1 Baṉara 22:27-42

²⁷Mamu zama guahe, ‘Guahe si zama nia sa baṉara: va nuquria sa tie hie pa vetu varipusi meke loketoṉa si kote poni nia gamu, ba bereti meke kolo mo, osolae kamo pule va leana si rau,’ ” gua si asa.

²⁸Meke zama vura se Mikaea, “Be guana kamo pule va leana agoi si lopu hite zama koa rau se Zihova.” Meke zama hoda la si asa, “Mi balabala i gamu doduru, sari na qua zinama!” gua si asa.

²⁹Ke sage la pa Ramoti Qileadi sa baṉara pa Izireli meke Zehosapati sa baṉara pa Ziuda.

³⁰Meke zama sa baṉara pa Izireli koe Zehosapati, “Totoso somana si gita kara pa vinaripera si kote lopu vata gilana pule nau si rau, ba agoi si kote va sagei goi sari na mua poko baṉara.” Ke sa baṉara pa Izireli si lopu vata gilana pule nia meke nuquru la si asa pa vinaripera.

³¹Ego sa baṉara pa Siria si ele tozi ni sa sari nana koimata koari ka toloṉavulu rua totopili varipera, “Raza ekea mo sa baṉara pa Izireli ba lopu raza votiki tie lamae be hiteke babe nomana.”

³²Ke totoso dogoria ri na koimata pa totopili varipera se Zehosapati, si balabala si arini, “Hinokara hie hokara mo sa baṉara pa Izireli,” gua. Ke taliri si arini pude la raza ia, ba sipu velavela vura se Zehosapati,

³³si tiqe dogoria rina koimata pa totopili varipera sapu lopu asa sa baṉara pa Izireli, ke noso, lopu hadu lulia rini.

³⁴Ba gona va tapotapoe nia keke tie varipera pa Siria sa nana bokala meke la goto sa tupi koe Ehabi sa baṉara, pa vari korapana sa vinari hodana sa poko raqaraqa tanisa. Ke kukili vura la si asa koasa nana tie kalaha pa totopili varipera. “Kei bakora si rau! Kekere pule, mamu vagi vura nau koasa vinaripera!” gua.

³⁵Doduruna sa rane si nono la mo sa vinaripera, meke sa baṉara si habotu ta zuka sage eko nana mo pa nana totopili varipera, tia la i sa sari na tie Siria. Sa ehara pa bakorana si zoloro gore la pa hatarana sa totopili varipera, meke pa veluveluna asa si mate si asa.

³⁶Sipu tata lodu sa rimata, si ene si keke zinama pa korapana sa qeto minate, zama guahe, “Hopeke tie, pule pa mia vasileana; doduru tie, pule pa mia hopeke popoa!”

³⁷Ke mate sa baṉara ke paleke la nia rini pa Sameria meke pomunu nia rini si asa vasina.

³⁸Sa totopili varipera si ṉuzapia rini koa keke kopi pa Sameria vasina hoke huhuve sari na tuturue, meke vasina si mea ia ri na siki sa eharana, gua pu tozia sa zinama te Zihova.

³⁹Sapu koari kaiqa ginugua pa binaṉara te Ehabi, somanae sari doduru sapu taveti sa, sa vetu baṉara sapu kuria sa meke va kadakada ni livo elopaniti, meke sari na vasileana lavata sapu kuri va ṉiṉirai sa, si ta kubere pa korapana Sa Buka Tinozi tadi na Baṉara pa Izireli.

⁴⁰Mate meke magogoso se Ehabi turaṉae koari na tamana. Meke Ahazaea sa tuna koreo si hobena si asa koasa binaṉara.

⁴¹E Zehosapati, sa tuna koreo e Asa, si tava turu pude na baṉara pa Ziuda pa korapana sa vina made vuahenina e Ehabi sa baṉara pa Izireli.

⁴²E Zehosapati si toloṉavulu lima vuahenina meke tava baṉara si asa, meke ka hiokona lima vuaheni si koa baṉara pa Zerusalema si asa. Sa tinana si e Azuba, sa tuna vineki e Silihi.