1 Corinthians 11:11-24

¹¹Na lei tinoni tara sakaisonikolu itatana Lord, na lei vaivine tara mua tughuru heghedira itadira na lei mane. Vagha ghua na lei mane tara mua tughuru heghedira itadira na lei vaivine.

¹²Ma sakai vamua na vuivuni ni vaivine te mai tana mane, imurina keri, na lei tinoni soko tara sivuragha mai tua tana vaivine tana vuivunina mai, mana lei totobo soko tara va butu mai ta God.

¹³?Mi vei te ghaghua, e maemane vania so na vaivine ke kokoeliulivuti vania God tana vure subo ge ke mua poroa na uluna?

¹⁴Ighita udolu ta ghilalaa, e mua uto vania na mane ge ke raui na vuvulu ni uluna. E vatei mamaagha.

¹⁵Mi ghita ta ghilala ghua, ma ge teke raui na vuvulu ni uluna na vaivine ke, aeni te nei na reireina ge ke uto, na pukuna God te vahea ge ke kuvihia nia na uluna.

¹⁶Ma ge siki sakai ke liona na niana hughuhughu ke, mana hava ku bosaa vamua ke, ighita maia nina holohoru God ta loghoa sakai na nilabu vamua itatada.

¹⁷Mana hava ku bosaa tana ghanaghana eni ke, ku mua holoutoghau na pukuna te mua uto vanighau na hava tau nea tana bona tau vaukolu koukolu.

¹⁸Tana vuivuni, inau tu rongo ke, mau vokavoka ighobumiu tana bona tau vaukolu ni holohoru. Mi tana balu ghanaghana ke, mu taluutunia sughua te utuni,

¹⁹na pukuna, na lei vokavoka tara kale ge ke talutatera arahei tamiu kara taonia sughua God.

²⁰Tana bona tau vaukolu mau holai mai na vanga ni vatei vanga koukolu tana vangatabu ke, na hava tau gonighi te mua uto.

²¹Tu ghilala te utuni so, na pukuna tu rongovia, mau mina tua na ghaniani na ghamiu na vanga heghemiu, mau mua tuvalira na balu. Te vagha tau nei iga ke, mana balu itamiu tara vitolo mara inu bulebule.

²²?Ivei tea, au mua loghoa na puku ni valemiu kau vanga ma kau inu iga? Na nilabu keri tau gonia te talutatea tau mua nia kikinima nina holohoru God, ma kau nera rana bona ge kara maa! Mana hava ku ghoi bosai iga na lei totobo raini? E liomiu inau ge ku talumavaghau? E taho tua, ku mua tangomana!

²³Ma eni vaho tua na hava a Lord te bosaa heghena, te vagha tu nea iga na holaana inau ke, mi nau tu vaheghau gatu tua. Mi tana bongi Judas te peroa iga, a Lord Jesus te lavia na berete.

²⁴Mi murina te holoutoa God, ge ngitia me ghaghua, “Aeni na huligu tu vaheghau. Kau gonia te vagha eni nia na vatei ghanaghana oliagu.”