32 पत्रुस नु कुन्जुम्हाॽ मे़इप्से़आङ् मे़ने़स्से़, कर खे़ङ्हाॽ तादाप् लॽरिक् मे़सोरे़ल्ले़ ये़सुरे़ कुमिमिदिङ्ङिन् हे़क्क्याङ् खे़न् ने़प्फु मनाहाॽ खुने़ॽनु ये़बे़त्छिबा मे़निःसु॥
33 हे़क्क्याङ् खे़न् मनाहाॽरे़ ये़सुःन् पक्थ्ये़सुआङ्पेसिर पत्छे़त्छिल्ले़ पत्रुसरे़ ये़सुःन् मे़त्तु, “सिक्साम्बे, आनिॽग कप्मोए आवाॽइल्ले़ नुःबा पोःङ्लो॥ आनिगे़ कप्मो सुम्सि याक्साहाॽ चोगुम्बे़ॽ, थिक् खे़ने़ॽइन् हे़क्क्याङ् मोसाःन् नु एलियारे़ खुन्छिॽ लागिआङ् थिक् थिक् चोगुम्बे़ॽरो!” (कर खुने़ॽ थेःन् पाःत्तुङ्बे फाॽआङ् थेआङ् कुनिङ्वाॽ मे़यागे़न्॥)
34 खुने़ॽ पारे़र पत्छे़ल्ले़सा खे़प्मो खाप्मिःत्तिल्ले़ खे़ङ्हाॽ ते़प्तुसि, हे़क्केःल्ले़ खे़ङ्हाॽ साॽरिक् मे़गिसे़रो॥
35 खाप्मिःत्तोलाम् इक्लाधिक् त्ये़, “कन् आस्साःरो, खुने़ॽए सेगुङ्ङाङ् वाॽआरो! खुने़ॽ पाःत्तुबा पाःन्निन् खे़प्से़म्मे़ॽओ॥”
36 खे़न् इक्लाःन् पारे़ चुरे़आङ् खे़प्मो ये़सुःन्लक् मे़निःसुरो॥ हुॽसाम्बाहाॽरे़ कन् पाःन्निन् खुनिॽ निङ्वाॽ सिगाङ् मे़युक्खुआङ् खे़न् ये़म्मो आत्तिन्हाॽआङ् मे़म्मे़त्तुन्छिन्लो॥
37 कुदाःन्दिक्मा खे़ङ्हाॽ कोःक्माओनु यो मे़ध्ये़, हे़क्क्याङ् यरिक् मनाहाॽरे़ मे़दुमुसिरो॥
38 खे़न् मनाहाॽओ थिक्ले़ कुस्साः चुक्पे़न् फे़त्तुआङ् यम्बा इक्लाओ अःक्ते़र मे़त्तु, “सिक्साम्बे, इङ्गाॽ आस्साःन् ओमे़त्ताङ् पिराङ्ङे़ॽ फाॽआङ् पेलि फाक्ने़ॽरो॥ कन् लत्थिक्लक् आस्साःरो॥
39 ए़त्ले़ङ् फे़न्साम्मिल्ले़ फत्तु, तुक्खे चाःत्तुआङ् खाम्मो पिर्धाप् थाप्सु, हे़क्क्याङ् सल्लिक् सन्छिङ्लो॥ हे़क्क्याङ् कुमुराओलाम् कुध्याःत् लःत्तुरो॥ फे़न्साम्मिल्ले़ सप्फा सप्फारक् ले़रुआङ् खुने़ॽग मे़ङ्मा इःत्तुआङ् वाॽरो॥
40 इङ्गाॽ के़हुॽसाम्बाहाॽ कन् फे़न्साम्मिन् आस्साःल्लोलाम् नाःत्ते़म् आबिरे़म्मे़ॽ फाॽआङ् पेलि फाक्तुङ्सिङ्, कर मे़न्छुक्तुन्लो॥”
41 हे़क्केःल्ले़ ये़सुरे़ नोगप् पिरु, “नसाःन् के़होःप्पा नु ताक्के़भे़ॽबा मनासे, आप्फाल्ले़ थारिक् इङ्गाॽ खिनिॽनु वाॽआआङ् नासि थःत्निङ्बाबे? खे़न् चुक्पे़न् कत्ना फे़त्ते़म्मे़ॽ॥”
42 हे़क्क्याङ् खे़न् चुक्पे़न् ये़सुःन् ले़प्माङ् पेर पत्छे़ल्ले़ फे़न्साम्मिल्ले़ फत्तुआङ् पिर्धाप् थाप्सु, कर ये़सुरे़ खे़न् फे़न्साम्मिन् खे़न् चुक्पे़ल्लोलाम्लःन्दे़ पेगे़ॽ फाॽआङ् इङ्जाःङ् पिरु हे़क्क्याङ् खे़न् चुक्पे़न् वेःन्दुआङ् कुम्बा पिरुरो॥
