ዮሃኒሳ 12

1

2

3

4

5

6

7

8

9

10

11

12

13

14

15

16

17

18

19

20

21

¹ፓዚጋ ባዓሌስ ቡሮ ኡሱፑን ጋላሲ ኣቲሺን ዬሱሲ ሃይቆፔ ዴንꬂዳ ኣላዛሬይ ዲዛሶ ቢታኒያ ቢዴስ።

²ሄን ዬሱሳስ ካዎ ካꬂዲ ማርታይ ኢዛ ካዎ ሚዚሺን ኢዛራ ኢሲፌ ማዳን ኡቲዳይታፔ ኢሶይ ኣላዛሬ።

³ማራማ ዳሮ ኣልዖ ዋጋራ ሻሜቲዳ ባጋ ሊትሮ ጊዲዛ ጌሻ ናርዶሴ ሺቶ ኤካ ያዳ ዬሱሳ ቶሆ ቦላ ጉሳዳ ቶሆዛ ባ ሁዔ ቢናናራ ቁጫዱስ። ኬꬃካ ሺቶ ሳዎይ ኩሚዴስ።

⁴ዬሱሳ ካሊዛይታፔ ኢሶይ ዬሱሳ ኣꬂ ኢማና ኣስቆሮንቶ ዩሁዳይ፥

⁵“ሃይሲ ሺቶዚ ሄꬑ ፄቱ ዲናሬስ ባይዜቲዲ ሚሻይ ኣዛስ ማንቆታስ ኢሜቲቤኔ?” ጊዴስ።

⁶ኢዚ ሄሳ ጊዳይ ሚሻ ሺሺዛ ካራፂቴ ኦይኪዛዴይ ኢዛ ጊዲዳ ጊሽ ሺቂዛ ሚሻፌ ባስ ሺሺዲ ጎዔቲዛዴ ጊዲዳ ጊሻሳ ኣቲን ማንቆታስ ሚሼቲዲ ጊዴና።

⁷ዬሱሲ ቃሴ “ሃይሲ ሺቶዚ ታስ ሞጎ ጋላሳስ ቆፌቲዳዝ ጊዲዳ ጊሽ ሄ ዎዴ ጋካናስ ኢዛ ባ ኣቻን ናጉ፥ ቦቾፍቴ።

⁸ማንቆቲ ኣይ ዎዴካ ኢንቴናራ ዴቴስ። ጊዶ ኣቲን ኢንቴ ታና ኡባ ዎዴ ዴሜኬታ” ጊዴስ።

⁹ሄ ዎዴ ዳሮ ኣይሁዳ ኣሳቲ ዬሱሲ ሄን ዲዛይሳ ኤሪዲ ኢዛኮ ዪዳ፤ ዪዳይቲካ ዬሱሳ ፃላላ ኮሽ ጊዶንታ ዬሱሲ ሃይቆፔ ዴንꬂዳ ኣላዛሬካ ቤያናሳ።

¹⁰ሄሳ ጊሽ ቄሴታ ሃላቃቲ ዬሱሳራ ኣላዛሬካ ጋꬂ ዎꬋናስ ባ ጊዶን ዞሬቲዳ።

¹¹ሄሲካ ኣላዛሬ ጌዶን ዳሮ ኣይሁዳ ኣሳይ ዬሱሳኮ ቢ ቢዲ ኢዛ ኣማኒዛ ጊሻሳ።

¹²ዎንቴꬃ ጋላስ ባዓሌዛ ቦንቻና ዪዳ ዴሬይ ዬሱሲ ዬሩሳላሜ ዪዛይሳ ሲይዴስ።

¹³ዛምባ ሃይꬅ ኤኪዲ ዬሱሳ ሞካና ኬዚዴስ፤ ዴሬይ ቃላ ꬎቁ ሂስቲዲ “ሆሳና! ጎዳ ሱንꬃን ዪዛ ኢስራዔሌ ካዎይ ኣንጄቲዳይሳ!” ጊዴስ።

¹⁴ቤኒ “ሃኔ! ፂዮኔ ናዬ፥ ባቦፋ! ሄኮ ኔ ካዎይ ሃሬ ጉቴ ቶጊዲ ዬስ” ጌቴቲ ፃፌቲዳ ማላ ዬሱሲ ሃሬ ጉቴ ዴሚዲ ቶጊዴስ።

¹⁶ኢዛ ካሊዛይቲ ሄሳ ዉርሲ ኮይሮ ዎዝናን ዎꬂቤቴና። ኢዛ ጊሽ ፃፌቲዳይሳኔ ኢዛስ ኦሴቲዳ ሃኖካ ዉርሲ ዬሱሲ ሃይቆፔ ዴንዲዳፔ ጉዬ ኤሪዳ።

