nayù ira ábbilinán ni Namarò, ánna yù pagubobuk nayù ira tatolay ta tanakuán nga ággubobuk nga ari paga nánnámmuán. Á mappasá gapay sangaw yù ngámin nga ammu tam.