43 हे़क्क्याङ् निङ्वाॽफुमाङ्ङिल्ले़ यम्बा कुमुक्साम्मिन् मे़निःसुआङ् के़रे़क् मनाहाॽरे़ खुनिॽ निङ्वाॽ मये़॥ ये़सुरे़ चोगुबा के़रे़क् याःम्बक्को मनाहाॽरे़ खुनिॽ निङ्वाॽ मये़ल्ले़ ये़सुरे़ कुहुॽसाम्बाहाॽ मे़त्तुसि,
44 “आबाःन्निन् खे़प्से़म्मे़ॽओ-आल्ल मे़न्छाम्साःन् इङ्मे़ले़क्त्तुॽ हे़क्क्याङ् मनाहाॽरे़ खुनिॽ हुक्को हुक् मे़सुप्तु मे़बिरुॽरो॥”
45 कर ये़सुरे़ पाःत्तुबा पाःन्निन् कुसिङ् मे़न्निःत्तुन्, थेआङ्भे़ल्ले़ खे़न् पाःन्निन् खुनिॽओलाम् माॽरे़आङ् वये़॥ खे़ङ्हाॽरे़ याम्मो सेःन्दोःमाआङ् मे़गिसे़रो॥
46 हे़क्क्याङ् ये़सुरे़ कुहुॽसाम्बाहाॽ आनिॽओ के़रे़क्नुःल्ले़ यम्बा हाःप्पे फाॽआङ् पाःन् मे़धक्ते़॥
47 कर ये़सुरे़ खुनिॽ निङ्वाॽइन्निःसुआङ् चुक्पा हिन्जाॽधिक् फे़त्तुआङ् खुनिॽ तगि ये़प्सुरो॥
48 हे़क्क्याङ् कुहुॽसाम्बाहाॽ मे़त्तुसि, “आत्तिल्ले़ आमिङ्ङो अक्तङ्बा चुक्सा हिन्जाॽइन् लाङ्दाःक्तुॽ, खे़ल्ले़ इङ्गाॽ लाङ्दाःक्कारो॥ इङ्गाॽ याप्मि लाङ्गे़दाःक्पाल्ले़ इङ्गाॽ याप्मि के़बाङ्बा निङ्वाॽफुमाङ्ङिन्नाङ् लाङ्दाःक्तुॽ॥ आत्तिन् खिनिॽओ के़रे़क्नुःल्ले़ चुक्सा चोःक्, खे़न्ने के़रे़क्नुःल्ले़ यम्बारो॥”
49 हे़क्क्याङ् युहुन्नाःल्ले़ खुने़ॽ मे़त्तु, “आदाङ्बा सिक्साम्बे, आनिगे़ लत्छा मनाधिक्ले़ खे़ने़ॽ के़मिङ्ङो फे़न्साम्हाॽ नाःत्तु लःत्तुसिर पत्छे़बा निःसुम्बे़आङ् आनिगे़ खे़न् हे़क्के चोःक्मा मे़बाङ्घुम्बे़न्लो, थेआङ्भे़ल्ले़ खे़न् आनिगे़नु थिक् हुप्पो मे़वाॽने़न्लो॥”
50 ये़सुरे़ खे़न् नोगप् पिरु, “खे़न् हे़क्के चोःक्मा मे़साक्ते़म्मिन्ने़ॽओ, थेआङ्भे़ल्ले़ हाःत् खिनिॽ तक्ले़ङ्वाओ होःप्, खे़न् खिनिॽ ले़प्माङ् वाॽरो॥”
51 हे़क्क्याङ् खुने़ॽ साङ्ग्राम्पेदाङ्ङो कुबेःक्मा ये़म् त्ये़र पत्छे़बाल्ले़ खुने़ॽ यरुसले़म ले़प्माङ् पेःक्मा निङ्वाॽ चोगु॥
52 खुने़ॽ इङ्साबाहाॽ तगि पाङ्घुसिरो॥ हे़क्क्याङ् खे़ङ्हाॽआङ् सामरिहाॽरे़ खुनिॽ पाङ्भेॽओ चामा थुङ्मा नु से़न्दिक् याङ्धोःक्से़ मे़बे,
53 कर सामरिहाॽरे़ खुने़ॽ लाङ्दाःक्मा मे़म्बिरुन्, थेआङ्भे़ल्ले़ खुने़ॽ यरुसले़म ले़प्माङ् पेर पत्छे़॥
54 हे़क्केःल्ले़ खे़न् निःसे़त्छुआङ् कुहुॽसाम्बाहाॽ याकुब नु युहुन्नारे़ ये़सुःन् सेःन्दोःसे़त्छु, “आदाङ्बे, आनिगे़ साङ्ग्राम्पेदाङ्लाम् मिराःक् थाःसुम्बे़आङ् कन् पाङ्भेॽइन् खाप्पु थ्यःङ् चोगुम्बे़ॽ के़लॽबा निङ्वाॽ के़जोगुबि?”