¹⁷ኣላዛሬ ዱፎፔ ፄይጊዲ ሃይቆፔ ዴንꬂዳ ዎዴ ኢዛራ ኢሲፌ ዲዛ ኣሳይ ኢዛ ዴንꬃ ጊሽ ማርካቲዳ።

¹⁸ዳሮ ኣሲካ ኢዚ ሄሳ ማላ ጊታ ማላታ ኦꬂዳይሳ ሲይዲ ኢዛ ሞካና ኬዚዴስ።

¹⁹ሄሳ ጊሽ ፋርሳዌቲ ባ ጊዶን ኢሶይ ኢሳ “ሂስቲን ኑኒ ኣይ ኦꬃና ዳንዳዪዞኒ? ቤይቴ! ኩሜꬃ ዴሬይ ኣቶንታ ኢዛ ካሌስ” ጊዳ።

²⁰ጎይናናስ ባዓሌዛስ ሺቂዳ ኣሳ ጊዶን ጊሪኬ ዴሬ ኣሳቲካ ዴቴስ።

²¹ኢስቲካ ጋሊላ ጊዶን ዲዛ ቤቴሳይዳ ጌቴቲዛ ዴሬ ኣስ ፒሊጶሳ ጌቴቲዛዴኮ ቢዲ “ጎዶ! ኑ ዬሱሳ ቤያና ኮዮስ” ጊዳ።

²²ፒሊጶሲካ ኢንዲራሳስ ዮቲዴስ። ኢንዲራሲኔ ፒሊጶሲ ቢዲ ዬሱሳስ ዮቲዳ።

²³ዬሱሲካ ኢስታስ “ሄኮ ኣሳ ናይ ቦንቼቲዛ ሳቴይ ጋኪዴስ።

²⁴ታ ኢንቴስ ቱሙ ጋይስ፤ ጊስቴ ኣይፌይ ቢታን ዎꬋዳ ሃይቆንታ ጮዑ ጋ ኡቲኮ ባርካ ኣታዉስ። ኢዛ ሃይቂዛ ጊዲኮ ሃራ ዳሮ ኣይፋዉስ።

²⁵ባ ሼምፖ ዶሲዛዴይ ꬋይሴስ። ሃይሳ ቢታ ቦላ ባ ሼምፖ ኢፂዛዴይ ጊዲኮ ሜርና ዴዖ ዴሜስ።

²⁶ታስ ኦꬃና ኮዪዛዴይ ታና ካሎ፤ ታስ ኦꬂዛዴይ ታ ዲዛሶን ዳና፤ ታስ ኦꬂዛዴ ታ ኣዋይ ኢዛ ቦንቻና” ጊዴስ።

²⁷ቃሴካ ዬሱሲ “ሄኮ ታ ሼምፖያ ሜቶታዱስ ‘ታ ኣዋዉ! ሃ ሳቴይፔ ታና ኣሻ ጎሻ?’ ታ ሂዝጎንታ ማላ ታ ዪዳይ ሃኖ ሃ ሜቶ ሳቴይሳ።

²⁸“ታ ኣዋዉ! ኔ ኔ ሱንꬃ ቦንቻ” ጊዴስ። ሄሳፌ ካሊዲ “ታኒ ታ ሱንꬃ ቦንቻዲስ፤ ቃሴካ ጉጃ ቦንቻና” ጊዛ ቃላይ ሳሎፔ ዪዴስ።

²⁹ሄን ጋዳን ኤቂዳ ኣሳይ ሄሳ ሲይዲ “ዳዳይ ዳዳቴስ” ጊዳ። ባጋይቲ ቃሴ “ኪታንቻኮ ሃሳዪዛይ” ጊዳ።

³⁰ዬሱሲ “ሃይሲ ጊሪሳይ ዪዳይ ኢንቴ ጊሻሳ ኣቲን ታ ጊሽ ጊዴና።

³¹ሃይሲ ኣላሜይ ፒርዴታና ዎዴይ ሃይሳ፤ ሃይሳ ዴሬዛ ሃሪዛ ፃላዔይ ሃዒ ጌዴ ካሬ ዬጌታና።

³²ታኒ ꬎቁ ጋዳ ካቄቲዛ ዎዴ ኣሳ ዉርሳ ታኮ ዛራና” ጊዴስ።

³³ዬሱሲ ሄሳ ዮቲዳይ ኢዚ ኣይ ማላ ሃይቆ ሃይቃናኮ ኤሪሳናሳ።

³⁴ኣሳይ ቃሴ “ኑ ዎጋን ፃፌቲዳይ ‘ፆሲ ኪቲዳዴይ ሜርናስ ዳና’ ጌስ፤ ሂስቲን ኔ ቃሴ ዋናዳ ‘ኣሳ ናይ ꬎቁ ጊ ካቄታና ቤሴስ’ ጋይ? ኔ ጊዛ ኣሳ ናይ ኣዋይሴ?” ጊዲ ኦይቺዳ።

