26Ia ese Lohiabada ena vairana dekenai ia kara dika, iena tamana ia karaia bamona, bona ia ese Israela taudia ia hakaua kerere dainai, idia danu be kara dika idia karaia.
27Basa Ahaisa, Isakara iduhu tauna, ese Nadaba hadikaia totona ia laloa karaia, bona Nadaba, mai ena Israela tuari taudia ese Pilistia hanua Gibetona idia tuari henia, bona idia koua hagegea neganai, Basa ese Nadaba ia alaia mase.
28Inai kara be Iuda ena king Asa ia king lagani ihatoina lalonai ia vara. Basa ese Nadaba ena gabu dekenai Israela ena king ena dagi ia abia.
29Basa ese king dagi ia abia, vadaeni maoromaoro ia ese Ieroboama ena bese taudia ia alaia hamatamaia. Vadaeni iena peroveta tauna Abaisa ena uduna dekena amo, Lohiabada ese ia gwauraia hereva be momokani, badina Ieroboama ena bese taudia ibounai be Basa ese ia alaia mase, ta ia mauri lasi.
30Inai kara ia vara, badina be Ieroboama ese Lohiabada, Israela ena Dirava ia habadua. Ieroboama ese kara dika bada ia karaia, bona ia ese Israela taudia ia hakererea dainai, idia danu kara dika bada idia karaia. Unai dainai Lohiabada ena badu ia toreisi.
31King Nadaba ena kara oredia edia sivarai be Israela Ena King Edia Sivarai Buka lalonai idia torea vadaeni.
1 KING TAUDIA 15
1 KING TAUDIA 15:26-31