ፆኦሲ ማዾ''ም ዳኪንቴዞንሢኮ ማዾ'' 18:19-26

¹⁹ዬካፓ ዴንዲ ዔያታ ዔፕሶኔ ዓጮ'' ሄላ''ዖ ጲሪስቂላና ዓቂላና ዒኢካ ሓሺ'' ፔኤሮ ዓይሁዶ ዓሶኮ ቡኪንቶ ቤዞ ጌሊ ዓይሁዴ ዓሶም ሓይሶ ኬኤዛኔ።

²⁰ሚርጌ ዎዴ ዔያቶና ዎላ'' ዴዓንዳጉዲ ዓሳ ዒዛ ሺኢቄንቴ ዒዚ ዔኤዒባኣሴ።

²¹ጋዓንቴ፦ «ፆኦሲ ጌዔቴ ሜሌ'' ዓቢ ዒንሢ ኮራ ታ ማዒ ሙካንዳኔ» ጋዓዖ፥ ዔፕሶኔ ዓጮ''ይዳፓ ዋኣፆ ካኣሚሎና ዓኣዼኔ።

²²ዒዚ ቂሳሪያ ሄላ''ዖ፥ ዬካፓ ዬሩሳላሜ ዓኣዺ ሺኢጲፆ ማኣሮ ዓሶ «ኮሺዳ» ጌዔስካፓ ማዒ ዓንፆኪያ ዓኣዼኔ።

²³ዒኢካ ዻካ'' ዴዔስካፓ ጋላቲያና ፒርጊያ ዓጮ''ናይዳ ፔቴ'' ቤዛፓ ሜሌ'' ቤሲ ሃንቲ ሃንቲ ኪሪስቶሴ ጉሙርቃ ዓሶ ዶዲሼኔ።

²⁴ዒስኪንዲሪያ ዓጪ ዓሲ ፔቴ'' ዓጲሎሴ ጎዖ ዓይሁዴ ዓሲስኬይ ዔፕሶኔ ዓጮ'' ሙኬኔ፤ ዒዚ ጌኤዦ ማፃኣፖ ኮሺ'' ዔራያ ሓሣ ጌስቶ ጎይሢ ዔሪ ጌስታ ዓሲኬ።

²⁵ዬይ ዓሢ ጎዳ ዛሎ'' ኮሺ'' ዔራያና ዓያናና ዒናፓ ማዻኒ ማላያ ማዒ ዬሱሴ ዛሎ'' ፒዜ ኬኤዚ ኬኤዚ ዔርዛኔ። ያዺ ማዔቶዋ ዒዚ ባሼ ዔራሢ ዮሓኒሴኮ ዋኣፆ ማስኪፆ ዛሎ'' ሌሊኬ።

²⁶ዬማና ዒዚ ጫርቂ ዓይሁዶ ዓሶኮ ቡኪንቶ ቤዛ ኬኤዚሢ ዓርቄኔ፤ ጋዓንቴ ጲሪስቂላና ዓቂላና ዒዛሲ ዋይዛዖ ዒዛ ዔያታ ፔ ማኣሪ ዔኪ ዓኣዺ፥ ፆኦሲ ጎይፆ ዛሎ'' ቤርታኣስካፓ ባሼ ቡሊ'' ዒዛም ኬኤዜኔ።