ዮሃኒሳ 9:24-34 - ኦራꬃ ጫቆ ማፃፋ ጋሞꬆ

²⁴ካሴ ቆቄ ኣዴዛ ቃሴካ ፄይጊዲ “ሃይሶ ኔ ቱማዮ ዮታዳ ፆሳ ቦንቻ። ሃይሲ ኣዴዚ ናጋራንቻ ጊዲዳይሳ ኑ ኤሮስ” ጊዳ።

²⁵ኢዚካ “ኢዚ ናጋራንቻ ጊዲን ታ ኤሪኬ። ጊዶ ኣቲን ታ ካሴ ቆቄ ጊዲዳሮኔ ቃሴ ሃዒ ታ ፄሊዛሮ ሃኖ ፃላ ኤራይስ” ጊዴስ።

²⁶ኢስቲ ቃሴ ኢዛ “ኢዚ ኔስ ኣይ ኦꬂዴ? ኔ ኣይፌዛ ዎስቲ ፖጊዴ?” ጊዲ ኦይቺዳ

²⁷ኢዚካ “ታ ኢንቴስ ካሴ ዮቲን ዎዝናን ዎꬂ ሲይቤኬታ ሺን ሃዒ ቃሴ ኣዛስ ዛሬꬂ ሲያና ኮዬቲ? ኢንቴካ ኢዛ ካሊዛይታ ጊዳና ኮዬቲ?” ጊዴስ።

²⁸ሄሳፌ ጉዬ ኢዛ “ኑ ሙሴ ካሊዛዴንታ፤ ኔ ኢዛ ካሊዛዴ ጊዳ።

²⁹ካሴ ፆሲ ሙሴራ ሃሳዬቲዳይሳ ኑ ኤሮስ። ሃይሲ ኣዴዚ ኣዋፔ ዪዳኮኔ ኑ ኤሮኮ” ጊዳ።

³⁰ኣዴዚካ ኢስታስ “ኢዚ ኣዋፔኮኔ ኢንቴ ኤሮንታይሲ ማላሊሴስ። ጊዶ ኣቲን ታ ኣይፌ ፄሊሲዳዴይ ኢዛ።

³¹ፆሲ ባስ ያዪዛዴሲኔ ኢዛ ሼኔ ኦꬂዛዴስ ኣቲን ናጋራንቻ ኣስ ሲዮንታይሳ ኑ ኤሮስ።

³²ኣይፌ ቆቂዲ ዬሌቲዳዴ ኣይፌይ ፄሊዴስ ጊዛይሳ ኣላሜይ ሜꬌቶሳፔ ኦኒካ ሲዪ ኤሬና።

³³ሃይሳዴይ ፆሳፌ ጊዶንታኮ ሃይሳ ኦꬃናስ ዳንዳዬና” ጊ ዛሪዴስ።

³⁴ኢስቲካ ኢዛ “ኔኒ ኔስ ሙሌ ኣሳቴꬃይ ናጋራን ሙኑቄቲን ዬሌቲዳይሲ ኑና ታማርሳና ዋና ፃላዲ?” ጊዲ ኢዛ ጎዲዳ።