1 ዮሃኒሳ 3

1

2

3

4

5

¹ኑኒ ፆሳ ናይታ ጌቴታና ማላ ኣዋይ ዳርሲ ሲቂዳ ኢዛ ሲቆይ ኑስ ኣይ ማላ ጊታኮኔ ኣኔ ቤዪቴ! ቱሙካ ኑ ኢዛ ናይታ። ኣላሜይ ኑና ኤሮንታ ኣጊዳይ ኢዛ ኤሮንታ ኣጊዳ ጊሻሳ።

²ታ ኢሻቶ! ኑኒ ሃዒ ፆሳ ናይታ፤ ቡሮ ኑ ኣይ ሃናናኮኔ ሃዒ ቆንጪቤና፤ ኪርስቶሲ ቆንጪዛ ዎዴ ኑ ኢዛ ቤያናኔ ኑካ ኢዛ ሚሳታናይሳ ኑ ኤሮስ።

³ሃይሳ ኢዛን ሂዶታ ኦꬂዛይ ዉሪ ኢዚ ጌሽ ጊዲዳ ማላ ባና ጌሼስ።

⁴ናጋራ ኦꬂዛይ ዉሪካ ማካላ ኦꬄስ፤ ናጋራይካ ማካላ።

⁵ኢዚ ናጋራ ꬋይሳናስ ቆንጪዳይሳ ኢንቴ ኤሬታ። ኢዛን ናጋራይ ባዋ።

⁶ኢዛን ዲዛ ኣሲ ኦኒካ ናጋራ ኦꬄና። ናጋራ ኦꬂዛዴይ ኦኒካ ጊዲኮ ኢዛ ቤይቤና ዎይኮ ኤሪቤና።

⁷ታ ናይቶ! ኢንቴና ኦኒካ ባሌꬆንታ ማላ ናጌቲቴ። ኢዚ ፂሎ ጊዲዳ ማላ ፂሎ ኦꬂዛዴይካ ፂሎ።

⁸ናጋራ ኦꬂዛይ ፃላዔፔ፤ ጋሶይካ ፃላዔይ ኮይሮፔካ ናጋራ ኦꬂዛዴ። ፆሳ ናይ ቆንጪዳይካ ፃላዔ ኦሶ ላላናሳ።

⁹ፆሳፌ ዬሌቲዳይ ዉሪ ናጋራ ኦꬄና። ፆሳ ዜሬꬂ ኢዛን ዲዛ ጊሺኔ ኢዚ ፆሳፌ ዬሌቲዳ ጊሽ ናጋራ ኦꬃና ዳንዳዬና።

¹⁰ፆሳ ናይቲኔ ፃላዔ ናይቲ ሻኬቲ ኤሬቴዛይ ሄሳና። ፂሎ ኦꬆንታይኔ ባ ኢሻ ሲቆንታይ ዉሪ ፆሳፌ ጊዴና።

¹¹ኢንቴ ኮይሮ ሲዪዳራ “ኑ ኑ ጋርሳን ሲቄታና ቤሴስ” ጌቴቲዳ ኪታያ ሃኖ።

¹²ኢታ ባጋ ጊዲዲ ባ ኢሻ ዎꬊዳ ቃዬሌ ማላ ጊዶፒቴ። ኢዚ ኣዛስ ዎꬊዴ? ጋሶይካ ኢዛ ኦሶይ ኢታ፤ ኢሻ ኦሶይ ሎዖ ጊዲዳ ጊሻሳ።

¹³ታ ኢሻቶ! ኢንቴና ኣላሜ ኣሳይ ኢፂኮ ማላሌቶፍቴ።

¹⁴ኑኒ ኑ ኢሻታ ዶሲዛ ጊሽ ሃይቆፔ ጌዴ ዴዖን ፒኒዳይሳ ኑ ኤሮስ። ሲቆይ ባይንዳዴይ ዉሪ ሃይቆ ጊዶን ዴስ።

¹⁵ባ ኢሻ ኢፂዛዴይ ሼምፖ ዎꬊዳ ኣሳ። ሼምፖ ዎꬊዳዴስ ሜርና ዴዖይ ባይንዳይሳ ኢንቴ ኤሬታ።

¹⁶ዬሱስ ኪርስቶሲ ባ ሼምፖ ኑ ጊሽ ኣꬂ ኢሚዳ ጊሽ ሲቆይ ኣዛኮኔ ኑ ሄሳን ኤሮስ። ኑካ ኑ ሼምፖ ኑ ኢሻታ ጊሽ ኣꬂ ኢማናስ ኑስ ቤሴስ።

¹⁷ሚሺ ዲዛዴይ ኦኒካ ባ ኢሻይ ዋዬቲሺን ቤዪዲ ኢዛስ ሚሼቶንታ ኣጊኮ ፆሳ ሲቆይ ኢዛን ዋኒ ዳኔ?

¹⁸ታ ናይቶ! ቱሙ ኦሶንፔ ኣቲን ጮ ዱናኒኔ ቃላን ፃላላ ሲቄቴꬅ ኣኔ ኣጎስ።

¹⁹ኑኒ ቱሙ ባጋ ጊዲዳይሳ ሃይሳን ኤሮሲኔ ኑ ዎዝናካ ኢዛ ሲንꬃን ሼምፒሶስ።

²⁰ሄሲካ ኑ ዎዝናይ ኑ ቦላ ፒርዲዛ ሚሻን ኡባን ፆሲ ኑ ዎዝና ቆፋፔ ቦላራ ጊዲዳ ጊሽ ኢዚ ዉርሲ ኤሬስ።

²¹ታ ኢሻቶ! ኑ ዎዝናይ ኑ ቦላ ፒርዶንታ ኣጊኮ ኑስ ፆሳ ሲንꬃን ባቢዛ ሚሺ ዴና።

²²ኑ ኣዛዞታ ናጊዛ ጊሺኔ ኢዛ ኡፋይሲዛዝ ኦꬂዛ ጊሽ ኑ ኢዛ ዎሲዛዝ ዉርሲ ኑ ኢዛፔ ኤካና።

²³ኢዛ ኣዛዞይካ ኑ ኢዛ ናዛ ዬሱስ ኪርስቶሳ ኣማናናሲኔ ኢዚ ኑና ኣዛዚዳ ማላ ኑኒ ኑ ጊዶን ዶሴታና ማላሳ።

²⁴ኢዛ ኣዛዞታ ናጊዛይቲ ዉሪ ኢዛን ዴቴስ፤ ኢዚካ ኢስታን ዴስ። ኢዚ ኑናን ዲዛይሳ ኑ ኢዚ ኑስ ኢሚዳ ኣያናን ኤሮስ።