55 कर ये़सुरे़ हिसिङ्ङाङ् फे़ःक्तुसिर ((अक्खे मे़त्तुसि, “खिनिॽ आक्तङ्बा याम्साम् के़गत्तुम् फाॽआङ् के़न्निःसुम्मिन्॥
56 हे़क्केलॽरिक् मे़न्छाम्साःन् हिङ्मन् मे़ङ्से़ मे़ःन्, कर ताङ्से़ःप्से़ त्ये़बारो॥”)) हे़क्क्याङ् खे़ङ्हाॽ वेॽस्मा पाङ्भेॽओ मे़बेरो॥
57 हे़क्क्याङ् लाम्मो लाङ्मे़घेगे़र मे़बत्छे़ल्ले़ मनाधिक् त्ये़आङ् मे़त्तु, “सिक्साम्बे, खे़ने़ॽ आत्ति के़बेःक्साङ् खे़ने़ॽनु पेःक्कारो॥”
58 कर ये़सुरे़ नोगप् पिरु, “किदिःप्पाहाॽरे़ लुङ्घुरि मे़गत्तुॽ, पुसाहाॽरे़ हाप् मे़गत्तुॽ, कर इङ्गाॽ मे़न्छाम्साःल्ले़ग थे़गेःक् ने़मा ते़न्नाङ् मे़गत्तान्लो॥
59 हे़क्क्याङ् ये़सुरे़ वेॽस्मा मनाःन् मे़त्तु, ‘इङ्गाॽ तिम्दाङ्ङे़ॽओ॥’” कर खे़न् मनाःल्ले़ नोगप् पिरु, “आदाङ्बे, तगि इङ्गाॽ के़सिःबा आम्बाःन् इप्पुङ्ङो चिङ्से़ पेःक्मा पाङ्घाङ्ङे़ॽओ”
60 ये़सुरे़ खे़न् मे़त्तु, “हाराॽ याम्साम्मो के़सिःबा मनाहाॽरे़ खुनिॽ आबाङे चेहाॽ इप्पुङ्ङो मे़जिक्खुसिर, कर खे़ने़ॽ निङ्वाॽफुहाङ्जुम्मिल्ले़ कुयाःम्बेओ इङ्भन् से़ःसे़ॽओ॥”
61 हे़क्क्याङ् वेॽस्मा मनाःन् त्ये़आङ् ये़सुःन् मे़त्तु, “आदाङ्बे, इङ्गाॽ खे़ने़ॽ नाःत्ने़ॽरो, कर के़रे़क्नुःल्ले़ तगि इङ्गाॽ आहिम्सयङ्हाॽनु से़म्मुॽइ चोःक्से़ पाङ्घाङ्ङे़ॽओ॥”
62 कर ये़सुरे़ खे़न् नोगप् पिरु, “हाःत्ले़ कुहुक्किन् के़क्चुओ फत्छुआङ् एगाङ् ओमे़त्तु, खे़न् निङ्वाॽफुहाङ्जुम्मो माङ्सेवा याःम्बक् चोःक्मा मे़लाॽरुन्लो॥”
