ᤗᤢᤁᤠ 9:32-62

³²ᤐᤋᤪᤢᤛ ᤏᤢ ᤁᤢᤴᤈᤢᤶᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧ. ᤁᤖ ᤂᤧᤱᤜᤠ᤹ ᤋᤠᤍᤠᤵ ᤗ᤹ᤖᤡᤰ ᤔᤧᤛᤥᤖᤧᤸᤗᤧ ᤕᤧᤛᤢᤖᤧ ᤁᤢᤔᤡᤔᤡᤍᤡᤱᤅᤡᤴ ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤕᤧᤒᤧᤳᤇᤡᤒᤠ ᤔᤧᤏᤡ᤺ᤛᤢ॥

³³ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤐᤰᤌᤩᤧᤛᤢᤀᤠᤱ ᤐᤣᤛᤡᤖ ᤐᤳᤇᤧᤳᤇᤡᤸᤗᤧ ᤐᤋᤪᤢᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡ᤹ᤃ ᤁᤵᤔᤥᤀᤣ ᤀᤠᤘᤠ᤹ᤀᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥ ᤀᤠᤏᤡᤃᤧ ᤁᤵᤔᤥ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤶᤒᤧ᤹. ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰ ᤌᤡᤰ ᤆᤥᤃᤢᤶᤒᤧ᤹ᤖᤥ᥄” (ᤁᤖ ᤂᤢᤏᤧ᤹ ᤌᤣ᤺ᤴ ᤐᤠ᤺ᤳᤋᤢᤱᤒᤣ ᤑᤠ᤹ᤀᤠᤱ ᤌᤣᤀᤠᤱ ᤁᤢᤏᤡᤱᤘᤠ᤹ ᤔᤧᤕᤠᤃᤧᤴ॥)

³⁴ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤂᤧᤵᤔᤥ ᤂᤠᤵᤔᤡ᤺ᤳᤋᤡᤸᤗᤧ ᤂᤧᤱᤜᤠ᤹ ᤋᤧᤵᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥

³⁵ᤂᤠᤵᤔᤡ᤺ᤳᤋᤥᤗᤠᤶ ᤀᤡᤰᤗᤠᤎᤡᤰ ᤋᤩᤧ. “ᤁᤴ ᤀᤠᤛ᤻ᤛᤠ᤺ᤖᤥ. ᤂᤢᤏᤧ᤹ᤀᤣ ᤛᤣᤃᤢᤱᤅᤠᤱ ᤘᤠ᤹ᤀᤠᤖᤥ᥄ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”

³⁶ᤂᤧᤴ ᤀᤡᤰᤗᤠ᤺ᤴ ᤐᤠᤖᤧ ᤆᤢᤖᤧᤀᤠᤱ ᤂᤧᤵᤔᤥ ᤕᤧᤛᤢ᤺ᤴᤗᤰ ᤔᤧᤏᤡ᤺ᤛᤢᤖᤥ॥ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱ ᤔᤧᤕᤢᤰᤂᤢᤀᤠᤱ ᤂᤧᤴ ᤕᤧᤶᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤶᤔᤧᤳᤋᤢᤴᤇᤡᤴᤗᤥ॥

³⁷ᤁᤢᤍᤠ᤺ᤴᤍᤡᤰᤔᤠ ᤂᤧᤱᤜᤠ᤹ ᤁᤥ᤺ᤰᤔᤠᤀᤥᤏᤢ ᤕᤥ ᤔᤧᤎᤩᤧ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤍᤢᤔᤢᤛᤡᤖᤥ॥

³⁸ᤂᤧᤴ ᤔᤏᤠᤜᤠ᤹ᤀᤥ ᤌᤡᤰᤗᤧ ᤁᤢᤛ᤻ᤛᤠ᤺ ᤆᤢᤰᤐᤧᤴ ᤑᤧᤳᤋᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ᤴ ᤀᤥᤔᤧᤳᤋᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥ ᤁᤴ ᤗᤳᤌᤡᤰᤗᤰ ᤀᤠᤛ᤻ᤛᤠ᤺ᤖᤥ॥

