1 Korin 7:12-21

¹²Tama dage tomode gasa bidi dabe augwalibolo te ena digi eno naga te po obao, te dago Genuai Bidigo wali po meni. Eno e tiwai po obao: te ama me deligo we sali tama te wego te Kraisde konealubo po dąų wasiąbaso, tama te we aga dali bidainogo homu ebaso da, te amago te aga me sela sągio.

¹³Ma, we me deli selama tama te we aga bidigo te Kraisde konealubo po dąų wasiąbaso, tama te bidi te we dali bidabo homu ebaso da, teda te wego aga te bidi me taga pelamu dao.

¹⁴Magi baso meni. Te konealubo po dąų wasiąwani bidigo te aga we dali mu kęą pelama bidiyu, tama tebogo te aga te Godigo gedude te dwagi yai bidi ilaibao. Te tiwai naga te Kraisde konealubo po dąų wasiąwani wego te aga bidi dali mu kęą pelama bidiyu, tama tebogo te we aga te Godigo gedude te dwagi yai we ilaibao. Te meni yani da, teda dagego wai puluba dabe te augwali dwagi yai me egobeo. Tiali goli megi te augwali Godigo gedude wiegi yai elama mu bidalubao.

¹⁵Tiali goli, te konealubo po dąų wasiąwani bidi agai te aga Kraisde konealubo po dąų wali we tagalabo homu ebaso da, te usu da, agai tagalomainao. Te tiwai kolesaga pedaliyu, te duga ama ma abe aga te kalabus tiwai me elalugobeo. Magi baso meni. Godigo dage i olama, te wiegi yai homu nagame ebo kolesaga wali pomainu ebo dao.

¹⁶We, nago te naga bidi tau selama, te aga Godigo po wali pabo bidi pedelabo, ma meniabo, te nago konebeo. Te nage bidi, te nago naga we tau sobaso tama aga te Godigo po wali pabo we pedelabo, ma te meniabo me, te nago konebe dao.

¹⁷Tiali goli dago Genuai Bidigo te deli deli bidibolo dobaba pali sę eyu, tama aga te sę eyu bidibadi te Godigo aga i obaso da, teda aga te sęde naga bilao. Eno te tiwai bomai po te tigidali Godigo po wali pabo we bidi hanibolo bomonama ola mabo dao.

¹⁸Te po page e tiwai dao. Te bidi me deli te Juda dabe augwaligo aga tigiwali sa muyu tama togolama tama te tiwai bidibadi Godigo aga i waliwe? Teda, agai te aga tigiwali togwali te ma dodolabo homu egio, te tagala. Te gasa bidi me deli aga tigiwali togosiąwai bidibadi te Godigo aga i waliwe? Teda, agai tigiwali megi togogio.

¹⁹Te tigiwali togobo kolesaga, te Godigo gedude te olo nai tiwai dao. Tama te tigiwali togosiąbo kolesaga me te aga gedude te olo nai tiwai dao. Tiali goli te Godigo bomai po wali pabo kolesaga, te mu nai dao, te sęgę dao, tede magigo meni wagimio.

²⁰Te bidi te sę me delide bidibadi tama Godigo aga i obaso da, teda aga te sęde me bididuao.

²¹Te e tiwai dao. Te nage masigi sisąbo olo sę ebo bidi bidibadi tama Godigo nage i waliwe? Teda, tagala, magigo menio. Tiali goli, nago te masigi sisąbo olo sę ebo tagalabo sunumi elalubaso da, teda nago te sunumi wali pao.