ሃዋሬታ ኦሱዋ 20:6-19

⁶ኑኒ ኡይꬃ ባሊያ ቦንቺዳፔ ጉዬ ፊልጲሲዩሳፔ ማርካቤራ ዴንዲዲ፥ ኢቻሻንꬆ ጋላሳን ኤንታ ፂሮዓዳን ጋኪዲ ያን ላፑን ጋላስ ጋምዒዳ።

⁷ሳሚንታፌ ኮይሮ ጋላሳን ኑኒ ኡይꬃ ሜንꬃናው ሺቂዲ ዴዒሺን፥ ጳዉሎሲ ዎንቴꬄ ባናው ቆፒዳ ጊሾ ኤንታው ቃላ ኦዲሼ ጊዲ ቢላሄ ጋካናው ኦዳ ኣዱሲስ።

⁸ኑኒ ሺቂዲ ኡቲዳ ፖቂያን ዳሮ ፖዖይ ዴዔስ።

⁹ኤዉፂኮሳ ጊያ ኢሲ ናዓቴꬃይ ማስኮቴ ቦላ ኡቲዲ፥ ባና ዶጊዲ ꬊስኪስ። ጳዉሎሲ ኦዳ ኣዱሲዳ ዎዴ ኤዉፂኮሲ ꬊስኮ ኤዪዲ ሄꬓንꬆ ፖቂያፔ ኩንዲዲ ሃይቂዳይሳ ኣሳይ ዴንꬂስ።

¹⁰ሺን ጳዉሎሲ ዎꬊዲ፥ ኢያ ቦላ ጉፋኒስ። ኢያ ኢዲሚዲ፥ «ኢ ሃይቂቤና፥ ሂርጎፊቴ» ያጊስ።

¹¹ሄሳፌ ጉዬ፥ ፑዴ ፖቂያ ቦላ ኬዪዲ ኡይꬃ ሜንꬂዲ ሚስ። ሳዒ ዎንታና ጋካናው ኣሳስ ኦዲዳፔ ጉዬ ዴንዲዲ ቢስ።

¹²ሄ ፓፂዳ ናቴꬃ ሶ ኤፊዲ ዳሮ ኡፋይቲዶሶና።

¹³ሺን ጳዉሎሲ ባና ያፔ ሞካና ሜላ ኑስ ኦዲዳ ጊሾ ካሴቲዲ ማርካቢያኮ ቢዲ፥ ኣሶሳ ባናው ዴንዲዳ። ኣይስ ጊኮ፥ ኢ ቶሆን ባናው ቆፒዳ ጊሾ ኑና ሄሳꬆ ኪቲስ።

¹⁴ኢ ኑራ ኣሶሳን ጋሄቲን ማርካቢያን ኢያ ኤኪዲ ሚፂሊኔ ቢዳ።

¹⁵ዎንቴꬃ ጋላስ ያፔ ዴንዲዲ ማርካቤራ ኪዮሳ ሲንꬄን ዴዒያ ቤሳ ጋኪዳ፤ ቃሲ ዎንቴꬃ ጋላስ ሳሞሳ ፒኒዲ ካሊያ ጋላስ ሚሊፄ ጋኪዳ።

¹⁶ጳዉሎሲ ኢሲያን ዳሮ ጋምዖና ኤፌሶና ማታራ ኣꬋናው ቆፒስ። ባው ዳንዳዔቲኮ ጴንፄቆስፄ ባሊያ ጋላስ ዬሩሳላሜ ጋካናው ኤሶቴስ።

¹⁷ጳዉሎሲ ሚሊፄፔ ኤፌሶና ኪቲዲ ዎሳ ኬꬃ ጪማታ ፄጊሲስ።

¹⁸ዎሳ ኬꬃ ጪማቲ ኢያኮ ዪን፥ ኤንታኮ ሃይሳዳ ያጊስ፡ «ታኒ ኢሲያ ጌሊዳ ኮይሮ ጋላሳፔ ዶሚዳ ሂንቴራ ዴዒዳ ዎዴ ኡባን ዋና ዴዒዳኮ ሂንቴ ኤሬታ።

¹⁹ኣይሁዴቲ ዱላቲዲ ታ ቦላ ሜቶ ጋꬂኮካ ታኒ ኣሽኬቴꬃኒኔ ዳሮ ኣፉꬃን ጎዳስ ኦꬃስ።