1 ቴሴሎንቃ 1

1

2

3

4

5

¹ኑኒ ጳዉሎሲ፥ ሲላሴኔ ፂሞቶሲ ቴሴሎንቄን ዴዒያ ኣማኒያ ኣሳቶ ሃ ዳቢዳቢያ ፃፌቶ፤ ሄዋንቱ ፆሳ ኑ ኣቡዋንቶኔ ጎዳ ዬሱሲ ኪሪስቶሳዋንቶ፥ ኣꬎ ኬካቴꬃይኔ ሳሮቴꬃይ ጊዶ።

²ኑኒ ዎሳን ፆሳ ጋላቲዴ፥ ኡባ ዎዴ ሂንቴና ኡባቱዋ ሃሳዬቶ።

³ኑኒ ኑ ፆሳ፥ ኑ ኣዉዋ ሲንꬃን ኣማኑዋን ሂንቴንቱ ኦꬄዳ ኦሱዋኔ፥ ሲቁዋን ሂንቴንቱ ዳቡሬዳ ዳቡራ፥ ቃሲ ኑ ጎዳ ዬሱሲ ኪሪስቶሳን ሂንቴው ዴዒያ ሂዶታን ጌንጪያ ጌንጩዋ ኡባ ዎዴ ሃሳዬቶ።

⁴ኑናዳን ፆሳ ካሊያዋንቶ፥ ፆሳይ ሂንቴና ሲቂያዋኔ ሂንቴና ባሬው ናና ኦꬃናው ዶሬዳዋ ኑኒ ኤሬቶ።

⁵ኣዪሲ ጎፔ፥ ኑኒ ዎንጋላ፥ ዎልቃን፥ ጌሻ ኣያናኒኔ ሄ ዎንጌሊ ቱማ ጊዴዳዋ ዉርሲ ኣማኒያዋን ሂንቴንቶ ኣሄዳዋፔ ኣቲን፥ ኣሳ ቃላ ፃላላን ኣሂቤይኮ። ኑኒ ሂንቴናና ዴዒያ ዎዴ፥ ሂንቴንቱ ዲራው ዋኒ ዴዔዴንቶ፥ ሂንቴንቱ ኤሪታ።

⁶ቃሲ ሂንቴንቱ ዳሮ ዋዬቶፔካ፥ ጌሻ ኣያናይ ኢሜዳ ናሼቻን ኪታ ኣኬዲታ፤ ሄዋን ኑ ሌሚሱዋኔ ጎዳዋ ካሌዲታ።

⁷ሄዋ ዲራው፥ ማቂዶኒያኒኔ ኣካዪያ ጊያ ጋዲያን ዴዒያ ኣማኒያ ኡባቶ ሌሚሱዋ ጊዴዲታ።

⁸ኣዪሲ ጎፔ፥ ጎዳ ቃላይ ሂንቴፔ ኬሲዴ፥ ማቂዶኒያኒኔ ኣካዪያ ፃላላን ሲሴቲቤና፤ ሺን ፆሳ ሂንቴንቱ ኣማኒያዌ ኡባሳን ሲሴቴዳ። ሲሚ ኑኒ ሃሳያናው ኮሺሺን ኣቶዌ ኣይኔ ባዋ።

⁹ኣዪሲ ጎፔ፥ ኑኒ ሂንቴኮ ቤዳ ዎዴ፥ ሂንቴንቱ ኑና ዎቲ ሞኬዴንቶኔ ቃሲ ሂንቴንቱ ሂንቴንቱ ኤቃው ኦꬂያዋ ኣጊዴ፥ ዎርዶቴና ዴዑዋ ፆሳው ኦꬃናው ዋኒ ፆሳኮ ሲሜዲቴንቶ፥ ኡንቱንቱ ባሬንቱ ሁጲያን ሃሳዪኖ።

¹⁰ቃሲ ፆሳ ናዓይ ዬሱሲ፥ ፆሳይ ሃዪቁዋፔ ዴንꬄዳዌ፥ ኑና ሲንꬃፔ ያና ፆሳ ሃንቁዋፔ ኣሺያዌ ሳሉዋፔ ያናዋ ሂንቴንቱ ናጊያዋ ኡንቱንቱ ሃሳዪኖ።