ᤛᤣ᤺ᤰᤕᤢᤰᤔᤡᤒᤠᤜᤠ᤹ 21:30-40

³⁰ᤜᤧᤰᤁᤩᤠᤱ ᤕᤧᤰᤕᤰᤁᤥ ᤛᤡᤍᤠᤰ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧᤀᤠᤱ ᤁᤠᤰ ᤐᤡᤛᤠᤱᤗᤠᤶ ᤔᤏᤠᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤍᤩᤧᤖᤥ॥ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤍᤧᤶᤛᤢᤀᤠᤱ ᤔᤠᤱᤜᤡᤶᤗᤠᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢᤖ ᤔᤧᤗ᤺ᤳᤋᤢᤀᤠᤱ ᤂᤡᤔᤥ ᤔᤠᤱᤜᤡᤶᤗᤧᤴ ᤗᤠᤶᤎᤣ᤺ᤵᤜᤠ᤹ ᤔᤧᤛᤢᤒᤢᤖᤥ॥

³¹ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤔᤧᤃᤥ᤺ᤳᤋᤢᤸᤗᤧ ᤕᤖᤢᤛᤗᤧᤶᤔᤥ ᤜᤕᤱᤁᤡᤸᤗᤡᤱ ᤁᤧᤒᤥ᤺ᤱᤒᤠᤖ ᤁᤧᤒᤵᤐᤠ ᤀᤡᤱᤄᤱᤅᤡᤴ ᤖᤥᤔᤡ ᤋᤢᤖᤠᤛ᤻ᤔᤠ ᤌᤰᤋᤢᤶᤒᤠᤸᤗᤧ ᤁᤢᤏᤧᤰᤂᤥ᤹ᤀᤥ ᤋᤥ᤺ᤰᤋᤧ॥

³²ᤂᤡᤔᤥ ᤂᤧᤴ ᤌᤰᤋᤢᤶᤒᤠᤸᤗᤧ ᤁᤢᤓᤠ ᤋᤢᤶᤌᤰᤛᤢᤒᤠᤜᤠ᤹ ᤏᤢ ᤌᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤔᤏᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤗᤥ᤺ᤰᤋᤧᤖ ᤁᤧᤖᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤡ᤺ᤛᤢᤛᤡᤀᤠᤱ ᤐᤠᤘᤗᤧᤴ ᤜᤡᤵᤔᤠ ᤔᤧᤗᤧᤖᤢᤖᤥ॥

³³ᤂᤧᤴ ᤌᤰᤋᤢᤶᤒᤧᤴ ᤐᤣᤀᤠᤱ ᤐᤠᤘᤗᤧᤴ ᤋᤧᤶᤛᤢᤀᤠᤱ ᤏᤧᤳᤇᤡ ᤑᤧᤴᤛᤡᤰᤂᤡᤜᤠ᤹ᤖᤧ ᤀᤡᤄᤣ᤺ᤱᤔᤠ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤔᤏᤠ᤺ᤴ ᤜᤠ᤺ᤳᤏᤡᤒᤣ᥅ ᤜᤧᤰᤁᤩᤠᤱ ᤁᤸᤗᤧ ᤌᤣ ᤆᤥᤃᤢᤀᤠᤱ ᤘᤠ᤹᥅”

³⁴ᤂᤧᤴ ᤔᤏᤠᤜᤠ᤹ᤀᤥ ᤁᤢᤓᤠᤖᤧ ᤌᤡᤰ ᤐᤠ᤺ᤴ ᤔᤧᤒᤠ᤺ᤳᤋᤢ ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤘᤣ᤹ ᤐᤠ᤺ᤴ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧ॥ ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤂᤧᤴ ᤌᤰᤋᤢᤶᤒᤧᤸᤗᤧ ᤛᤧᤰᤂᤠ ᤐᤠ᤺ᤴ ᤌᤣᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤢᤔᤏᤠᤜᤠ᤹ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤌᤠ᤺ᤱ ᤋᤣ᤹ᤔᤠ ᤐᤠᤱᤄᤢᤛᤡᤖᤥ॥

³⁵ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤖᤣ᤹ᤀᤡᤴ ᤔᤧᤗᤡᤅᤢᤖ ᤔᤧᤒᤳᤇᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤳᤋᤡᤋᤡ ᤜᤕᤱᤁᤡᤸᤗᤡᤱ ᤔᤧᤈᤥᤃᤢᤀᤠᤱ ᤐᤠᤘᤗᤧᤴ ᤛᤧᤵᤔᤠ ᤔᤧᤃᤥ᤺ᤳᤋᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤐᤠᤘᤗᤧᤴ ᤔᤧᤒᤰᤂᤢᤀᤠᤱ ᤔᤧᤍᤣ᤹ᤖᤢᤖᤥ॥

