1 Kiŋi 18:6-36

⁶Nakamba mendali mendalipi yuu anjarename paramba lao lao mendakinya palyapala kata nyuo wakale wakale peyambi.

⁷Dokopa Opetaya enye katasa peyamopa aopa Ilainja epeyamo kando nyiya. Nyepala baame Ilainjaŋa lao lenge kambu kandapala baa epeyamo dokona pangu isa siya. Sepala baame piso soo lao, Doko angi embase? leya.

⁸Dokopa baame isingi lao, Waa, namba Ilainjaŋa. Namba dae epanyeŋe lao embena kamongo doko lamaila puu, leya.

⁹Dokopa Opetayame isingi lao, Nambame aki yulu koo pipusa embame randa dokona pyambwalana suu pyao kiŋi Ayapeme pyao kumakana lao letese? leya.

¹⁰Embena Anatu lete karenge Kamongo dokona kingi lalu lao lao yuu muu dupwa peparaena awali lao kiŋi dokome emba koto papipya. Yuu gii mendepape isingi akali dokome emba yuu dokona kara naeŋe lao lamaiyamopa Ayapeme baa doko angiŋi lao lalu lao lena leto, leya.

¹¹Dokopa dee epapu embame namba emba dae epo karene lao baa lamaila pupili lao suu pilisi? leya.

¹²Nambame emba yaki nyuo parono yuu gii dokopa Kamongona Imambu dokome yuu kanda nange mendena emba nyuo lanyuo para ramo doko apa pirase? Dokopa emba dae karenge lao Ayape lamairu dokopa baa epo emba kotaramopa kara narene kandapala namba pyao kumakara. Namba wamba wane dokopa piso suu pingi keyange palyuo yuu peparae Kamongo lakando ateŋa lao karenge kandale doko emba suu pyaa, leya.

¹³Lapala dee lao, Enda Jesapele dokome Kamongona poropeta akali dupwa pyao kumakaya dokopa nambame akali andete mendaki (100) nyepala kananda lapona gurupu lama wasapala pingyu akalisa kingi paki (50) ingyapala yalu pyuo palena lapala nenge ipwape maipapu piyu doko emba see naese? leya.

¹⁴Dokona baame namba pyao kumakasaraŋa embame namba apa pyuo emba dae epo karene lao lamaila puu lao letese? leya.

¹⁵Dokopa Ilainjame isingi lao, Kamongo Porai Wakasa namba yulu pyakamingi dokona kingi lao lalu lao leto. Namba range kiŋi baa petamo dokona paro, leya.

¹⁶Leyamosa Opetayame kiŋi Ayape peteyamo dokona papala lamaiyamopa kiŋi Ayapeme kata nyuo Ilainja kandala epeya.

¹⁷Dokopa Ayapeme Ilainja kandapala dopa leya, Isaraele dokona randa andake palyuo karene doko emba epelene dokose, leya.

¹⁸Dokopa Ilainjame isingi lao, Nambame randa epena lao pii nange, leya. Embapa embena rakanepa yuu Isaraele dokona randa palyuo karambinyi. Emba mee bange anatu lao kingimi wasingi Bealo doko lakandapala Kamongona mawa pii dupwana kamba lao karene, leya.

¹⁹Lapala, Yuu kyau Kamele dokona Isaraele wambu dupwa peparae kee lao sukusa sukusa pipala namba kandala epena lape. Epo dokopa mee bange anatu kingimi wasisi kingi Bealo lenge dokona poropeta akali andete kisima dee akalisa kingi paki (450) dusipape dee mee bange enda anatu Asera lenge dokona poropeta akali andete kisima (400) kuini Jesapeleme paka pyao sipyamo karaminyi dupwa lanyuo epena leya.

²⁰Leyamosa kiŋi Ayapeme Isaraele wambu peparaepe dee mee bange anatu kingi Bealo lenge dokona poropeta akali dupwa peparaepe yuu kyau Kamele lenge dokona kee lao nyuo sukusa sukusa piya.

²¹Dokopa Ilainjame wambu dupwa peteyaminyi dokona papala dopa leya. Nakama suu pingi lama manjo karo anjokorape mendaki palyaramisi? Kamongo doko Anatu ramo baa lakandalapape. Dee Bealo doko Anatu ramo baa lakandalapape, leya. Dopa leyamopape wambu dupwame pii kuki mende laa nayami.

²²Dokopa Ilainjame lao, Nakama mee bange anatu lao lakandenge kingi Bealo lenge poropeta akali malu (450) karaminyi. Dopa pipyamopape Kamongona poropeta dokona namba iki pyarepala pupyamo karo, leya.

