1 ዮሃኒሳ 5

1

2

3

4

5

¹ዬሱሲ ኢዚ ኪርስቶሳ ጊዲዳይሳ ኣማኒዛይ ዉሪ ፆሳፌ ዬሌቲዴስ። ኣዋ ዶሲዛይ ዉሪ ናዛካ ኢዛꬆ ዶሴስ።

²ኑኒ ፆሴ ዶሲኮኔ ኢዛ ኣዛዞ ናጊኮ ኑ ፆሳ ናይታ ሲቂዛይሳ ሄሳን ኤሮስ።

³ፆሳ ዶሶ ጉሲ ኢዛ ኣዛዞ ናጎ፤ ኢዛ ኣዛዞቲ ዴፆ ጊዴቴና።

⁴ጋሶይካ ፆሳፌ ዬሌቲዳይ ዉሪ ኣላሜ ፆኔስ። ኣላሜ ፆኒዛይካ ኑ ኣማኖ።

⁵ዬሱሲ ፆሳ ና ጊዲዳይሳ ኣማኒዛዴፌ ኣቲን ኣላሜ ፆኒዛይ ሃራይ ኦኔ?

⁶ሃꬃኒኔ ሱꬃን ዪዳይ ሃይሳ ዬሱስ ኪርስቶሳ። ኢዚ ሃꬃኒኔ ሱꬃን ዪዴስ ኣቲን ሃꬃን ፃላ ዪቤና። ሄሳካ ኢዛ ጊሽ ማርካቲዛይ ኣያና። ሄ ኣያናይ ቱሙ ኣያና።

⁷ሄሳ ጊሽ ኢዛስ ሄꬑ ማርካቲ ዴቴስ።

⁸ሄይቲካ ኣያና፥ ሃꬄኔ ሱꬃ፤ ሄꬓታ ቃላይካ ኢሲኖ።

⁹ኑ ኣሳ ማርካቴꬅ ኣማኒኮ ፆሳ ማርካቴꬂ ሄሳፌ ኣꬌስ። ሄሲካ ኢዚ ባ ናዛ ጊሽ ኢሚዳ ፆሳ ማርካቴꬃ።

¹⁰ፆሳ ናን ኣማኒዛዴ ኡባ ዎዝናን ኢዛ ጊሽ ማርካይ ዴስ። ፆሴ ኣማኖንታይ ዉሪካ ፆሲ ባ ናዛ ጊሽ ኢሚዳ ማርካቴꬃ ኣማኖንታ ጊሽ ኢዛ ዎርዶሴስ።

¹¹ኢዛ ማርካቴꬃይካ ፆሲ ሜርና ዴዖ ኑስ ኢሚዴስ፤ ሄ ዴዖይካ ኢዛ ናዛን ዴስ ጊዛይሳ።

¹²ናዚ ዲዛዴስ ዴዖይ ዴስ፤ ፆሳ ናይ ባይንዳዴስ ዴዖይ ባዋ።

¹³ኢንቴስ ፆሳ ናን ኣማኒዛይታስ ሜርና ዴዖይ ዲዛይሳ ኢንቴ ኤራና ማላ ታ ሃይሳ ኢንቴስ ፃፋይስ።

¹⁴ኑ ፆሳ ሲንꬅ ሺቃናስ ኑስ ዲዛ ፃላቴꬂ ሃይሳ። ኑ ኣይ ሚሺካ ኢዛ ሼኔ ማላ ዎሲኮ ኢዚ ኑ ዎሳ ሲያና።

¹⁵ኑ ኢዛ ዎሲዛ ሚሽ ኢዚ ዉርሲ ሲዪዛይሳ ኑ ኤሪዛ ጊዲኮ ኑ ዎሲዳ ሚሻ ዉርሲ ኤካናይሳ ኑ ኤሮስ።

¹⁶ኦኒካ ባ ኢሻይ ባና ሃይቆስ ጋꬆንታ ናጋራ ኦꬂሺን ቤዪኮ ኢዛስ ዎሶ። ፆሲካ ሃይቆስ ጋꬆንታ ናጋራ ኦꬂዳይታስ ዴዖ ኢማና። ሃይቆስ ጋꬂዛ ናጋራይካ ዴስ። ሃይቆስ ጋꬂዛ ናጋራ ጊሽ ዎሶ ጊኬ።

¹⁷ማካላይ ዉሪካ ናጋራ፤ ሃይቆስ ጋꬆንታ ናጋራይካ ዴስ።

¹⁸ፆሳፌ ዬሌቲዳይ ዉሪ ናጋራ ኦꬄና፤ ጋሶይካ ፆሳ ናይ ኢዛ ናጊዛይሳኔ ኢታይ ኢዛ ቦቾንታይሳ ኑ ኤሮስ።

¹⁹ኑኒ ፆሳፌ ጊዲዳይሳኔ ኣላሜይ ኩሜꬅ ኢታ ኣሳ ኩሼን ዲዛይሳ ኑ ኤሮስ።

²⁰ፆሳ ናይ ዪዳይሳ ቱሙ ጊዲዳ ኢዛ ኑ ኤራና ማላ ኣኬካ ኢዚ ኑስ ኢሚዳይሳ ኑ ኤሮስ። ኑካ ቱሙ ጊዲዳ ኢዛ ናዛ ዬሱስ ኪርስቶሳን ዶስ፤ ኢዚካ ቱሙ ፆሳን ሜርና ዴዖ።

²¹ናይቶ! ኢንቴናቴꬃ ኤቃታፔ ናጊቴ።