1 Ḡaliḡalibona 19:3-21

³Kamaina bi Elaidiya i naila bi ena yawasana aubaina i velau i nawa. Bi sauginemo Biyasiba taunina Diuda noponemo i tava ba ḡome ena taupaula i ḡose kamaḡe.

⁴Bi laḡan ḡemota noponemo tana taunaḡa kalakalalelemo i nawa aupom. Bi kai isana ḡiliḡili pakanemo i tava bi i miya tulu bi peki aubaina i laupalina gado, “Bada, tagu kamaina, i visu te egu yawasana kwa kaikamaḡe. Tagu kaikana e peki mai egu magumagula pekipekidi.”

⁵Kamaina bi i guli yovo, i kena te i wainuwayavuḡa. Bi aneya i waimaḡemoti te i lainuwesi bi i giuwena gado, “Ku kena moito bi kwa kani.”

⁶Elaidiya i kena moito bi i wai laulaukita ba buledi gabugabuna bi gauba dubina kununa yawannemo a kenakena. Kamaina bi buledi i kani bi gauba i tego bi i guliyovo te i kena munaḡa.

⁷Kamaina bi Bada ena aneya i lainuwesi munaḡe bi i giuwena gado, “Ku kena moito bi kwa kani bagibagi. Banina maneka i lofa bi mote kuma voiye ba mote luvam te kwa nawa.”

⁸Taunana aubaina i kena moito bi buledi i kani bi gauba i tego. Bi yasidimo i babalana laḡan 40 bi dudubala 40 te Maimaituwa ena oya Sainaimo i tava.

⁹Bi mba dudubalinemo ba guba noponemo i sola nawa te i kena. Bi dudubalemo Bada, Elaidiya i giuwena gado, “Tam niga ḡome bai kwa voivoiye.”

¹⁰Bi Elaidiya i giuna gado, “Maimaituwa ḡaiḡailisi guletim, tagu sauga matabuna tam taumḡa aubaim e noyanoya. Bi geḡa te Islael lavedi em waianina bagibagina a daboke bi em olta a dousuwesuwedi. Bi taugiuwatam matabudi kepatemo ai peki kovidi. Bi tagu tauguḡa ya miyamiya bi niganana sa ḡoeḡoena kota sai pekigu.”

¹¹Bi Bada Maimaituwa Elaidiya i giuwena gado, “Kwa laupotiyovo bi kwa nawa oyamo bi matagumo kwa moito.” Kamaina bi Elaidiya i nawa oyamo i moito. Bi Bada matanaḡa i natonato bi yavala bagibagina i laulausuve te oya i nuwagunevi, te ḡakima a dabalala bi Bada mote yavalemo. Bi yavala mulinemo ba yoyo bi Bada mote yoyomo.

¹²Bi yoyo mulinemo ba kai menamenana bi Bada mote kai menamenanemo. Bi kai menamenanana mulinemo ba waikasakasavena i vaiye.

¹³Bi sauginemo i vaivaiye ba ena gala i solu yovoḡe matana i waigove bi i potiyovo guba mataetinemo i moito. Kamaina bi kalina i giuwena gado, “Elaidiya niga ḡome bai kwa voivoiye?”

¹⁴Bi Elaidiya i giuna gado, “Maimaituwa ḡaiḡailisi guletim, tagu sauga matabuna tam taumḡa aubaim e noyanoya. Bi geḡa te Islael lavedi em waianina a daboke bi em olta a dousuwesuwedi. Bi taugiuwatam matabudi kepatemo ai peki kovidi. Bi tagu tauguḡa yà miyamiya bi niganana sa ḡoeḡoena kota sai pekigu.”

¹⁵Kamaina bi Bada i giuwena gado, “Bamo etanaḡa kuna saḡasaḡana kota maiḡa kwa munaḡa, te kwa nawa Damaskas kalakalalelenemo. Bi sauginemo ḡome kuna tavana ba kwa nawa taun noponemo bi Eisel dabanemo buyobuyo kwa ḡini bi kwai mataile te tana ba Sailiya edi ḡalibona.

¹⁶Bi Nimsi natuna Yeḡu dabanemo buyobuyo kwa ḡini bi kwai mataile te tana ba Islael edi ḡalibona bi Safeti natuna Elisa, Eibol Meḡola lavana dabanemo buyobuyo kwa ḡini bi kwai mataile te tana ba gabum ya vai te taugiuwatana.

¹⁷Bi aiyai Eisel lisinemo i naila i nawana ba Yeḡu yai peki. Bi mabai Yeḡu lisinemo a naila a nawana ba Elisa yai pekidi.

¹⁸Bi Islael lavedi 7 tausan mabai mote Bal a lauduneyedi bi aluwidi mote ai suluvedi, tedi ba sa miya.”

¹⁹Kamaina bi Elaidiya i nawa te Safeti natuna Elisa i banavi ena daibimo i suwasuwata. Bi ḡome ba anisuwata bulumakau labulabuḡa wapedi 12 bi wai 12-na i suwasuwatae. Bi i nawa lisinemo te ena kwama i vai te Elisa dabayalonemo i wailauvana bi i nawa.

²⁰Kamaina bi Elisa i velau Elaidiya mulinaḡa bi i giuwena gado, “Aee kwai aninegu te ya nawa tamagu bi tinagu yai yebonedi bi yài suluvedi kaka yà nato te yà kaiwatam.” Ḡome te Elaidiya i giuwena gado, “Kwa nawa bi bai lisimmo e voivoiyena kwa noḡoti.”

²¹Kamaina bi Elisa i munaḡa ena daibimo ena bulumakau labu i waipekidi. Bi ani suwata kaidi i koisuwesuwedi bi musala i laugabusila bi lava i vitedi a kani. Ḡome te Elisa i nawa bi Elaidiya aubaina i waitaupaula.