³⁹ᤀᤧᤳᤗᤧᤱ ᤑᤧᤴᤛᤠᤶᤔᤡᤸᤗᤧ ᤑᤳᤋᤢ. ᤋᤢᤰᤂᤣ ᤆᤠ᤺ᤳᤋᤢᤀᤠᤱ ᤂᤠᤶᤔᤥ ᤐᤡᤷᤎᤠᤵ ᤌᤠᤵᤛᤢ. ᤜᤧᤰᤁᤩᤠᤱ ᤛᤸᤗᤡᤰ ᤛᤴᤇᤡᤱᤗᤥ॥ ᤜᤧᤰᤁᤩᤠᤱ ᤁᤢᤔᤢᤖᤠᤀᤥᤗᤠᤶ ᤁᤢᤎᤩᤠ᤺ᤳ ᤗ᤺ᤳᤋᤢᤖᤥ॥ ᤑᤧᤴᤛᤠᤶᤔᤡᤸᤗᤧ ᤛᤵᤑᤠ ᤛᤵᤑᤠᤖᤰ ᤗᤧᤖᤢᤀᤠᤱ ᤂᤢᤏᤧ᤹ᤃ ᤔᤧᤱᤔᤠ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥

⁴⁰ᤀᤡᤱᤃᤠ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤁᤴ ᤑᤧᤴᤛᤠᤶᤔᤡᤴ ᤀᤠᤛ᤻ᤛᤠ᤺ᤸᤗᤥᤗᤠᤶ ᤏᤠ᤺ᤳᤋᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤛᤡᤱ. ᤁᤖ ᤔᤧᤴᤇᤢᤰᤋᤢᤴᤗᤥ॥”

⁴¹ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤛᤠ᤺ᤴ ᤁᤧᤜᤥ᤺ᤵᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤀᤠᤱ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”

⁴²ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤕᤧᤛᤢ᤺ᤴ ᤗᤧᤵᤔᤠᤱ ᤐᤣᤖ ᤐᤳᤇᤧᤸᤗᤧ ᤑᤧᤴᤛᤠᤶᤔᤡᤸᤗᤧ ᤑᤳᤋᤢᤀᤠᤱ ᤐᤡᤷᤎᤠᤵ ᤌᤠᤵᤛᤢ. ᤁᤖ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤘᤣ᤺ᤴᤍᤢᤀᤠᤱ ᤁᤢᤶᤒᤠ ᤐᤡᤖᤢᤖᤥ॥

⁴³ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤔᤧᤏᤡ᤺ᤛᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ.

⁴⁴“ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ-ᤀᤠᤸᤗ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤳᤋᤢ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤜᤢᤰ ᤔᤧᤛᤢᤵᤋᤢ ᤔᤧᤒᤡᤖᤢ᤹ᤖᤥ॥”

⁴⁵ᤁᤖ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤢᤏᤡ᤹ᤀᤥᤗᤠᤶ ᤔᤠ᤹ᤖᤧᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤛᤣ᤺ᤴᤍᤥ᤺ᤔᤠᤀᤠᤱ ᤔᤧᤃᤡᤛᤧᤖᤥ॥

⁴⁶ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤠᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤜᤠ᤺ᤵᤐᤣ ᤑᤠ᤹ᤀᤠᤱ ᤐᤠ᤺ᤴ ᤔᤧᤎᤰᤋᤧ॥

⁴⁷ᤁᤖ ᤕᤧᤛᤢᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤀᤠᤱ ᤆᤢᤰᤐᤠ ᤜᤡᤴᤈᤠ᤹ᤎᤡᤰ ᤑᤧᤳᤋᤢᤀᤠᤱ ᤂᤢᤏᤡ᤹ ᤋᤃᤡ ᤕᤧᤵᤛᤢᤖᤥ॥

