ᤛᤣ᤺ᤰᤕᤢᤰᤔᤡᤒᤠᤜᤠ᤹ 20:6-19

⁶ᤀᤠᤏᤡᤃᤧ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ ᤁᤢᤀᤣᤃᤠᤱ ᤘᤠᤗᤠᤶᤍᤡ᤺ᤰᤁᤥ ᤑᤡᤗᤡᤵᤐᤡᤗᤠᤶ ᤌᤠᤛᤡᤱᤔᤏᤠᤀᤠᤱ ᤅᤠᤛᤡ ᤕᤧᤴ ᤀᤣᤃᤠᤱ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ ᤋᤪᤥᤀᤠᤛᤀᤥ ᤋᤢᤶᤏᤠᤛᤡ ᤜᤧᤰᤁᤩᤠᤱ ᤂᤧᤵᤔᤥ ᤏᤢᤛᤡ (᥍) ᤕᤧᤴ ᤛᤥᤖᤡᤰ ᤘᤠ᤹ᤔᤏᤠᤖᤥ॥

⁷ᤜᤧᤰᤁᤩᤠᤱ ᤋᤧᤏᤧᤒᤠ ᤕᤧᤴᤏᤡᤸᤗᤧᤴ ᤕᤢ᤺ᤴᤇᤡᤰ ᤀᤠᤏᤡᤃᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤆᤠᤔᤠ ᤑᤠ᤹ᤀᤠᤱ ᤛᤥᤖᤡᤰ ᤆᤢᤶᤔᤏᤠᤖᤥ॥ ᤁᤴ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤐᤠᤘᤗᤧᤴ ᤛᤧᤳᤗᤢᤶᤓᤰᤋᤧᤖ ᤌᤠᤖᤡᤰ ᤐᤠᤖᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤁᤢᤏᤠᤶᤍᤠ᤺ᤵᤔᤠ ᤂᤧᤵᤔᤥᤗᤠᤶ ᤁᤧᤒᤣ᤺ᤰᤐᤠ ᤘᤕᤧᤖᤥ॥

⁸ᤀᤠᤏᤡᤃᤧ ᤆᤢᤶᤗᤢᤱ ᤆᤥ᤺ᤰᤔᤏᤠᤒᤠ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤕᤖᤡᤰ ᤛᤣᤔᤡᤜᤠ᤹ ᤔᤧᤜᤠ᤺ᤴᤍᤢᤀᤠᤱ ᤕᤢᤅᤧᤖᤥ॥

⁹ᤂᤧᤵᤔᤥ ᤕᤢᤋᤠᤀᤡᤁᤛ ᤔᤧᤵᤔᤏᤠᤒᤠ ᤏᤠᤗᤡᤱᤃᤧᤴ ᤌᤠᤱᤒᤧᤴᤎᤡᤰ ᤐᤣᤎᤠ᤺ᤵᤐᤥ ᤐᤣᤀᤠᤱ ᤕᤢᤱᤛᤡᤱ॥ ᤐᤠᤘᤗᤧᤴ ᤆᤰᤔᤧᤸᤗ᤹ᤀᤣ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤌᤠᤱᤒᤧᤴᤏᤡᤴ ᤁᤢᤔᤡᤁᤩᤢ᤺ᤛᤧᤀᤠᤱ ᤀᤡᤶᤎᤰᤘᤠ ᤗᤥᤖᤧᤖ ᤕᤢᤅᤧ॥ ᤜᤧᤰᤁᤩᤠᤱ ᤂᤧᤴ ᤛᤠ᤹ᤖᤡᤰ ᤀᤡᤵᤛᤧᤸᤗᤧ ᤛᤢᤶᤛᤡᤃᤣ᤺ᤰᤛᤔᤠ ᤂᤠᤶᤗᤥᤀᤥᤏᤢ ᤕᤥ ᤔᤰᤌᤩᤧᤀᤠᤱ ᤛᤩᤧᤖᤥ॥ ᤔᤏᤠᤜᤠ᤹ᤖᤧ ᤔᤧᤒᤣᤀᤠᤱ ᤀᤥᤔᤧᤔᤧᤳᤋᤢᤸᤗᤧᤃ ᤀᤠᤴᤍᤣ᤺ᤴᤇᤠ ᤛᤩᤧᤀᤠᤱ ᤏᤧᤛ᤻ᤛᤧᤖᤥ॥

¹⁰ᤁᤖ ᤐᤠᤘᤗᤧᤴ ᤕᤥ ᤐᤣᤀᤠᤱ ᤂᤢᤏᤧ᤹ ᤛᤶᤍᤠᤱ ᤛᤸᤗᤡᤰ ᤛᤴᤇᤡᤱᤗ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ᤀᤥ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤂᤢᤏᤧ᤹ᤃ ᤁᤢᤜᤡᤱᤘᤧᤳ ᤘᤠ᤹ᤖᤥ᥄”

¹¹ᤜᤧᤰᤁᤩᤠᤱ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤔᤧᤒᤣᤀᤠᤱ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤛᤥᤖᤡᤰ ᤔᤧᤈᤖᤥ॥ ᤂᤢᤏᤧ᤹ ᤂᤠᤀᤥ᤺ᤳᤋᤧᤖ ᤌᤠᤖᤡᤰ ᤂᤢᤏᤡ᤹ᤏᤢ ᤋᤠ᤹ᤈᤧᤰᤂᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤛᤧᤶᤔᤢ᤹ᤀᤡ ᤐᤥ᤺ᤰᤂᤧᤀᤠᤱ ᤌᤠᤛᤡᤱᤗᤥ॥

