ዮሃኒሳ 11

1

2

3

4

5

6

7

8

9

10

11

12

13

14

15

16

17

18

19

20

21

¹ቢታኒያ ጌቴቲዛሶን ማራማኔ ማርታይ ዲዛ ጉታን ኣላዛሬ ጌቴቲዛዴይ ሳኬቲዴስ።

²ኢዚ ኢሻ ኣላዛሬይ ሳኬቲዳ ማራማ ካሴ ዬሱሳ ቶሆ ቦላ ሺቶ ጉሳዳ ዬሱሳ ቶሆ ባ ሁዔ ቢናናን ቁጪዳሮኮ።

³ሚቼቲካ “ጎዶ! ኔ ዶሲዛይሲ ሳኬቲዴስ” ጊዲ ኣስ ዬሱሳኮ ኪቲዳ።

⁴ዬሱሲ ሄሳ ሲይዲ “ሃ ሳኮይ ፆሳ ናይ ኢዛን ቦንቼታና ማላኔ ፆሲ ቦንቼታናሳፌ ኣቲን ኢዛ ሃይቆስ ጋꬂዛዝ ዴና” ጊዴስ።

⁵ዬሱሲ ማርታ ኢዚ ሚቼዮ ማራሞኔ ኣላዛሬ ሲቄስ።

⁶ጊዶ ኣቲን ኣላዛሬይ ሳኬቲዳይሳ ሲዪ ዎꬂዲ ሄን ባ ዲዛሶን ናምዑ ጋላስ ጋምዒዴስ።

⁷ሄሳፌ ጉዬ ባና ካሊዛይታ “ኣኔ ዩሁዳ ቢታ ሲሚ ቦስ” ጊዴስ።

⁸ኢስቲካ “ኣስታማሬ! ጉꬃ ዎዴፔ ካሴ ኣሳይ ኔና ሹቻራ ጫዳና ኮዬቴስኮሺን፤ ኔ ቃሴ ሃዒ ሄ ሲማ ባኔ?” ጊዳ።

⁹ዬሱሲ ኢስታስ “ኢሲ ጋላሳን ታማኔ ናምዑ ሳቴይ ዴስ ዴኔ? ጋላሳራ ሃሙቲዛ ኣሲ ሃ ኣላሜዛ ፖዖን ሲሜሬቲዛ ጊሽ ꬉጴቴና።

¹⁰ꬉጴቲዛዴይ ጊዲኮ ኢዚ ቃማራ ሃሙቲዛዴ። ጋሶይካ ፖዖይ ባይንዳ ጊሻሳ” ጊዴስ።

¹¹ሄሳ ኢስታስ ዮቲዳፔ ጉዬ “ኑ ላጌ ኣላዛሬይ ꬊስኪዴስ፤ ታካ ኢዛ ꬊስኮፌ ዴንꬃና ባይስ” ጊዴስ።

¹²ኢዛ ካሊዛይቲ ኢዛ “ጎዶ! ኢዚ ꬊስኪዳ ጊዲኮ ዴንዳና” ጊዳ።

¹³ዬሱሲ ኢስታስ ሄሳ ዮቲዳይ ኣላዛሬ ሃይቆ ጊሻሳ ሺን ኢዛ ካሊዛይታስ ቃሴ ꬊስኮ ጊሽ ዮቲዳ ሚሳቲዴስ።

¹⁴ሄሳ ጊሽ ቆንጬራ ኢስታስ “ኣላዛሬይ ሃይቂዴስ።

¹⁵ኢንቴ ኣማናና ማላ ታ ሄን ዶንታ ኣጊዳይሲ ኢንቴ ጊሽ ታና ኡፋይሴስ፤ ሃዒ ጊዲኮ ኣኔ ጌዴ ኢዛኮ ቦስ” ጊዴስ።

¹⁶ቃሴ ዲዲሞሳ ጌቴቲዛ ቶማሲ ሃንኮ ዬሱሳ ካሊዛይታ “ኣኔ ኑካ ቢዲ ኢዛራ ኢሲፌ ሃይቆስ” ጊዴስ።

¹⁷ዬሱሲ ቢ ጋኪሺን ኣላዛሬይ ሃይቂ ሞጌቲን ኦይዱ ጋላስ ጊዲዴስ።

¹⁸ቢታኒያይ ዬሩሳላሜፔ ባጋ ሳቴ ኦጌ ሃኬስ።

