19Bechebe Jesusen', na' gože' ḻégake': —Le wžía yi' yodo' ni, na' yechonne žaze yechisan'.
20Naž benne' judío ka' belyi'e Ḻe', na' wnnágake': —X̱ope-yon yiz ba zej žóngake' yodo' nga, na' Le', ¿chonne žaze yechison'?
21Yodon', dan' bchaḻj Jesusen' chen, naken ḻa' kwinkze'.
22Che ḻen, katen' bebán Jesusen' ḻo yeḻa' got, bejsá' ḻáže'gak benne' wsedle chie' ka' kan wnné', na' bejḻé'gake' da' nyejw ḻe'e yiche la'y, na' ḻezka' da' bchaḻj Jesusen'.