²³Lapala mena bulamakao kali lama nyelapape. Nyepala mende mee bange anatu lenge kingi Bealo dokona poropeta akali dupwana mende nyuo pyao kunjo kuki kuki pipala isa dokona ketae retapala isare kaiyuo palya nana. Namba mena bulamakao kali mende dokome dopako piru, leya.

²⁴Dokopa mee bange kingi Bealo anatu lao lakandenge poropeta dupwame nakamana anatu doko kando ateŋa larami. Laraminyi dokopa namba Kamongo kando ateŋa laro. Dokopa mendeme isingi yano pyakalyoŋo lao isare jera doko baa Anatuŋu, leya. Dokopa wambu peparaeme isingi lao, Doko kapaŋa, leyami.

²⁵Lapala dee Ilainjame mee bange Bealo lakandenge poropeta dupwa kando lao, Nakama malu dokona mena kali doko nyepala wambo rapa rapa pipwape. Pipala isa dokona isare kaiyuo palya napala nakamana mee bange anatu kando ateŋa lalapape, leya.

²⁶Leyamo dokopa nakamana mena minyakamyuo epeyaminyi doko nyepala wambo rapa rapa piyami. Pipala mee bange anatu kingi Bealo lenge doko kando ateŋa lao kareyaminyi pao yuu kwuaya. Dopa piyasa nakama pii ketae lao, Bealo namwa kando isingi yano pyakape, lao kana pyare leyaminyi dokona awali lao mee wamya lyuo lao kareyami. Kareyaminyipape mee bange anatu kingi Bealo dokona piso isingi mende laa naya.

²⁷Dokopa yuu gii korokama dokopa Ilainjame mee bange anatu kingi Bealo dokona poropeta dupwa kando minyako pyuo mora pii lao lao anatu Bealo dokona ateŋa poraiyuo pyalapape. Mende ramo baa korakama kombeya pilyamo panda mee kamanda pase panda baa kata londe mendasa pupyase. Panda baa luu palase dokona nakamame baa pyaleto minyalyuo nyeraminyi, leya.

²⁸Leyamo dokopa poropeta dupwame ateŋa pii ketae lao wamba mena pyao kiso maiyuo yulu palenge doko suu pyao wua kema dupwame nakama range poko pyao kareyaminyi pao ranjama epeya.

²⁹Epeyamo dokopa nakama pii kara pao ketae lao dee pii koo kae lao lao kareyaminyi pao alemanji ingiya. Ingiyamopape ateŋa isingi yano pyaope mende pii naya dee pii kuki mendepe leyamo siyaminde daako.

³⁰Dokopa Ilainjame wambu dupwa kando lao, Namba karo dakena repeta epena, leya. Leyamosa wambu peparae baa kareya dokona pao malu palyiyami. Dokopa baame Kamongona kana pyare lasi wambarae kwaeyamo doko kamba rolo pyare lao wasiya.

³¹Wasapala dokopa Kamongo dokome kingi Isaraele akali Jekope lao maiyamo dokona para piyamo rara akalisa ipisu lama (12) dusipana mendaki mendaki lao baame kana akalisa ipisu lamako (12) nyiya.

³²Nyepala kana dusipame Kamongo mena pyao kiso maiyuo lakandenge kana pyare lasi doko kamba pyare lao piya. Pipala suu nyuo awali leya. Doo suu nyiyamo dokona ipwa bakete lama make lita akalisa ipisu kisima ingyuo kulimbwaramo doko kapa isa pao seraŋa lao piya.

³³Dopa pipala enakana kana pyare lasi dokona isa ketae reteya. Retapala mena doko pyao kunjo kuki kuki pipala isa dokona ketae lambuo lae pyuo reteya. Retapala baame lao, Ipwa pee kuki kisima kamuo simbwapala kulimbuo mena dokona piso dee isa dokona piso pinya, leya. Leyamuli pyuo piyami.

³⁴Dokopa baame lao, Kambako pinya, leya. Leyamosa kambako piyami. Dokopa yuu mendaki kamba konda pyuo pinya, leya. Dokopa nakamame dopale piyami.

³⁵Dokopa ipwa doko kana pyare lasi dokona makando lupyapala suu nyisi dokona soo simbwaya.

³⁶Dokopa mena pyao kiso maingi yuu gii alemanji dokopa kana pyare lasi dokona poropeta Ilainja repeta papala ateŋa lao, O Kamongo, Jekope, Aisake, Aporakamemoo dusipana Anatu, namba embena kendemande yulu pyakange dokome embena mawa pii lapinyili pyuo dapwa pyakapu dokonape epapu emba Isaraele wambunya Anatuŋu laope pakanya palyuo lasaka pepe.