¹⁹ኢስታ ኢሻይ ሃይቂዳ ጊሽ ማራሞኔ ማርታ ሚንꬄꬃናስ ዳሮ ኣይሁዳ ኣሳይ ኢስታኮ ሺቂዴስ።

²⁰ዬሱሳ ዩሳ ማርታይ ሲያዳ ኢዛ ሞካ ኤካና ባዱስ፤ ማራማ ጊዲኮ ሶን ኡታዱስ።

²¹ማርታይ ዬሱሳ “ጎዶ! ኔ ሃን ዲዛኮ ታ ኢሻይ ሃይቄናኮሺን።

²²ሃዒካ ጊዲኮ ኔ ዎሲዳ ዉርሲ ፆሲ ኔስ ኢማናይሳ ታ ኤራይስ” ጋዱስ።

²³ዬሱሲካ ኢዚስ “ኔ ኢሻይ ዴንዳና” ጊዴስ።

²⁴ማርታይ ቃሴ “ዉርሴꬃን ዴንꬃ ዎዴ ኢዚ ዴንዳናይሳ ታካ ኤራይስ” ጋዱስ።

²⁵ዬሱሲካ ኢዚስ “ዴንዶይኔ ዴዖይ ታና፤ ታና ኣማኒዛዴይ ሃይቂኮካ ፓፃ ዳና።

²⁶ታናን ዲዛዴይኔ ታና ኣማኒዛዴይ ሙሌካ ሃይቄና፤ ሄሳ ኔ ኣማናይ?” ጊዴስ።

²⁷ኢዛካ ዛራዳ “ኤ ጎዶ! ኔኒ ዱጌ ሃ ኣላሜዛ ኪቴቲዳ ፆሳ ና ጊዲዳይሳ ታ ኣማናይስ” ጋዱስ።

²⁸ሄሳ ጋዳኔ ሲማዳ ባ ሚቼዮ ማራሞ ዱማ ፄይጋ ኬሳዳ “ኣስታማሬይ ኔና ኮዬስ” ጋዱስ።

²⁹ማራማካ ሄሳ ሲዪዳ ማላ ኤሌላ ዴንዳዳ ኢዛኮ ባዱስ።

³⁰ሄሳ ጋካናስ ዬሱሲ ማርታራ ጋጊዳሶን ዴስ ኣቲን ጌዴ ጉታ ጊዶ ጌልቤና

³¹ማራሞ ሚንꬄꬂሼ ኢዚራ ሶን ዲዛ ኣይሁዳቲካ ማራማ ፑሱኩ ጋ ዴንዳ ኤቃዳ ኬዚዳይሳ ቤዪዲ ኢዛ ኣላዛሬ ዱፎ ኣቻን ዬካና ቢዛ ሚሳቲን ኢዞ ካሊዳ።

³²ማራማ ዬሱሲ ዲዛሶ ጋካ ኢዛ ዴሚዳ ማላ ኢዛ ቶሆ ቦላ ጉፋናዳ “ጎዶ! ኔ ሃን ዲዛኮ ታ ኢሻይ ሃይቄናኮሺን” ጋዱስ።

³³ኢዛኔ ኢዞ ካሊ ዪዳ ኣይሁዳቲ ዬኪዛይሳ ዬሱሲ ቤዪዲ ዳሮ ሚሼቲዲ

³⁴“ኢዛ ኣዋን ሞጊዴቲ?” ጊዲ ኦይቺዴስ፤ ኢስቲካ “ጎዶ! ሃ ያዳ ቤያ” ጊዳ።

³⁵ዬሱሲካ ኣፉንፂዴስ።

³⁶ኣይሁዳቲካ “ኢዚ ኢዛ ኣይ ማላ ሲቂዛኮ ቤይቴ” ጊዳ።

³⁷ኢስታ ጊዶፌ ኢሲ ኢሲ ኣሳቲ “ሃይሲ ቆቄ ኣዴዛ ኣይፌ ፖግዳይሲ ሃይሳዴይ ሃይቆንታ ማላ ኦꬃናስ ዳንዳዬኔ?” ጊዳ።

³⁸ዬሱሲ ኢዛ ዎዝናይ ሚሼቲን ጌዴ ዱፎኮ ቢዴስ፤ ዱፎዚካ ሹቻራ ጎርዴቲዳ ጎንጎሎ።

³⁹ኢዚካ ኢስታ “ሹቻ ዴንꬂቴ!” ጊዴስ። ሃይቂዳይሳ ሚቼያ ማርታይ “ጎዶ! ኢዚ ሃይቂን ሃቺ ኦይዱ ጋላስ ጊዲዳ ጊሽ ፂንቃናኮ!” ጋዱስ።

