1 Kings 19:1-19

¹Ma Ahab awana Jezebel i vibenabenamei, aiwai anatapuna Elijah i kaukauei ma menanarena Baal ana peroveta anatapui i vununaiei.

²Ma Jezebel taupariverena i paritawanei Elijah awarina ma i pa, “Wenanarena marana au maratom, tau ana viraḡenim me au peroveta u viraḡenanei nanare. Mepa da wenanare eḡa ana kauei, a raraupari da god ina kovoḡa-kaueu bo ina viraḡeniu.”

³Elijah i rovo ma ana lawana aubaina i ruba. I nae au Beersheba au Judah, ma kampa ana taunola i voterei.

⁴Ma tauna ainelana i nae aupom au mutulua, ma i ḡeta ai brum au ḡouna ma i kiala ma i raupari da ita iraḡe. I riwa i pa, “Bada, tau malau a vai-avei. Au lawana ma vaitawanei marina, tau irairaḡeu, me noinoiu.”

⁵Ma i mae-ḡaera ai brum au karena ma i matave. Ma maratagogi Bada ana anela Elijah i vodadani ma i riwa, “Ma vomairi, ma am.”

⁶I ʼnana viravira ma i matamatave lana au kolanei palawa apuapunana ma waira aniuma. I am ma i uma ma i matave me.

⁷Bada ana anela i nememei, i vodadani ma i riwei, “Ma vomairi ma ma am aubaina am vaḡai ina manawa guratana.”

⁸Elijah i vomairi da i am ma lamnei rewapana i vaia da ina babara aupom 40 ma maratom 40 da au Sinai, Bada ana au ola i ḡeta.

⁹Ma kampa i ḡeta au guba ma i matave. Wate Bada i riwa, “Elijah weka aiwai e kaukauei?”

¹⁰Elijah i paribelei, “Oo Bada vivirewapana kaukauam, Tau mara nonoa tam a viborumem - tam ainelam. Mai Israel am parivainuaḡana bagibagina i viaigai, am pulo aniapuna i viairikarikai, ma am peroveta i viraḡena-pai, tau ainelau i votereu, ma marina i ḡoei da tau maiteni ina viraḡeniu!”

¹¹Bada i riwa, “Ma opu au ola ma au naoi ma mairi.” Ma Elijah kampa i maimairi ma labu ḡaeḡaena olana i ravi, da i gunevi, wate bada eḡa nai kojikojirana au orana. Ive au murina lolo, wate Bada eḡa nai lolona au orana.

¹²Lolo au murina ai araratana, wate Bada eḡa nai aina au orana. Ma ai au murina pariararava jinajinana i nonori.

¹³Maranai Elijah wei i nonori ana kwama i vaia da naona i purui ma i opu guba au naona i mairi. Ma pona i riwa, “Elijah weka aiwai e kaukauei?”

¹⁴I paribelei, “Oo Bada God, vivirewapana kaukauam, mara nonoa tam ainelam aubaim a vivilaraḡa. Wate Israel ravai am parivainuaḡana bagibagina i geduaiei, am pulo aniapuna i rikanaiei, ma am peroveta anatapui i viraḡeni. Tau ainelau a mamae. Ma marina i ḡoei da tau maiteni ina viraḡeniu.”

¹⁵Bada i riwa, “Meiei e nenei nanare ma nae me, ma ma‑rui au mutulua Damaskas, maranai u ḡeta au taon, Hasael ma buloi, mai Syria ai gulau;

¹⁶Nimshi natuna Jehu ma buloi Israel ai gulau, ma Shaphat natuna Elisha, ana taon Abel-Mehola ma buloi peroveta da am gabu ina vaia.

¹⁷Aiavoi da Hasael i rovoei da e rubaruba, Jehu taui ina viraḡeni ma aiavoi da Jehu i rovoei da e rubaruba, Elisha taui ina viraḡeni!

¹⁸Wate mai Israel ai maḡa 7,000 eḡa melanai Baal ita raudunelei bo kokoitaui ita vigia-laḡolaḡonei, ina lawana!”

¹⁹Ma Elijah i nae da Shaphat natuna Elisha i viaroni doa i uauatai, bulumakau 12 ruaruaḡei ava raḡiraḡitai aniuata i taitaini ma i uauata. Elisha ana bulumakau, au murioina i nolanola. Elijah i ḡaira awarina ma ana kwama i votawanei ma Elisha i vioteni.