1 ቴሴሎንቃ 4

1

2

3

4

5

¹ሲሚ ዉርሴꬃን፥ ኑናዳን ፆሳ ካሊያዋንቶ፥ ፆሳ ናሼቻናው ሂንቴንቱ ዋኒ ዴዓናው ቤሲንቶ፥ ኑፔ ታማሬዲታ። ሄዌ ሂንቴንቱ ካሴዴፔ ዴዒያ ማራ፤ ሺን ሃዒ ሂንቴንቱ ካሴዋፔ ሎይꬂዴ ኦꬃናዳን፥ ጎዳ ዬሱሳ ሱንꬃን ሂንቴና ዎሴቶኔ ዞሬቶ።

²ኣዪሲ ጎፔ፥ ኑኒ ጎዳ ዬሱሳ ማታ ባጋና ሂንቴንቶ ኢሜዳ ኣዛዙ ሃቃዌንቶ፥ ሂንቴንቱ ኤሪታ።

³ኣዪሲ ጎፔ፥ ፆሳይ ሂንቴፔ ኮዪያዌ ኣዬ ጎፔ፥ ሂንቴንቱ ጌሻ ጊዳናዋኔ ዎሹሚያዋ ኡባና ኣጋናዋ ኮዬ።

⁴ሂንቴንቱ ሁጲያን ሁጲያን ጌሻቴꬃኒኔ ቦንቹዋን ሂንቴንቱ ማቺያና ዎቲ ዴዓኔንቶ ኤራናው ቤሴፔ ኣቲን፥

⁵ፆሳ ኤሬና ኣማኔና ኣሳቱዋዳን፥ ሎይꬂ ኣሞቲያዋን ኣካናው ቤሴና።

⁶ኑኒ ቃሲ ካሴ ሂንቴንቶ ኦዴዳዋዳኒኔ ሂንቴና ሚኒሲ ዞሬዳዋዳን፥ ጎዳይ ሃዋ ማላባን ኡባን ሃሉዋ ኬሲያዋ ጊዲያ ዲራው፥ ኦኒኔ ሃ ዬዉዋን ባሬ ኢሻ ናቃናዉኔ ጪማናው ቤሴና።

⁷ኣዪሲ ጎፔ፥ ፆሳይ ኑና ጌሻቴꬃን ዴዓናው ፄሴዳዋፔ ኣቲን፥ ቱናቴꬃን ዴዓናው ፄሲቤና።

⁸ሄዋ ዲራው፥ ሃ ቲሚርቲያ ኢፂያ ኦኒኔ ሂንቴንቶ ባሬ ጌሻ ኣያና ኢሚያ ፆሳ ኢፄፔ ኣቲን፥ ኣሳ ኢፄና።

⁹ሂንቴ ሂንቴንቱ ሁጲያን ኢቱ ኢቱዋ ሲቃናዳን፥ ፆሳይ ሂንቴና ታማሪሴዳ ዲራው፥ ሂንቴንቱ ሂንቴንቱ ኢሻቱዋ ዎቲ ሲቃናው ቤሲንቶ፥ ኑኒ ፃፋናው ኮሼና።

¹⁰ቃሲ ማቂዶኒያ ቢታ ኡባን ዴዒያ ኢሻቱዋ ኡባቱዋ ቱሙ ሂንቴንቱ ሲቂታ። ሺን ኑናዳን ፆሳ ካሊያዋንቶ፥ ሂንቴንቱ ሄዋፔ ጉጂ ጉጂዴ ኡንቱንታ ሲቃና ማላ፥ ሂንቴና ዎሴቶ።

¹¹ኑኒ ካሴ ሂንቴንቶ ኦዴዳዋዳን፥ ዎፑ ጌዳ ዴዑዋ ዴዒቴ። ቃሲ ሂንቴና ኮሺያዋ ዴማናው፥ ሂንቴ ኩሺያን ኦꬂቴ።

¹²ሄዋ ጊዶፔ፥ ኣማኔናዋንቱ ማታን ሂንቴንቱ ቦንቼታናኔ ቃሲ ሂንቴና ኮሺያባው ኦናኔ ኣዉዳሺኪታ።

¹³ሺን ኑናዳን ፆሳ ካሊያዋንቶ፥ ሂንቴንቱ ሂዶታይ ባይና ኣሳቱዋዳን ካዮቴና ማላ፥ ሃይቄዳ ኣሳቱዋባ ሂንቴንቱ ኤራና ማላ ኮዬቶ።

¹⁴ኑኒ ዬሱሲ ሃዪቄዳዋኔ ቃሲ ሃዪቁዋፔ ኢ ዴንዴዳዋ ኣማኔቶ፤ ሄዋዳንካ፥ ፆሳይ ዬሱሳ ኣማኒዴ ሃዪቄዳዋንታ ዬሱሳና ኣሃናዋ ኣማኔቶ።

¹⁵ኣዪሲ ጎፔ፥ ኑኒ ሂንቴንቶ ኦዲያ ጎዳ ቃላይ ሃዋ፤ ኑኒ፥ ጎዳ ላዔንꬁዋ ዩሳ ጋላሳይ ጋካናው ሃዋን ፓፃ ዴዒያዋንቱ፥ ሃይቄዳዋንቱፔ ካሴቶኮ።

¹⁶ኣዪሲ ጎፔ፥ ጎዳይ ባሬ ሁጲያን ኣዛዙዋና፥ ኪታንቻቱዋ ካፑዋ ኮሻና፥ ፆሳ ማላካታ ጊሬꬃና ሳሉዋፔ ዎꬋና። ኪሪስቶሳ ኣማኒዴ ሃዪቄዳዋንቱ ካሴቲዴ ሃዪቁዋፔ ዴንዳና።

¹⁷ሄዋፔ ጉዪያን፥ ኑኒ ሄ ዎዴ ፓፃ ዴዒያዋንቱ፥ ጎዳና ጫርኩዋ ጊዶን ጋኬታናው ኡንቱንቱና ኢቲፔ ሻሪያን ዴንዳና። ሄዋ ዲራው ኑኒ ጎዳና ኢቲፔ ኡባ ዎዴ ዴዓና።

¹⁸ሄዋሲ፥ ሃ ቃላን ኢቱ ኢቱዋ ሜንꬄꬂቴ።