1. King 22:25-36

²⁵Nge Mikaia a üra, “Kopwap püsin mefi lon ewe rän, lupwen kopwe tolong lon rumwen lon eu imw pwe kopwe op.”

²⁶Mürin, ewe kingen Israel a üreni eman nöün kewe nöüwis, “Kopwe turufi Mikaia o emwenala ren Amon kepinan ewe telinimw, pwal ren Joas nei we mwän.

²⁷Kopwe üreniir pwe repwe aturalong ei mwän lon imwen fötek o akükünü anan mongö me ünüman koluk tori üpwe liwinto fän kinamwe.”

²⁸Nge Mikaia a üra, “Are ka liwinto fän kinamwe, ewe Samol mi Lapalap esap kapas me rei.” A pwal apasa, “Oupwe aüselinga ai kei kapas, ämi aramas meinisin.”

²⁹Mürin, Ahap ewe kingen Israel me Jehosafat ewe kingen Juta ra feila Ramot-kiliat pwe repwe maun ngeni.

³⁰Nge Ahap a üreni Jehosafat, “Üpwe asokala üfei le feila maun, nge en kopwe üföüf üfom üfen king.” Iei mine ewe kingen Israel a asokala üfan o feila maun.

³¹Nge ewe kingen Siria a allük ngeni ekewe ilik me ruoman meilapen waan woken, “Ousap maun ngeni aramas mi kis ika aramas mi lap, nge oupwe chök maun ngeni ewe kingen Israel.”

³²Iei mine, lupwen ekewe meilapen ekewe woken ra küna Jehosafat, ra apasa, “Ellet, inaan i ewe kingen Israel.” Mürin ra kul pwe repwe fiu ngeni. Nge Jehosafat a puchör.

³³Lupwen ekewe meilapen ekewe woken ra küna pwe sap i ewe kingen Israel, ra liwin seni ar tapweri.

³⁴Iwe, eman sounfiun Siria a chök äsesser le likapichiela wokun esefich, nge ewe esefich a küw ewe king Ahap lefilen fichin üfan üfen maun. Iei mine ewe king a üreni ewe mi wisen uwei waan woken, “Kopwe kul o uweeila seni ei maun, pun ngang üa kinas.”

³⁵Lon ewe rän ewe maun a pöchökülela, nge ewe king a chök aünnala won waan woken kulu ngeni ekewe chon Siria. Iwe, ewe cha seni kinasan a putiu lefön ewe woken, nge lekuniol a mäla.

³⁶Nge lupwen akkar a tuputiu, eman me lein ekewe sounfiun Israel a kökö, “Eman me eman mwän epwe liwiniti en me an telinimw me en me fanüan.”