⁴⁸ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤱᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤵᤔᤡ ᤗᤠᤱᤃᤧᤍᤠ᤺ᤰᤐᤠᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤗᤠᤱᤍᤠ᤺ᤰᤋᤢ᤹॥ ᤀᤠᤳᤋᤡᤴ ᤂᤡᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤆᤥ᤺ᤰ. ᤂᤧᤴᤏᤣ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤖᤥ॥”

⁴⁹ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤀᤠᤏᤡᤃᤧ ᤗᤳᤇᤠ ᤔᤏᤠᤎᤡᤰᤗᤧ ᤂᤧᤏᤧ᤹ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡᤖ ᤐᤳᤇᤧᤒᤠ ᤏᤡ᤺ᤛᤢᤶᤒᤧᤀᤠᤱ ᤀᤠᤏᤡᤃᤧ ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤒᤠᤱᤄᤢᤶᤒᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤏᤡᤃᤧᤏᤢ ᤌᤡᤰ ᤜᤢᤵᤐᤥ ᤔᤧᤘᤠ᤹ᤏᤧᤴᤗᤥ॥”

⁵⁰ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤠ᤺ᤳ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤜᤥ᤺ᤵ. ᤂᤧᤴ ᤂᤡᤏᤡ᤹ ᤗᤧᤵᤔᤠᤱ ᤘᤠ᤹ᤖᤥ॥”

⁵¹ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤢᤒᤣ᤺ᤰᤔᤠ ᤕᤧᤶ ᤋᤩᤧᤖ ᤐᤳᤇᤧᤒᤠᤸᤗᤧ ᤂᤢᤏᤧ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥

⁵²ᤂᤢᤏᤧ᤹ ᤀᤡᤱᤛᤠᤒᤠᤜᤠ᤹ ᤋᤃᤡ ᤐᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤠᤱ ᤛᤠᤔᤖᤡᤜᤠ᤹ᤖᤧ ᤂᤢᤏᤡ᤹ ᤐᤠᤱᤓᤣ᤹ᤀᤥ ᤆᤠᤔᤠ ᤌᤢᤱᤔᤠ ᤏᤢ ᤛᤧᤴᤍᤡᤰ ᤕᤠᤱᤎᤥ᤺ᤰᤛᤧ ᤔᤧᤒᤣ.

⁵³ᤁᤖ ᤛᤠᤔᤖᤡᤜᤠ᤹ᤖᤧ ᤂᤢᤏᤧ᤹ ᤗᤠᤱᤍᤠ᤺ᤰᤔᤠ ᤔᤧᤶᤒᤡᤖᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣᤖ ᤐᤳᤇᤧ॥

⁵⁴ᤜᤧᤰᤁᤣ᤺ᤸᤗᤧ ᤂᤧᤴ ᤏᤡ᤺ᤛᤧᤳᤇᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤖᤧ ᤕᤧᤛᤢ᤺ᤴ ᤛᤣ᤺ᤴᤍᤥ᤺ᤛᤧᤳᤇᤢ. “ᤀᤠᤍᤠᤱᤒᤣ. ᤀᤠᤏᤡᤃᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤡᤖᤠ᤺ᤰ ᤌᤠ᤺ᤛᤢᤶᤒᤧᤀᤠᤱ ᤁᤴ ᤐᤠᤱᤓᤣ᤹ᤀᤡᤴ ᤂᤠᤵᤐᤢ ᤌᤩ᤺ᤱ ᤆᤥᤃᤢᤶᤒᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”

⁵⁵ᤁᤖ ᤕᤧᤛᤢᤖᤧ ᤜᤡᤛᤡᤱᤅᤠᤱ ᤑᤧ᤺ᤰᤋᤢᤛᤡᤖ ((ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤰᤋᤱᤒᤠ ᤕᤠᤶᤛᤠᤶ ᤁᤧᤃᤳᤋᤢᤶ ᤑᤠ᤹ᤀᤠᤱ ᤁᤧᤴᤏᤡ᤺ᤛᤢᤶᤔᤡᤴ॥