³⁵ዬሱሲ ኢስታስ “ሃዒ ጉꬃ ዎዴስ ኢንቴናራ ፖዖይ ዴስ፤ ጋዴይ ꬉሞንታ ፖዖራ ሃሙቲቴ፤ ቃማራ ሃሙቲዛዴይ ኢዚ ኣዋ ቢዛኮኔ ኤሬና።

³⁶ኢንቴ ፖዖ ናይታ ጊዳና ማላ ፖዖይ ዲሺን ፖዖን ኣማኒቴ” ጊዴስ። ዬሱሲ ሄሳ ጊዳፔ ጉዬ ቢዲ ኢስታ ኣይፌፔ ጌሚዴስ።

³⁷ዬሱሲ ኢስታስ ሄሳ ማላ ማላታ ኢስታ ሲንꬃን ኦꬂንካ ኣይሁዳቲ ኢዛን ኣማኒቤቴና።

³⁸ሄሲ ሃኒዳይ ናቤ ኢሳያሲ “ጎዶ! ኑ ማርካቴꬃ ኣማኒዳይ ኦኔ? ፆሳ ቃላይ ኦናስ ቆንጪዴ?” ጊዳ ማላ።

³⁹ሄሳ ጊሽ ኣማናናስ ዳንዳይቤቴና፤ ጋሶይካ ናቤ ኢሳያሲ ካሴ፥

⁴⁰“ኢስቲ ባ ኣይፌን ቤዪዲ፥ ባ ዎዝናን ዩሺ ቆፒዲ፥ ሲሞንታ ማላኔ ኢዚ ኢስታ ፓꬆንታ ማላ ፆሲ ኢስታ ኣይፌ ቆቂሲዴስ፤ ኢስታ ዎዝናካ ሙሚሲዴስ” ጊ ፃፊዳ ጊሻሳ።

⁴¹ኢሳያሲ ሄሳ ጊዳይ ፆሲ ኪቲዳዴ ቦንቾ ቤዪዳ ጊሻሳ፤ ሄሳ ጊሽ ዬሱሲ ዮቲዴስ።

⁴²ጊዲኮካ ኣይሁዳታ ሃላቃታፔ ዳሮ ኣሳይ ዬሱሳ ኣማኒዴስ። ጊዶ ኣቲን ኢስታ ኣይሁዳታ ዎሳ ኬꬃፌ ጎዶንታ ማላ ፋርሳዌታስ ባቢዲ ባ ኣማኖ ቆንጬን ማርካቲቤቴና።

⁴³ኢስቲ ሄሳꬆ ሃኒዳይ ኢስታስ ፆሳፌ ኢሜቲዛ ቦንቾፌ ኣꬂዲ ኣሳፔ ኢሜቲዛ ቦንቾ ዶሲዳ ጊሻሳ።

⁴⁴ዬሱሲ ባ ቃላ ꬎቁ ሂስቲዲ “ታና ኣማኒዛዴይ ታናን ፃላላ ጊዶንታ ታና ኪቲዳይሳንካ ኣማኔስ።

⁴⁵ታና ቤዪዳዴይ ታና ኪቲዳይሳካ ቤያና።

⁴⁶ታና ኣማኒዛይ ዉሪ ꬉማን ዶንታ ማላ ታ ፖዖ ጊዳዳ ሃይሳ ሃ ኣላሜዛ ያዲስ።

⁴⁷ታ ቃላ ሲይዲ ኦꬆንታዴ ቦላ ፒርዳናይ ታና ጊዲኬ። ጋሶይካ ታ ዪዳይ ኣላሜ ኣሻናስ ኣቲን ኣላሜ ቦላ ፒርዳናስ ጊዴና።

⁴⁸ታና ኮዮንታዴኔ ታ ቃላ ኤኮንታዴ ቦላ ፒርዳናዴይ ዴስ፤ ታ ኢዛስ ዮቲዳ ቃላይ ዉርሴꬃ ጋላስ ኢዛ ቦላ ፒርዳና።

⁴⁹ጋሶይካ ታኒ ጮ ታ ሼኔን ዮታቤይኬ፤ ታ ጊዛይሳኔ ታ ዮቲዛ ኣዛዞ ታስ ኢሚዳይ ታና ኪቲዳ ታ ኣዋ

⁵⁰ኢዛ ኣዛዞይ ሜርና ዴዖ ጊዲዳይሳ ታ ኤራይስ፤ ሄሳ ጊሽ ታ ዮቲዛይ ዉሪ ኣዋይ ታስ ዮቲዳይሳ” ጊዴስ።