⁴⁰ዬሱሲካ “ኔ ኣማኒዛ ጊዲኮ ፆሳ ቦንቾ ቤያንዳሳ ጋዳ ኔስ ታ ዮታቤይኪና?” ጊዴስ።

⁴¹ሄሳ ጊሽ ሹቻ ዴንꬂዳ፤ ዬሱሲካ ፑዴ ሳሎ ፄሊዲ “ታ ኣዋዉ! ኔ ታ ጊዛዝ ሲዪዳ ጊሽ ታ ኔና ጋላታይስ።

⁴²ኔ ኡባ ጋላስ ታ ጊዛዝ ሲዪዛይሳ ታ ኤራይስ፤ ጊዶ ኣቲን ታ ሄሳ ጊዳይ ሃይሳን ኤቂዳ ኣሳቲ ኔ ታና ኪቲዳይሳ ኣማናና ማላሳ።

⁴³ዬሱሲ ሄሳ ጊዳፔ ካሌꬂዲ ቃላ ꬎቁ ሂስቲዲ “ኣላዛሬ! ሃ ኬዛ!” ጊዲ ፄይጊዴስ።

⁴⁴ሃይቂዳ ኣላዛሬይካ ኩሜꬃ ኣሳቴꬃይ ሞጎ ማይዖን ፃፄቲዳ ማላ ዱፎፔ ኬዚዴስ። ዬሱሲካ “ቢርሺ ዬዲቴ ቦ!” ጊዴስ።

⁴⁵ሄሳ ጊሽ ማራሞ ሚንꬄꬃና ዪዳ ኣይሁዳታፔ ዳሮ ኣሳይ ዬሱሲ ኦꬂዳይሳ ቤዪዲ ኢዛን ኣማኒዴስ።

⁴⁶ኢስታፌ ባጋቲ ቢዲ ዬሱሲ ኦꬂዳይሳ ፋርሳዌታስ ዮቲዳ።

⁴⁷ሄሳ ቄሴታ ሃላቃቲኔ ፋርሳዌቲ ኣይሁዳታ ዱላታ ሺቃና ማላ ፄይጊዲ “ሃ ኣዴዚ ዳሮ ዱማ ዱማ ማላታታ ኦꬂዳዴ ጊዲዳ ጊሽ ኑ ኣይ ኦꬂኮ ሎዖ?

⁴⁸ኑ ጮዑ ጊኮ ኣሲ ዉሪ ኢዛን ኣማናናኔ ኦሮሜ ኣሲካ ዪዲ ሃይሳ ኑ ቢታኔ ኑ ኣሳ ኑፔ ኤካና” ጊዳ።

⁴⁹ኢስታ ጊዶፌ ኢሳዴይ ሄ ላይꬅ ቄሴታስ ዋና ሃላቃ ቃያፋይ “ኢንቴ ኣይኮካ ኤሬኬታ።

⁵⁰ዴሬይ ዉሪ ꬋያናፔ ዴሬ ጊሽ ኢሲ ኣሲ ሃይቂኮ ሎዖ ጊዳናይሳ ጊሽ ዩሺ ቆፔኬቲ?” ጊዴስ።

⁵¹ኢዚ ሄሳ ባፔ ጊዶንታ ሄ ላይꬅ ኢዚ ቄሴታስ ሃላቃ ጊዲዳ ጊሽ ዬሱሲ ኣይሁዳ ዴሬ ጊሽ ሲንꬃፌ ሃይቃናይሳ ዮቲዴስ።

⁵²ኢዚ ሃይቃናይ ሄ ዴሬ ኣሳስ ፃላላ ጊዶንታ ካሴ ላሌቲዳ ፆሳ ናይታካ ኢሲ ቦላ ሺሻናሳ።

⁵³ሄ ጋላሳፌ ሃ ሲሚን ኢዛ ዎꬋናስ ማቄቲዳ።

⁵⁴ሄሳ ጊሽ ዬሱሲ ሄ ጋላሳፌ ሃ ሲሚን ኣይሁዳታ ጊዶን ቆንጬራ ሲሜሬቲቤና። ጊዶ ኣቲን ዱጌ ባዞ ቢታ ማታን ዲዛ ኤፊሬሜ ጌቴቲዛ ካታማይ ዲዛሶ ቢዲ ባና ካሊዛይታራ ሄን ታኪዴስ።

⁵⁵ኣይሁዳቲ ፓዚጋ ባዓሌይ ማቲዳ ማላ ባዓሌይ ጋካናፔ ካሴ ጌሾ ዎጋ ኦꬃናስ ዳሮ ኣሳይ ዱማ ዱማ ዴሬፔ ዬሩሳላሜ ዪዴስ።

⁵⁶ኣሳይ ዬሱሳ ኮዪሼ ፆሳ ኬꬃን ኤቂዲ ባ ጊዶን ኢሶይ ኢሳራ “ኢንቴስ ኣይ ሚሳቲዜ? ባዓሌዛስ ዬኔሻ?” ጊዴስ።

⁵⁷ቄሴታ ሃላቃቲኔ ፋርሳዌቲ ቃሴ ዬሱሳ ኦይካናስ ኢዚ ኣዋን ዲዛኮኔ ኤሪዛዴይ ኢስታስ ማላታና ማላ ካሴ ኣዛዚ ዎꬂዳ።