³⁶ᤂᤧᤱᤜᤠ᤹ ᤂᤢᤏᤡ᤹ ᤀᤣ᤺ᤰᤀᤣ᤺ᤰ ᤂᤧᤴ ᤔᤏᤠ᤺ᤴ ᤛᤧᤖᤧᤶᤔᤧ᤹. ᤛᤧᤖᤧᤶᤔᤧ᤹ ᤗ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤍᤡᤶᤍᤢᤛᤡᤖᤥ॥

³⁷ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤋᤣ᤹ᤔᤠ ᤔᤧᤀᤡ᤺ᤳᤋᤢᤸᤗᤧ ᤐᤠᤘᤗᤖᤧ ᤌᤰᤋᤢᤶᤒᤧᤴ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤂᤧᤏᤧ᤹ᤏᤢ ᤁᤢᤓᤠ ᤐᤠ᤺ᤴ ᤐᤠ᤺ᤵᤔᤠ ᤛᤢᤰᤁᤠᤒᤡ᥅” ᤜᤧᤰᤁᤩᤠᤱ ᤂᤧᤴ ᤌᤰᤋᤢᤶᤒᤠᤸᤗᤧᤀᤠᤱ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤃᤪᤡᤁ ᤐᤠ᤺ᤴᤏᤠᤱ ᤐᤠ᤺ᤵᤔᤠ ᤁᤧᤗᤧᤛ᤻ᤛᤢᤒᤡ᥅

³⁸ᤜᤧᤰᤁᤣᤏᤧ ᤑᤠ᤹ᤃᤪ ᤁᤢᤓᤠ ᤋᤱᤒᤣ ᤋᤃᤡ ᤜᤠᤱᤒᤡᤑᤩᤢᤱ ᤁᤧᤜᤣ᤺ᤰᤐᤠ ᤂᤧᤴ ᤔᤡᤛᤪᤡ ᤔᤏᤠ᤺ᤱᤃ ᤂᤧᤏᤧ᤹ᤀᤣᤒᤡᤗᤠᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤂᤧᤸᤗᤧ ᤕᤧ᤺ᤱᤄᤠᤍᤧᤴᤏᤥ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤜᤠᤱᤒᤡᤑᤩᤢᤱᤒᤠᤜᤠ᤹ ᤗᤠᤶᤗᤥᤛᤢᤛᤡᤀᤠᤱ ᤘᤕᤧᤖᤥ॥”

³⁹ᤐᤠᤘᤗᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ. ᤀᤡᤱᤃᤠ᤹ᤃ ᤕᤜᤢᤍᤡᤀᤠ. ᤜᤧᤰᤁᤩᤠᤱ ᤛᤡᤗᤡᤛᤡᤕᤠ ᤌᤢᤶᤔᤥᤒᤠ ᤋᤠᤷᤛᤛ᤻ᤛᤥ ᤛᤠᤘᤠ᤺ᤴᤇᤡᤱᤅᤠᤱᤒᤠ॥ ᤀᤡᤱᤃᤠ᤹ ᤁᤧᤕᤧᤰᤐᤠ ᤕᤧᤰᤕᤰᤁᤥᤒᤠ ᤕᤰᤕᤢᤱᤒᤠᤀᤠ॥ ᤀᤠᤍᤠᤱᤒᤣ. ᤁᤴ ᤔᤏᤠᤜᤠ᤹ᤏᤢ ᤀᤡᤱᤃᤠ᤹ ᤐᤠ᤺ᤵᤔᤠ ᤐᤠᤱᤄᤠᤱᤅᤧ᤹ᤀᤥ॥”

⁴⁰ᤌᤰᤋᤢᤶᤒᤧᤸᤗᤧᤀᤠᤱ ᤐᤠ᤺ᤵᤔᤠ ᤋᤧᤴᤍᤡᤱ ᤐᤡᤖᤢ॥ ᤜᤧᤰᤁᤩᤠᤱ ᤐᤠᤘᤗᤧᤴ ᤌᤖᤣ᤹ᤗᤧ ᤏᤠᤱᤛᤣ᤺ᤰᤁᤥ ᤕᤧᤶᤛᤡᤱᤅᤠᤱ ᤔᤏᤠᤜᤠ᤹ ᤜᤢᤰᤆᤠ᤺ᤸᤁᤡ ᤐᤡᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠᤜᤠ᤹ ᤛᤫᤠ᤺ᤳ ᤔᤧᤒᤥ᤺ᤰᤂᤧᤀᤠᤱ ᤂᤧᤴ ᤔᤏᤠᤜᤠ᤹ᤏᤢ ᤐᤠᤘᤗᤧᤴ ᤜᤡᤒᤪᤢ ᤐᤠ᤺ᤴᤏᤥ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