ኦሮሜ 8:2-14

²ጋሶይካ ዴዖ ኣያና ዎጋይ ዬሱስ ኪርስቶሳ ባጋራ ናጋራፔ ኢስታ ጌሺዳ ጊሻሳ።

³ናጋራንቻ ኣሾፔ ዴንዲዳይሳን ዎጋይ ፖላናስ ዳንዳዮንታይሳ ፆሲ ባ ናዛ ናጋራንቻ ኣሳ ሌሚሶን ናጋራስ ያርሼታና ማላ ዬዲዲ ፖሊዴስ። ሂስቲዲ ናጋራ ኢዛ ኣሾን ፒርዲዴስ።

⁴ሄሲካ ኑኒ ኣሾን ጊዶንታ ኣያናን ሲሜሬቲዛ ኑፔ ዎጋይ ኮዪዛ ፂሎቴꬃ ፖላናሳ።

⁵ኣሾ ሼኔ ማላ ዳና ኮዪዛ ኣሳታ ዎዝናይ ኣሾይ ኮዪዛ ሚሻን ሼምፔስ። ኣያና ሼኔ ማላ ዲዛይቲ ቃሴ ባ ዎዝና ኣያናይ ኮዪዛ ሚሻ ቦላ ዎꬄቴስ።

⁶ኣሾስ ፃላላ ቆፋይ ሃይቆ ጊዲሺን ኣያና ዮዖስ ቆፋይ ጊዲኮ ዴዖኔ ሳሮቴꬃ።

⁷ናጋራስ ሃሬቲዛ ዎዝናይ ፆሳራ ኦሻ። ጋሶይካ ኢዚ ፆሳ ዎጋስ ሃሬቴናኔ ሃሬታናስ ዳንዳዬና።

⁸ኣሾ ሼኔ ማላ ዲዛ ኣሳቲካ ፆሴ ኡፋይሳስ ዳንዳዬቴና።

⁹ኢንቴ ቃሴ ፆሳ ኣያናይ ኢንቴናን ዲዛ ጊዲኮ ኣሾን ጊዶንታ ኣያናን ዴታ። ኪርስቶሳ ኣያናይ ኢዛ ቦላ ባይንዳዴይ ኪርስቶሳስ ጊዴና።

¹⁰ኪርስቶሲ ኢንቴ ጊዶን ዲኮ ቃሴ ኢንቴ ኣሳቴꬃይ ናጋራ ጌዶን ሃይቄꬅ ጊዲኮካ ኢንቴ ኣያናይ ቃሴ ፂሎቴꬃ ጋሶን ዴዖን ዴስ።

¹¹ዬሱሳ ሃይቆፔ ዴንꬂዳ ኢዛ ኣያናይ ኢንቴ ቦላ ዲዛ ጊዲኮ ኪርስቶሳ ሃይቆፔ ዴንꬂዳይሲ ኢንቴ ጊዶን ዲዛ ኢዛ ኣያናይ ሃይቃናስ ዲዛ ኢንቴ ኣሳቴꬃስ ዴዖ ኢማና።

¹²ሄሳ ጊሽ ታ ኢሻቶ! ሄሲካ ሃናናይ ዶሳን ጊዴና ሺን ኑ ኣሾ ሼኔ ማላ ዳናስ ኣሾስ ጊዶኮ።

¹³ኣሾ ሼኔ ማላ ዲዛ ጊዲኮ ኢንቴ ሃይቃና፤ ኣሾ ኦሶ ኢታዛ ኢንቴ ኣያናን ዎꬊኮ ኢንቴ ዴዖን ዳና።

¹⁴ፆሳ ኣያናን ካሊዛይቲ ኢስቲ ፆሳ ናይታ።