ዮሃኒሳ 3:14-21 - ኦራꬃ ጫቆ ማፃፋ ጋሞꬆ

¹⁴“ባዞ ቢታን ሙሴይ ሾሽ ꬎቁ ሂስቲ ካቂዳይሳꬆ ሄሳꬆካ ኣሳ ናይ ꬎቃሶን ካቄታናስ ቤሴስ።

¹⁵ሄሲካ ኢዛን ኣማኒዛዴይ ዉሪካ ሜርና ዴዖ ዴማናሳ።

¹⁶ፆሳ ና ኣማኒዛይ ዉሪ ሜርና ዴዖ ዴማናፔ ኣቲን ꬋዮንታ ማላ ፆሲ ሃይሳ ኣላሜዛ ዳሮ ሲቂዳ ጊሽ ባ ሜፂ ኢሲ ናዛ ኢሚዴስ።

¹⁷ፆሲ ባ ናዛ ሃ ዱጌ ኣላሜ ኪቲዳይ ኣላሜ ኣሳይ ኢዛን ኣማኒዲ ኣታና ማላሳ ኣቲን ኢዚ ኣላሜ ኣሳ ቦላ ፒርዳናስ ጊዴና።

¹⁸“ኢዛ ኣማኒዛዴ ቦላ ፒርዴቴና። ኢዛ ኣማኖንታዴይ ጊዲኮ ፆሳ ና ኢሲኔዛን ኣማኖንታ ጊሽ ካሴካ ፒርዴቲ ኡቲዴስ።

¹⁹ፒርዳይካ ሃይሳ ማላ፥ ፖዖይ ሃ ኣላሜ ዪዴስ ሺን ኣሳስ ኦሶይ ኢታ ጊዲዳ ጊሽ ኣሳይ ፖዖፔ ዳሮ ꬉማ ዶሲዴስ።

²⁰ኢታ ኦꬂዛዴይ ዉሪካ ፖዖ ዶሴና። ኢዚ ኦꬂዛ ኢታ ኦሶይ ቆንጪ ኬዞንታ ማላ ኢዚ ባ ሁዔስ ፖዖይ ዲዛሶ ኬዜና።

²¹ቱሙ ኦꬂዛዴይ ጊዲኮ ፖዖይ ዲዛሶ ዬስ። ኢዚ ፖዖይ ዲዛሶ ዪዛ ጋሶይ ፆሳ ኣዛዞ ማላ ኢዚ ኦꬂዳ ኦሶይ ቆንጫና ማላሳ” ጊዴስ።