¹²ᤂᤧᤱᤜᤠ᤹ᤖᤧ ᤂᤧᤴ ᤌᤠᤱᤒᤧᤴᤏᤡᤴ ᤁᤢᤜᤡᤱᤘᤧᤳᤋᤣ ᤁᤢᤜᤡᤶᤔᤥ ᤔᤧᤍᤣ᤹ᤖᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰᤁᤣ ᤜᤠᤱᤜᤠᤱ ᤔᤧᤗ᤹ᤖᤧᤖᤥ॥

¹³ᤀᤠᤏᤡᤃᤧ ᤘᤠᤗᤠᤎᤠᤗᤠᤶ ᤋᤃᤡ ᤀᤛ᤻ᤛᤥᤛ ᤕᤧᤰᤕᤰᤁᤥ ᤐᤣ᤺ᤰᤔᤏᤠ॥ ᤂᤧᤵᤔᤥᤀᤣ ᤐᤠᤘᤗᤧᤴ ᤘᤠᤗᤠᤎᤠᤗᤠᤀᤥ ᤁᤣ᤺ᤵᤔᤠ ᤐᤠ᤺ᤴ ᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤌᤠᤖᤡᤰ ᤗᤠᤱᤄᤣ᤺ᤰᤔᤠᤖ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤖᤥ॥

¹⁴ᤜᤧᤰᤁᤩᤠᤱ ᤐᤠᤘᤗᤖᤧ ᤀᤛ᤻ᤛᤥᤛᤀᤥ ᤕᤠᤵᤔᤡ ᤋᤢᤔᤡᤃᤧ ᤜᤧᤰᤁᤩᤠᤱ ᤘᤠᤗᤠᤎᤠᤀᤥ ᤁᤣ᤺ᤵᤔᤏᤠᤀᤠᤱ ᤂᤧᤵᤔᤥᤗᤠᤶ ᤔᤡᤳᤋᤡᤗᤣᤏᤡ ᤘᤠᤃᤵᤂᤠᤶ ᤗᤧᤵᤔᤠᤱ ᤌᤠᤛᤡᤱᤔᤏᤠᤖᤥ॥

¹⁵ᤂᤧᤵᤔᤥᤗᤠᤶ ᤀᤠᤏᤡᤃᤧ ᤁᤢᤍᤠ᤺ᤴᤍᤡᤰᤔᤠ ᤂᤡᤕᤛ ᤘᤠᤃᤵᤂᤠᤶᤔᤥ ᤁᤧᤵᤔᤏᤠ॥ ᤜᤧᤰᤁᤩᤠᤱ ᤁᤢᤀᤠᤳᤇᤡᤴᤍᤠ᤺ᤴ ᤛᤠᤔᤥᤛ ᤘᤠᤃᤵᤂᤠᤶᤔᤥ ᤁᤧᤵᤔᤏᤠᤀᤠᤱ ᤁᤢᤀᤠᤰᤂᤧᤴᤍᤠ᤺ᤴ ᤔᤡᤗᤣᤋᤛ ᤕᤧᤰᤕᤰᤁᤥ ᤋᤠ᤺ᤶᤏᤠᤖᤥ॥

¹⁶ᤐᤠᤘᤗᤖᤧ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤔᤧᤴᤏᤠ᤺ᤶᤛᤡᤱᤅᤣ. ᤜᤧᤰᤁᤩᤠᤱ ᤀᤣᤑᤡᤛᤛᤀᤥ ᤔᤧᤴᤗ᤺ᤴᤏᤣ ᤁᤢᤒᤣᤛᤠᤱ ᤐᤥ᤺ᤱᤔᤠᤖ ᤐᤣ᤺ᤰᤔᤠᤀᤠᤱ ᤜᤠᤖᤠᤀᤣ ᤕᤖᤢᤛᤗᤧᤔ ᤁᤧᤵᤔᤠ ᤏᤡᤱᤘᤠ᤹ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤐᤧᤴᤋᤡᤁᤥᤛ᤻ᤋ ᤋᤱᤏᤠᤶᤔᤥ ᤂᤧᤵᤔᤥ ᤘᤠ᤹ᤔᤠ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ ᤘᤕᤧ॥

¹⁷ᤐᤠᤘᤗᤖᤧ ᤔᤡᤗᤣᤋᤛ᤻ᤗᤠᤶ ᤀᤣᤑᤡᤛᤛ᤻ᤔᤠ ᤛᤣᤛᤣᤜᤢᤵᤗᤰᤐᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤁᤢᤍᤢᤶᤛᤧ ᤀᤢ᤺ᤳᤋᤢᤛᤡ॥

¹⁸ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤐᤠᤘᤗᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤁᤧᤖᤠᤱᤒᤠ ᤌᤡᤰᤛᤡᤃᤣ᤺ᤰᤛᤔᤠ ᤕᤧᤴᤏᤠᤱᤎᤥᤀᤣ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ᤏᤢ ᤘᤕᤠᤱ ᤁᤧᤗ᤹ᤒᤠ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡᤖᤥ॥

¹⁹ᤀᤡᤱᤃᤠ᤹ᤃ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤏᤢ ᤔᤡᤰᤘᤠ ᤛᤥᤖᤡᤰ ᤕᤜᤢᤍᤡ ᤏᤡᤱᤄᤢᤶᤔᤥᤀᤠᤱ ᤍᤠᤱᤒᤠᤸᤗᤧ ᤁᤢᤛᤣᤘᤠ ᤆᤥᤃᤢᤱᤗᤥ॥