1 Kings 4:25-32

²⁵Ma n’umngin nap’an ni i par nib fos, ma girdi’ u ga’ngin yang u lan yu Judah ngu Israel e ra pired nde buch ban’en rorad, ra reb e tabnaw ma bay e grape nge gek’iy ni fig ni fi’in.

²⁶Me Solomon e immoy 40,000 e chumol rok ni fan ko os rok nma girengiy e chariot nge 12,000 e os ni fen e mael.

²⁷Ma fa ragag nge l’agruw i tolang ko am rok, e ra bagyad ma re pul nike pi’ ngak ni nge pi’ e ggan riy ngak Solomon ni Pilung, ni urngin nib t’uf rok nge urngin e pi’in yad ma un ko abich u lan e naun rok e pilung; gubin ngiyal’ ma yad ma pi’ urngin e tin nib t’uf.

²⁸Ma ku ra reb fapi tolang ko am ma ku ra pi’ e barley nge pan ni fan ko pi os nma girengiy e pi chariot nge fan ko gamanman ni yibe maruwel ngorad ko gin’en ni kanog ngorad ni ngar feked ngay.

²⁹Got e pi’ ngak Solomon e gonop nge tamilangan’ ni kay gi pag rogon, nge llowan’ ni kay gi ga’ ni dabkiyag i foleg.

³⁰Kab gonop Solomon ngak e pumo’on ni gonop u lan e ngek ara pumo’on ni gonop nu Egypt.

³¹I ir e th’abi gonop u fithik’ gubin e girdi’: ba gonop ngak Ethan ni be’ nu Ezrah, nge Heman, Kalkol, nge Darda, ni bogi pumo’on ni pifak Mahol, i garer bugwan u lan urngin e nam nib liyeg.

³²Me kameg dalip e bbiyu’ yu bugithin nib machib ma bay e gonop u fithik’ ma bpag e bbuyu’ e tang niki tunguy.