⁵⁶ᤜᤧᤰᤁᤣᤗ᤹ᤖᤡᤰ ᤔᤧᤴᤇᤠᤶᤛᤠ᤺ᤴ ᤜᤡᤱᤔᤴ ᤔᤧᤱᤛᤧ ᤔᤧ᤺ᤴ. ᤁᤖ ᤋᤠᤱᤛᤧ᤺ᤵᤛᤧ ᤋᤩᤧᤒᤠᤖᤥ॥”)) ᤜᤧᤰᤁᤩᤠᤱ ᤂᤧᤱᤜᤠ᤹ ᤘᤣ᤹ᤛ᤻ᤔᤠ ᤐᤠᤱᤓᤣ᤹ᤀᤥ ᤔᤧᤒᤣᤖᤥ॥

⁵⁷ᤜᤧᤰᤁᤩᤠᤱ ᤗᤠᤶᤔᤥ ᤗᤠᤱᤔᤧᤄᤣᤃᤧᤖ ᤔᤧᤒᤳᤇᤧᤸᤗᤧ ᤔᤏᤠᤎᤡᤰ ᤋᤩᤧᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤂᤧᤏᤧ᤹ᤏᤢ ᤐᤣ᤺ᤰᤁᤠᤖᤥ॥”

⁵⁸ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤡᤍᤡ᤺ᤵᤐᤠᤜᤠ᤹ᤖᤧ ᤗᤢᤱᤄᤢᤖᤡ ᤔᤧᤃᤳᤋᤢ᤹. ᤐᤢᤛᤠᤜᤠ᤹ᤖᤧ ᤜᤠᤵ ᤔᤧᤃᤳᤋᤢ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤃ ᤌᤧᤃᤣ᤺ᤰ ᤏᤧᤔᤠ ᤋᤧᤴᤏᤠᤱ ᤔᤧᤃᤳᤋᤠᤴᤗᤥ॥

⁵⁹ᤜᤧᤰᤁᤩᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤔᤧᤳᤋᤢ. ‘ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥’” ᤁᤖ ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤋᤃᤡ ᤀᤡᤱᤃᤠ᤹ ᤁᤧᤛᤡ᤺ᤒᤠ ᤀᤠᤶᤒᤠ᤺ᤴ ᤀᤡᤵᤐᤢᤱᤅᤥ ᤆᤡᤱᤛᤧ ᤐᤣ᤺ᤰᤔᤠ ᤐᤠᤱᤄᤠᤱᤅᤧ᤹ᤀᤥ”

⁶⁰ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤜᤠᤖᤠ᤹ ᤕᤠᤶᤛᤠᤶᤔᤥ ᤁᤧᤛᤡ᤺ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤆᤣᤜᤠ᤹ ᤀᤡᤵᤐᤢᤱᤅᤥ ᤔᤧᤈᤡᤰᤂᤢᤛᤡᤖ. ᤁᤖ ᤂᤧᤏᤧ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤴ ᤛᤧ᤺ᤛᤧ᤹ᤀᤥ॥”

⁶¹ᤜᤧᤰᤁᤩᤠᤱ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤋᤩᤧᤀᤠᤱ ᤕᤧᤛᤢ᤺ᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤂᤧᤏᤧ᤹ ᤏᤠ᤺ᤳᤏᤧ᤹ᤖᤥ. ᤁᤖ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤡᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ᤏᤢ ᤛᤧᤶᤔᤢ᤹ᤀᤡ ᤆᤥ᤺ᤰᤛᤧ ᤐᤠᤱᤄᤠᤱᤅᤧ᤹ᤀᤥ॥”

⁶²ᤁᤖ ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤜᤠ᤺ᤳᤗᤧ ᤁᤢᤜᤢᤰᤁᤡᤴ ᤁᤧᤰᤆᤢᤀᤥ ᤑᤳᤇᤢᤀᤠᤱ ᤀᤣᤃᤠᤱ ᤀᤥᤔᤧᤳᤋᤢ. ᤂᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤗᤠ᤹ᤖᤢᤴᤗᤥ॥”